DIY 情人節禮物！4 個 PMQ 工作坊

2016-02-12

Published by

Billy

星期日就係情人節，如果仲未諗好禮物嘅男朋友們依一刻都非常頭痛吧。 PMQ 元創方將會係聽日同後日，亦即係 2 月 13 日及 14 日特別呈獻「拾物有情」活動，當中集合集合工作坊、互動藝術裝置及放映館；而今次小編要同大家介紹嘅就係當中嘅 Workshop 啦！除咗係免費參與之外，仲可以製作一份獨一無二禮物送比另一半，係咪好正呢？

期間限定：「連線」手繪咖啡杯及「Only Rose」手捏黏土玫瑰

今次 PMQ 舉辦嘅期間限定工作坊全部都係免費，想參加嘅讀者只需要係 PMQ 元創方內尋找「情」字印花或完成指定任務，即可免費參加工作坊，為另一半親手製作獨一無二的禮物。而小編就親身試咗兩個工作坊，非常考心機同手藝，不過就好靚好特別，用嚟送俾另一半就至岩。

「連線」手繪咖啡杯

「如果你是一隻杯，我就是唯一和你連上的杯蓋。」手繪咖啡杯工作坊透過二人共同繪制咖啡杯同杯蓋，用插圖盡情表達愛意，最後係畫中畫上紅線，連上杯同蓋，連上情侶間嘅美好情緣。（係咪好有意境呢？實冧死女朋友啦 XD）

工作坊創辦人即場示範，畫咗佢最鍾意嘅貓貓，畫晒成隻杯前後都不過二十分鐘左右，好勁啊！

到依莉詩實試啦！比較遴迍嘅依莉詩最後都係需要幫手，不過呢個就係工作坊嘅樂趣啊嘛。

成個杯畫晒心心其實都幾俗，可以考慮下畫玫瑰（不過又係幾考畫功的）

半製成品！到時可以即場上埋色㗎！

「Only Rose」手捏黏土玫瑰

不同數量嘅玫瑰花代表不同含義，而一支玫瑰嘅花語就係 Only You 。係情人節不妨製作一枝手捏黏土玫瑰送比另一半，話比佢話「 You are my only one !」。

材料其實無想像中複雜，而黏土亦非想像中隨處買到嘅種類，而係較為挺及硬身的黏土

先將黏土搓成長條形

然後再切粒

將切好的粒粒壓成花瓣，厚薄可以自行決定，越薄當然難度越高

然後就可以開始把它捲成花瓣的形狀

可以選擇嘅款式不只一個，可以根據返自己鍾意嘅顏色同形狀去決定（另外男士亦可選擇較為容易﹑適合手指較粗大的玫瑰款式）

回禮之選： DIY 心形泥牌及手造銀戒

收到另一半嘅禮物，你唔係諗住唔回禮嘛？三月十四就係白色情人節，亦即係回禮嘅日子。有一個月時間充足準備，應該整咩好？不妨考慮下 PMQ 裡 FLOW+ 嘅心形泥牌同 OBELLERY 嘅手造銀戒。雖然呢兩個工作坊並唔係免費，但亦都非常值得參加。

DIY 心形泥牌

若然自問藝術造詣唔高，要整上面兩個期間限定工作坊的確幾有難度；隨時整得樣衰就會俾另一半嫌。不過 FLOW+ 嘅 DIY 心形泥牌則唔要求參加者擅長畫畫或者黏土，而係非常簡單的蓋章。過程簡單，但作品卻非常獨特，皆因每一下蓋嘅力度唔同亦會有唔同效果，而且仲可以將一啲有紀念價值嘅小物品如戒指或鑰匙等刻印下去。

每一下蓋印力度都會唔同，所以作品並唔似機器整出來咁整齊；但「完美並不美」，亦因為力度不一所以整出來嘅作品都係獨一無二的

除咗可以蓋字外，亦可拎一啲有紀念價值嘅小物品來作刻印，然後將兩塊泥牌一人一個保存，係咪好有心思呢？

搓泥的部分將會有專人搓好

然後參加者就可以用 cookie cutter 將心形形狀嘅泥 cut 出來

如果想刻印小物件如戒指，就可以 cut 兩個心形，然後將小物件放在中間

再用力壓下去便可，形狀已經可以清晰可見

而蓋字的時候就記得不要太用力，因為一不小心就會連蓋章上的方形框亦蓋了出來

FLOW+ ：香港中環鴨巴甸街 35 號元創方 H207