由 BBC3 製作嘅迷你劇《失落的十三年》，係上個月尾 2 月 28 日正式開播，一共為五集。討論度相當低嘅《失落的十三年》，評價卻一點都不低，令小編諗起之前同樣情況嘅《London Spy》。故事講述 Ivy Moxham 被人囚禁 13 年後終逃離，回到一個看似熟悉卻又不熟悉的家。呢類故事雖煽情但卻一點都不新鮮，然而今次《失落的十三年》加入咗一啲懸疑驚悚元素係其中，可看性一點都不低。
故事講述當女主角 Ivy 逃離被囚禁咗 13 年嘅地窖，回到闊別已久嘅生活當中；然而 Ivy 需要承受著沉重的感情壓力：如何再次讓別人接受自己 ﹑ 再次去感受以及再次去愛。同一時間，雖然 Ivy 逃離咗綁架犯 Mark White 嘅囚禁，但 Mark 並未落網之餘，又有另一名叫 Phoebe 的十歲小女孩失蹤，隨後 White 的車被人發現，車中有Phoebe的頭髮。 Ivy 必須再次承受回憶過去被 Mark White 囚禁日子的痛苦去為警方提供線索。
今次女主角由 Jodie Comer 所飾演，佢嘅五官帶有一點神秘感，由佢做《失落的十三年》女主角 Ivy ，氣質非常相符；而且《失落的十三年》亦見拍攝事前準備充足，例如係 Ivy 逃離後去到警方接受檢查時， Ivy 嘅手指腳指都稍有變形同較灰黃，Jodie 嘅肢體表現同說話表達都好傳神，即使未達到驚為天人嘅演技卻已經足夠觀眾投入呢個故事當中。
一個小女孩被囚禁十多年然後重見天日嘅故仔的確幾感人，但呢個題材可以話係用到爛；不過今次《失落的十三年》並唔係走向勵志路線，而係懸疑路線。女主角 Ivy 係十三歲被綁架，十三年後成功逃脫回到現實，然而 Ivy 比警方同屋企人想像中恢復得更快。不過，女主角 Ivy 嘅口供前言不對後語，就好似試圖隱瞞被囚禁時嘅秘密咁（第一集尾時更有一幕女警 Lisa 同 男警 Elliot 講「She is jsut making fool of you!」）。到底係消失嘅十三年 Ivy 發生過咩事？ 綁架犯 Mark White 逃脫後再捉咗另一個小女孩 Phoebe ，手法就好似十三年前捉走 Ivy 一樣， Ivy 又可唔可以承受回憶過去被囚禁生活嘅痛苦去協助警方救出女孩 Phoebe 呢？
節奏慢嘅英劇好多時都唔係港人個杯茶，但當碰上懸疑驚悚題材卻係意外地夾，加上英劇較美劇強嘅細膩描寫（Well.. 其實都係一啲啲），《失落的十三年》懸疑感十足非常吸引到小編想繼續追睇落去！《失落的十三年》其實更係 BBC3 網絡化嘅首部新劇，要數過去 BBC3 仲係傳統媒體時嘅出名作品的確不多，小編希望今次 Thirteen 唔好又爛尾啦。