觀塘出名多嘢食，而 759 阿信屋好似都想係呢區想分一杯羹，繼麵包工房、車仔麵、雲吞麵、茶餐廳之後，推出《759飯堂》，聲稱為打工仔提供廉價的碟頭飯咁話。我依莉詩就同兩隻 Unwire 白老鼠一齊親身試食，睇下性價比如何先！

枱夠疏，坐得算舒服

可能係新開幾日，加上門口唔明顯，所以我地兩點去到飯堂都唔洗點等位。雖然話係飯堂，不過格局比較似茶餐廳，中間係圓枱，旁邊係卡位，環境都算光猛，枱都唔算密，坐得算舒服。而且店內有廁所，唔洗轉入後行先去到，加上新開業，都算乾淨。

▲ 同好多工廠飯堂一樣，759飯堂要行條窄樓梯先落到去。

▲ 中間位都算多，而且枱與枱之間都唔算密。

▲ 旁邊係卡位，最多可以坐 6個人。

 

▲ 水吧同普通茶餐廳無大分別。

茶記價錢，燒味偏貴

雖然阿信屋聲稱為打工仔提供廉價的碟頭飯，不過我地去到就發現價格並不便宜，一個午餐成 $45，常餐都係 $38，有翠華的級數，而且燒味單拼都 $35。本應以為等下午茶可以食平 D ，但呢度唔似一般飯堂，下午茶係無炒粉麵，只有小食，不禁令人覺得「比得呢個價錢就唔食阿信屋啦！」

▲今日 Lunch 的款式，大約 $45 ，觀塘黎講都係普通價唔算平。

▲ 常餐要 $38，比得上翠華。

▲下午茶無炒粉麵，只有小食。

 

 

▲ 3餸車仔麵 $35，入面有豬軟骨、牛腩、豬手，睇落都唔差。

▲ 不過三個人埋單成舊水真係有 D 貴。

同事試食報告

講咗咁耐，係時候到重頭戲，試食！

艾露貓：「份量太少，好似無食過嘢咁 !」

我叫咗走蝦佢無走已經哈哈哈…D 飯仲好似蒸咁，一D鑊氣都冇。不過都算，打工仔食 Lunch 都係為飽肚，所以一間飯堂最緊要睇佢大唔大碟，但呢碟揚州炒飯的份量仲少過隔離飯堂個下午茶，好似無食過嘢咁，咁就用咗 $45，之後仲要去隔離買多個 Mos Burger 先夠飽，唉！

Edward：「咖哩無咖哩味，奶茶無奶茶味！」

個咖哩牛腩飯 D 牛腩都算淋，不過就無咖哩味，好似只係椰汁加咗 D 色水咁，最失望就係無薯仔，無咗個靈魂。至於杯熱奶茶的奶味同茶味都唔夠，而且好粗糙。最過份係，飲完我想拎杯水都無。

▲ D 咖哩只有牛腩同洋蔥，無薯仔有 D 失望。

▲ 白飯中的兩舊菜，真係少得可隣。

依莉詩：「唔食慣濃味都 OK」

車仔麵的餸都算多選擇，豬軟骨、牛腩、豬手都有，算幾多嘢揀。而醬汁只得沙嗲、咖喱同麻辣，唔食辣就只得清湯，好淡。至於我揀的豬軟骨、牛腩同魚腐都無乜味，唔食慣濃味都 OK 嘅，不過呢個價錢，觀塘廣場有幾間車仔麵仲好食啊！

▲如果要加醬汁只得「沙嗲王」、咖喱汁同麻辣醬，如果唔食辣無腩汁揀，好淡味。

▲ 豬軟骨同牛腩都係白烚，無乜味。

 

地址：九龍觀塘成業街15-17號成運工業大廈地下1號
營業時間：星期一至日7:00am ~ 8:00pm