VR 聽就聽得多，唔知大家玩過未？最近 APM 6樓開咗體驗館有得玩唔同的 VR 遊戲同賽車模擬器，今日我依莉詩就同水哥一齊去試玩啦！
動感模擬賽車
呢間體驗館係商場，開放式設計就可以平時 D 遊戲機試玩場咁。分別有兩部賽車模擬器同一部 VR座位。賽車模擬器有一個大電視同座位，用軚盤同腳踏控制架車，模擬賽車的感覺。不過呢度就逐樣收費，當中模擬賽車 15分鐘 $120，如果想雙人連線每人要加 $50，抵唔抵玩就見人見智。
▲ 軚盤有多個按鈕等你控制賽車，如果係新手，校自動波就無需理會。
水哥短評
賽車 game 好有真實揸車嘅感覺。雖然我有車牌，不過發覺賽車難過揸普通車呢。
依莉詩短評
呢部比起我上年暑假係新城市廣場試過的模擬器無咁逼真，因為只有一個 Mon ，而且張凳唔識郁。呢部反而更加似街鋪玩的賽車 game ，不過好處就係易控制 D ，特別對於我呢 D 無乜方向感的人，揸到一個圈已經好開心。
4D 動感 VR 座位
呢個半球狀的座位唔單止會有風出，仲會隨住 VR 播放的影片而郁動，令模擬玩過山車等機動遊戲更逼真。另外，座位仲有控制桿，可以模擬係飛機上面玩射擊 Game，非常刺激。收費方面 15分鐘 $60，可以揀兩個遊戲。
水哥短評
VR 原來加埋張櫈真係好暈，而兩個遊戲比較，我鍾意 VR 櫈多 D ，因為佢真係完全呃到我大腦，好似真係玩緊機動遊戲咁。
依莉詩短評
呢個 VR 座位相當刺激，同上星期玩的 Samsung 動感戲院 不相伯仲，一樣咁逼真，衝落去的時間 feel 到有離心力，嚇到慘叫。不過呢個體驗館咁 Open，唔知嘅人見自己座係位無啦啦尖叫都幾尷尬。
JetOne VR
地址：觀塘 APM 6樓 (三聯書局對面)
營業時間：星期日至四 12pm – 10pm、星期五、六 及 公眾假期 12pm – 11pm
Leave a Comment