替月行道！杏子帶你去大阪《美少女戰士》期間限定 Cafe

繼上次杏子去過的《銀魂》萬事屋主題 Cafe，最近我就去左位於大阪區的 ANION STATION，今次有美少女戰士 Crystal 的期間限定活動！

今次呢度的佈置就無上次《銀魂》萬事屋主題 Cafe 咁精緻喇，可能係「期間限定」的原因啦！不過就有好多款紀念品賣，美戰迷一定好開心喇！

駐場 DJ 即場點唱

今次同其他 Cafe 有啲唔同的地方，就係呢度有駐場 DJ 比你即場點唱，曲目當然係咁多年黎關於美少女戰士的歌曲啦。特大螢幕就同時播放有關歌曲的 PV。而點唱方法就係經由 twitter send message〜

食物款式不多 但各具特色

Menu 上只有兩款餐點，分別係厚 Pancake 及 蛋包飯，兩款都係 1000 円，而飲品就有 6 款，每個角色都有一款代表飲品，我就點左主角 Sailor Moon 個杯「Pink Moon Tiara」，其實就係蜜桃味的 Lemonade 啦～ 雖然小兔出名係烏龍，但又幾好食

多款《美戰》精品即場售賣

店内的售賣區仲有各種美少女戰士精品，如果你今次錯過左就唔知幾時可以搵到咁集中的精品喇！

其實當日場內仲有好多不同的精品，例如有杯杯碟碟、毛巾、影碟等等，不過實在太多，影唔晒呀！

而今次期間限定活動係上個星期日亦已經完結左啦，唔知下次會有啲咩呢？非常期待著 ANION STATION 下一個主題♡

關於 : 杏子@Mukoangie
日本藝人組合Mukoangie成員。漫才師。
也是日本遊牧女子一名。精通港日文化知識。
因工作需要遊走於港日兩地。現被委任為觀光大使。
並以發掘全世界最好味的薯片為人生目標。請多多指教！
www.facebook.com/mukoangie