如果話「考試」係每個學生一定要經歷嘅過程，咁「Pitching」就係每個 startup 創業家必須經歷嘅事。Startup 公司 pitch 人唔一定係為錢，所以就算大家家財萬貫，即使唔係叫人投資，都要搵機會同人解釋做緊嘅係一盤咩嘢生意。咁去 pitch 為咩？可能性好多：有人為咗搵投資者，有人為咗攞 connection，亦有人為咗爭取曝光機會。Pitching 係咪成功好視乎閣下最初嘅目標係咩，就算吸引唔到投資者，都未必一定代表失敗嘅！
上台 Pitching 學諗野
小編同唔少 startup 創辦人傾過計，大部份人都表示喺 pitch 學習到嘅係「思考方式」。佢哋話 pitch 其實係一個好好嘅機會俾第三者審視自己嘅一個方法，可以反思一下自己諗得夠唔夠全面呢？係咪仲有其他更多嘅方法做呢？自己諗法係咪太過一廂情願呢？透過俾一眾專業嘅評審質問，其實可以學習到用投資人嘅方式思考，久而久之自然思考都變得更加全面。
累積經驗展成果
另外，參加過唔同類型 pitch event 嘅創辦人普遍都會覺得每次去 pitch 都賺到新經驗。要個 pitch 好睇除咗要有豐富嘅內容之外，當然高超嘅 present 技巧亦有好大嘅幫助，如果可以令到其他出席嘅團隊都 Wow 一聲，咁就更加容易令人留低好印象添！不過一個好嘅 presentation 當然要做好多事前工夫，而其實 present 嘅技巧來自失敗經驗嘅累積，好多創業者都對自己嘅產品信心爆燈，但係偏偏就無諗過可能在創投演示嗰陣會出問題，甚至意外。而有呢 D 過失敗經驗嘅人先會知道 pitching 某程度只係一場 show。台上十分鐘、台下十年功嘛。
視乎對象調整內容
另外，每次 pitch 都可以得到評審團好多唔同嘅意見，而且總係會出現一題俾人鬧，例如：有時因為生意構思問題，亦有因為演示技巧不足。而佢哋畀嘅貼士就係你要先諗清楚 pitch 嘅對象想你講咩野，例如 VC 會比較關心賺錢方法同能力，所以 PowerPoint 要講多 d 呢方面嘅內容，而 incubator 就可能想多聽一 D 有關點樣改變現有問題嘅內容，總之要視乎唔同對象去做調整，絕對冇可能靠一個 PowerPoint 走天涯架！
數碼港天使創投計劃試身手
正如學生做 Past Paper 愈多就愈容易掌握箇中技巧，其實唔理自己喺台上面定喺台下面，有心想學就可以學到。問題其實係創業者自己嘅學習能力，如果唔識從失敗嘅經驗汲取教訓，咁做幾多次都未必有用；相反，就算你唔係自己上台，如果可以係台下睇到其他人「衰咗咩野」都係一種學習方法呢！小記問十個 startup，十個都會話準備 pitch 嘅工作超辛苦，但係睇返佢哋完事之後嗰個滿足嘅表情就知道一切都係值得嘅。
如果各位 unwire 讀者都心思思想試下自己實力，香港地就梗係有機會啦！數碼港自 2011 年開始已經舉辦「數碼港天使創投訓練計劃」，除咗提供為期四個月嘅密集培訓，仲有一對一諮詢、顧問服務、創投比賽，同埋向天使投資者創投演示嘅機會。有興趣嘅 startup，就要密切留意數碼港嘅動向了。
分享到 :
最新影片
