之前 Edward 去咗北京玩小米「九號平衡車」，可惜因為香港法例問題所以未有推出，無得玩。今日依莉詩就借咗部由香港團隊研發的 GoSkate 筋斗雲嚟試玩，睇下易唔易上手先！
單轆設計 5 分鐘可以上手
同平衡車唔同，筋斗雲只有中間一個轆，雖然好似滑板咁前後控制，踩上去就好似滑雪咁。因為係單個摩打設計，筋斗雲靠雙邊平衡去感應，只要側身重心向前就會向前，重心向後就會向後，比係平衡車更易上手。就算我平衡感唔太好，但試咗兩次就已經輕鬆行到直線。雖然佢似滑板，不過亦因為得一個轆，所以唔可以上落梯級，而且因為無剎車掣，最好就係無乜人的路或者公園入面玩會比較合適。
▲ 筋斗雲 ABS 同 PS材質製成，可以保護內置機件，應該都會幾襟撞。
▲ 摩打位於中間的轆，踢上去就好似滑雪咁。
夠由沙田踩到粉嶺
筋斗雲的續航力同平衡車差唔多，叉滿 90 分鐘電可以行 20km，最高速度為 15km/hr，差唔得由沙田去到粉嶺咁遠。不過筋斗雲始終唔係代步車，留係公園玩唔會唔夠用啦。而筋斗雲最大負重達 220 磅，本體則有20 磅重 ，要拎出拎入可能有 D 麻煩，不過要玩就梗係要付出少少嘅。
▲ 筋斗雲中間有個叉電插口。
▲ 筋斗雲採用 Panasonic 電池續航力約 20km。
▲ 一開動 筋斗雲，兩邊的 LED 燈就會亮起，夜晚玩夠晒型！ 
▲ 除咗燈，筋斗雲仲可以連接藍芽播歌。播住歌飛快咁閃過，仲唔成為全場焦點？
依莉詩 :「地面飛馳的感覺！」
呢塊筋斗雲原來都幾易上手，想向前向後只要轉重心腳就得，唔會似平衡車咁向前樁，我上咗去兩次就已經行到直線，而且速度都係睇自己則幾多嚟控制，非常簡單。不過因為得一個轆，上落唔到梯級，玩法可能俾滑板少。另外，落車亦係有 D 困難，如果單腳落車因重心的作用，電機仍然會有動力向前，所以最好都係戴足頭盔、護腕、護膝等保護裝備先玩會安全 D。
售價：$ 2,750
查詢：Searching C (2568 2778)
分享到 :
最新影片
