到了星期五，unwire 編輯部在這裡自由地想寫甚麼就寫甚麼，看看他們在生活上有甚麼意見
RIP
Arthur
每次有藝人離開我地，好多人都會忽然感性喊苦喊忽。平時可能睇都無睇，不過人一走仲慘過自己親人去左咁。社交網絡下產生的文化真係怪，見其他人感性就會想加入成為一份子，借機 show 下自己有幾咁感性。其實你唔識的，留下一句 rip 或直接跳過唔係罪，無需要假感性，人地死左先黎 wiki 一堆野出黎 copy 扮熟，真係無需要的。
賭神
Ducan
無嘢寫，講下故:
高進：「再敢賭落去，洪爺你都無晒錢，無謂要你輸埋個賭場要執笠就唔好啦」
洪爺：(機械聲)「估唔到你高進咁粗暴想執我笠 ?好， 我而家大你五百萬 cash ，一張支票仲有乜乜瑞士銀行本票，再介紹下賭場下個月八個新遊戲..」
(高進此時看到手提包中下方全是一百元，笑而不語)
荷官: 洪生，你有 cash 不如比左我地班手足出糧先 ..好嘛？
(以上故事純屬虛構)
模擬電視一日繼續，觀眾混淆依然
艾域
隨著亞洲電視不再永恆、大台無綫電視與不少觀眾背道而馳，即將開台的 ViuTV，的確是為本地電視業注入一絲新意。但當 ViuTV 在官方網站公布接收方法時，就又再提及「nowTV 機頂盒」、「電視機頂盒」等詞，再加上政府又指出香港電台將會接手亞視提供模擬廣播，頓時令艾域身邊不少人都向我查問，究竟 ViuTV 是否需要額外安裝機頂盒才可收看？香港電台為何已有 31 至 33 台，卻又說她會接手亞視等等問題。
先在此說說在亞視牌照被收回、ViuTV 又啟播之後，我們將可收看甚麼電視台吧。其實為何至今仍有人會想知道，收看 ViuTV 是否需要額外機頂盒，艾域認為是因為本地模擬廣播遲遲未結束，正是令觀眾混淆的主因。其實香港所有模擬及數碼頻道，均是採用 PAL-I 及 DTMB 廣播制式。早年的電視機包括薄屏電視，都只會內置 PAL-I 模擬電視調諧器（Tuner），因此無法接收以 DTMB 廣播的數碼頻道，而當時市場上就出現林林總總的機頂盒，亦即內置 DTMB 數碼電視調諧器的產品。
但現時市場上的電視機，都已全部內置 DTMB 調諧器，若果仍無法負擔更換數碼電視機，DTMB 機頂盒現時的價格亦已非常低廉，二三百多元就有交易，政府仍以這類用戶未換機為因，而將終止模擬廣播的年期一再延後（本來訂於 2012 年底，及後更改至 2015 年底，最新年期則是 2020 年），卻不是及早強制終止模擬廣播，以及為數碼廣播再作相關宣傳及教育，就只會進一步做成觀眾混淆，以為新加入的數碼電視台都需要額外添加機頂盒才可收看。
現在內置 DTMB 調諧器的 iDTV，二三千元一定有交易，若想沿用現有電視機去收看數碼廣播，買一個二三百元的機頂盒已可解決，要待 2020 年才停止模擬廣播，實在說不過去。
智能錶真係救左我一命
依莉詩
穿戴式的科技出得愈來愈多，但對我呢個一向食無定時，又少休息，完全唔注重健康的人嚟講，總係覺得無咩用。直到上星期，我深切體會到測心跳、步數、睡眠質素有咩用。 相信近排唔少人都病咗，我都唔例外，不過見只係咳同喉嚨痛，所以都照番工。到放工，屋企人同我慶祝生日，所以出咗街食飯。問題就出現啦，我覺得自己個心跳得好快，起初都唔覺得係咩，所以屋企人都繼食飯，無理到我。不過我就無晒胃口，愈來愈覺得唔舒服，亦因為最近男朋友送咗隻智能手錶比我，所以我就即管 check check 自己的心跳，發現唔只係我的感覺，原來真係愈跳愈快。
食完飯，我決定要去睇醫生，不過太夜，睇開有夜診的診所已經 full booking ，只好去睇急症。 去到急症室的時候，其實我已經好暈，但估唔到一去分流站，護士已經立即叫輪椅，推咗我去急救室的床了，之後的事我都唔太清楚了… 幸好，大家見到我寫呢篇文即係已經無事了，不過今次之後，我明白到要好好照顧自己身體係幾重要，同時亦好多謝果日照顧我的醫護人員同家人。
打手廣告
天恩
其實做咗咁耐，最有趣的就係見到讀者「xx打手」「廣告」的回覆，見到有同事去到用「死全家」黎回覆讀者唔係廣告，真係去得好盡。係的，網絡世界係多左好多置入式的廣告，亦有讀者明白有廣告係好正常的事，但其實大部份都是過於敏感。有時同事真心喜歡果件產品就會想寫多少少，但]心血文章出街後淪為廣告、XX打手抺殺左，好多只係望一望都題就判你死刑，都幾心酸。所謂「廣告」只係更花心機去找尋讀者同產品的交叉點，呢個新技術或者功能係現實生活中會方便到邊一類的用家，兩邊找尋一個連結關係。但如果產品攞到上手係唔掂的，就唔會黑寫成白，明明無就寫到有。
Leave a Comment