通常於香港買日系機，都係貪外型靚，鮮有高規格型號引入。不過今日籮文就發現一部又平又靚，規格又高嘅 Freetel Samurai 「極」，Freetel 其實係日本其中一間電訊商，Samurai 「極」就是他們其中一部自家品牌旗艦機。Samurai 「極」配備 6 吋 2560 x 1440 超高清大芒、2,100 萬像素主鏡頭及 800 萬前鏡頭，同時仲有指紋解鎖，旗艦機規格但價錢卻是中階機水平，非常吸引，想知有幾抵玩就要繼續閱讀以下文章啦！
包裝似日本威士忌
一見到 Samurai 「極」嘅包裝盒，盒上極少文字，一隻關於手機嘅字都冇，唔知嘅話會以為係近年好 Hit 嘅日本威士忌。包裝盒設計充滿日本風情，採用黑色金色配搭，見到咁高貴嘅配色就知依部係旗艦級手機。一打開盒，除咗機身之外，亦包括 MicroUSB 線、火牛及打開卡槽的針。留意由於是日系機的關係，火牛為兩腳頭。
▲包裝盒設計充滿日本風情，採用黑色金色配搭，見到咁高貴嘅配色就知依部係旗艦級手機。
▲一見到 Samurai 「極」嘅包裝盒，盒上極少文字，一隻關於手機嘅字都冇，唔知嘅話會以為係近年好 Hit 嘅日本威士忌。
▲除咗機身之外，亦包括 MicroUSB 線、火牛及打開卡槽的針。留意由於是日系機的關係，火牛為兩腳頭。
華麗薄切 低調外型
如果要我用一個詞語形容 Samurai 「極」嘅外型，依個詞語會係「低調」。身為一部旗艦機，「極」嘅外型非常平庸，機背採用啞黑色設計，機邊有斜邊切割處理，光線底下閃閃發光，機面驟眼睇黑色一片，平平無奇，其實頂部及底部都隱藏暗花圖案，除咗機背紅色 Logo 有點兒突。造工仔細，拎上手，手感非常紮實，雖然擁有 6 吋巨芒，但係單手操控都算輕鬆。
▲身為一部旗艦機，「極」嘅外型非常平庸，機背採用啞黑色設計
▲機邊有斜邊切割處理，光線底下閃閃發光，機面驟眼睇黑色一片，平平無奇，其實頂部及底部都隱藏暗花圖案
6吋超高清屏幕 又大又清 仲要窄邊框
Samurai 「極」用上 6 吋 WQHD (1,440 x 2,560) 超高清屏幕，像素密度高達 490PPI，可以話係又大又清，不論睇 YouTube 或者靜態影像，都完全唔覺有顆粒感，偏色問題亦不明顯，只有輕微偏青色，籮文唯一不滿意是亮度不足，調到最亮都只是 LG G4 的 80-90%，但仍然足夠於陽光底下清楚閱讀內容。不過唔緊要，原來 Setting 入面有一個叫 MiraVision 嘅功能，入到去可以任你 Set 對比度、亮度、色溫、飽和度等等屏幕參數。
雖然6吋屏幕頗大，但好在屏幕左右兩邊夠窄，雖然未足以稱為「超窄邊框」，但足以讓籮文可以單手操作。屏幕表現非常不錯，但係喇叭表現就麻麻啦，未調到最大聲就已經聽到拆拆地，用家都係用耳機啦！
▲Samurai 「極」用上 6 吋 WQHD (1,440 x 2,560) 超高清屏幕，像素密度高達 490PPI，可以話係又大又清
▲雖然6吋屏幕頗大，但好在屏幕左右兩邊夠窄，雖然未足以稱為「超窄邊框」，但足以讓籮文可以單手操作。
▲不過唔緊要，原來 Setting 入面有一個叫 MiraVision 嘅功能，入到去可以任你 Set 對比度、亮度、色溫、飽和度等等屏幕參數。
指紋超爽 不同手指開不同 App
主鏡頭下方有一個方型的指紋掃瞄器，比起其他「指紋手機」，Samurai 「極」的指紋登記介面更花心思，採用一隻手掌，五隻手指的圖形介面，更清楚易用，不過如果女朋友要佔用你一隻手指位，你又會讓邊隻手拍俾佢呢？解鎖速度與其他大廠旗艦機相約，相當敏捷，比人哋叻嘅係，用家可以 Set 不同手指解鎖時開不同的 App，令你更快人一步，但同其他人一樣嘅係，指紋登記數量有限制，最多登記 5 隻手指。
▲主鏡頭下方有一個方型的指紋掃瞄器
▲Samurai 「極」的指紋登記介面更花心思，採用一隻手掌，五隻手指的圖形介面，更清楚易用
▲比人哋叻嘅係，除咗「Just Unlock Phone」之外，用家可以 Set 不同手指解鎖時開不同的 App，令你更快人一步
2,100 萬像素相機 仲可以拍 4K
細心的話，你會留意到機背的主相機鏡頭是微微突出的，原來唔只係外觀，就連規格都非常突出，主鏡頭解像度達到 2,100 萬像素，是現時市面上最高像素的一批智能手機，更令籮文驚訝的，是支援追焦模式，取景時按住畫面上的主體，就可以啓動追焦功能，另外，支援慢動作影片拍攝，更加支援 4K 影片拍攝。而前置鏡頭亦有 800 萬像素，亦達到主流的旗艦級數，當然亦有美顏功能啦。除了按下屏幕上的快門，用家亦可以用已登記的指紋按到指紋辨識器上觸動快門。
▲細心的話，你會留意到機背的主相機鏡頭是微微突出的
▲拍攝介面簡單，左面是5個不同模式
▲更令籮文驚訝的，是支援追焦模式，取景時按住畫面上的主體，就可以啓動追焦功能
▲放到大大後，細緻度仍然維持到高水平
▲用上 f2.2 光圈，要做散景效果其實唔難
▲支援慢動作影片拍攝，更加支援 4K 影片拍攝
▲前置鏡頭亦有 800 萬像素，亦達到主流的旗艦級數，當然亦有美顏功能啦
▲美顏功能包括有磨皮、美白、瘦面、大眼，全部可以任你調較程度
手勢感應 都係 Gimmick 嘢 但電池十分噤用
日系機多數有好多得意小功能，但 Freetel 依部 Samurai 極 就走簡約路線，只有手勢感應，如雙擊屏幕可以解鎖手機等。Gimmick 野唔洗多，最緊要實用，籮文部 Samurai 極 充滿電後，用咗 24 小時都仲有3,40%，原來佢內置不可換電池 3,400mAh，處理器就用上 MediaTek Helio X10 八核心 2.0GHz，配合 3GB RAM，所以耗電量 OK。內置 32 GB 儲存空間，係就係細咗啲，不過最高可以入 64 GB MicroSD。支援 Dual Sim 功能，可以話係日系機中罕有的功能。
籮文：「簡約低調地屈機」
依部機可算是籮文試過咁多部日系機之中，最喜愛嘅一部，集合晒籮文鍾意嘅功能，又冇多餘嘅「日系」功能：低調外型、超高清大芒、影相靚、拍4K、有指紋認證。三千幾蚊買到上述功能，暫時好似冇機做到喎。雖然處理器只用上 Helio X10，但用咗全日亦未見有窒機情況，所以依部機抵玩程度，籮文要俾 99.9 分。
售價：HK$3,680
查詢：23740618（三禾電氣）
Leave a Comment