近年不少人會考慮買部 Android PC 當作一般文書機使用，一來夠平二來用來上網或者玩玩 game 都好夠用。但如果買 Android PC，大家又要另買 LCD 顯示器，如果熒幕沒有內建喇叭，又要另外購買一套，都幾麻煩。所以近年不少廠商都有推出擁有巨型熒幕的 Android 平板電腦。Samsung 早前就推出了 Galaxy View 這部有 18.4 吋的超大熒幕平板，不過好唔好用？筆者就試了多日，現在與大家分享一下感受吧。
超巨熒幕屋企拿來拿去都幾累……
雖然 Galaxy View 是一部平板，但大到 18.4 吋的熒幕以及 2.65kg 的重量，比一部家用 Desktop Replacement 手提電腦仲要重，所以都唔好話拿出街，就算在家中要拿住四圍睇（say 在客廳睇劇途中想去 toilet，成部機拿入 toilet 邊辦大事邊煲劇），拿得多手臂都會 feel 到有少少累。所以筆者建議，大家都係當 Galaxy View 是放定定，間唔中先拿出房睇嘅 Android AIO PC 啦。
▲雖然講係平板，但係 Galaxy View 都成 2.65kg 重，好彩有個手柄先可以拿住通屋走，但拿出街筆者就建議大家唔洗諗啦。
▲皆因筆者就咁抽住一陣為影相，都覺得個右手手臂好累……
兩種放法一種睇戲一種睇書上網
Galaxy View 不像一般平板，可以攤平在桌面使用；它機背設有一個手柄，可以拿著周屋走。另外 Galaxy View 雖然唔可以攤平放在檯面，但都有兩種放法：一種是垂直放，這種放法主要是用來睇戲煲劇，又或者無線接駁手制用來打機都幾唔錯；而另一種放法就是較平角度放在檯面，這種放法方便大家用來上網搵料或者睇電子書，甚至短時間打字時用，不過筆者覺得它的斜度唔算好平，如果長時間打字，會建議接駁無線鍵盤打字會較舒服（不過需要另買）。
▲Galaxy View 基本上有兩種放法：一種是像上圖這樣打直擺，主要用來睇戲煲劇。
▲另一種放法就好似上圖咁，用較平角度放，呢種放法主要用來上網或者睇文件用。
▲當然呢個角度用來打字都還 OK 嘅，但始終角度都唔平，所以長時間打字手腕都會幾累，所以如果要打好多字，建議都係駁番個藍牙鍵盤先打啦。
超巨熒幕睇戲煲劇一流
當然，Galaxy View 最特別的地方，自然是它的巨型熒幕。它的熒幕尺寸大達 18.4 吋，用來睇書或上網絕對是浪費，拿來煲劇睇戲才是「王道」。筆者就試過用來睇 YouTube 影片，又或者睇 Netflix 的串流劇集，效果都幾唔錯。而且機身內置立體聲喇叭，而且環繞聲效果算是幾好，睇戲時幾有包圍感，但可惜喇叭開至最大聲時有點「拆」，效果一般，建議音量開至 80% 左右，喇叭就再沒有「拆」的情況了。
▲有成 18.4 吋熒幕咁大，用來睇戲就一流啦！
▲用來播 YouTube 片，畫面效果都算唔錯，清晰度算中上水平。
▲可視角度都算高，但如果較平放，會有少許顏色變淡的情況，但不算太影響觀感。
▲另外 Galaxy View 機背設有一對立體聲喇叭，用來睇劇睇戲包圍感堅唔錯，不過開至最大聲會有少許「拆」，建議最高開至 80% 左右音量就好了。
另外 Galaxy View 還內建了 Media Scroll 這個平台，它彙集了數個影片播放平台，包括：YouTube、Google Play Movie & TV、Netflix、myTV、ViuTV、香港電台及 LEGO TV 7 條頻道，基本上它有點像一個點播台，想看什麼點按就可收睇入面內容就可以了，十分方便。不過它只能放入由 Samsung 提供的頻道，用家是可能自行加入的，這一點筆者覺得是有待改進。
▲內建有 Media Scroll 這個軟件，暫時初期有 7 條頻道俾大家揀來睇。
▲當中有筆者最愛的 Netflix！
▲亦可以開 ViuTV 追睇番男兒當入樽！
▲當然亦有 myTV 啦，不過呢個筆者最少開……
熒幕只有 1080p 上網字邊唔夠 sharp
雖然 Galaxy View 擁有 18.4 吋那麼大的熒幕，但熒幕解像度卻只有 1080p，先不要說它的解像度比 Sony 的 Xperia Z5 Premium 的 4K 熒幕還要低得多，甚至與不少 Samsung 自家的 Galaxy 手機及平板所擁有的 QHD 2K 熒幕，也要低 3 分之 2。這情況導致熒幕只擁有 120ppi 的點距，當瀏覽網頁時，明顯見到文字邊緣位置會有少許化開的情況，不夠銳利。所以筆者認為如果真要上網或者睇文件，除非多人一齊睇，否則用回手機或 10 吋以下熒幕的平板會較好，而 Galaxy View 主力就用來睇戲煲劇就好了。
▲熒幕雖然有 18.4 吋咁大，但解像度就只有 1080p。
▲睇片的話還好，但如果睇文件或網頁，字邊明顯不夠 sharp，會有少許化開的情況。
熒幕少許偏藍
另外，Galaxy View 的 18.4 吋熒幕，官方未有表示它是採用 IPS LCD 還是 Super AMOLED 材質，但筆者估計屬於前者機會居多，因為如果是採用 Super AMOLED 熒幕，應該會清楚列明。至於熒幕質素方面，可視角度都算幾高，即使在側面睇，都不覺有變暗或變色的情況出現。及後筆者再用 Spyder5 測試 Galaxy View 的熒幕白平衡值，發覺數值為 7328K，有明顯偏藍情況，當然睇片時又唔算太覺（但如果睇到有藍天白雲的畫面，大家應該會覺得藍藍天空會特別搶眼……），但睇網頁時，尤其是有白底的網頁，長時間睇雙眼應該會有點累，建議大家安裝番個濾藍光 APP，就算長時間煲劇都唔驚影響雙眼視力啦。
▲使用 Spyder5 測試 Galaxy View 的熒幕，白平衡數值為 7328K，明顯偏藍。
Family Square 旅行影相屋企人即睇
Galaxy View 還加入了一項新軟件，名為「Family Square」，顧名思義它就是圍繞家庭建立的「廣場」，那麼有什麼用處？其實大家平常在街上或者去旅行，都會用手機拍下不少相片、影片或記事。平時要與家人分享，一係就透過 Facebook、Instagram 或者 WhatsApp 等社交平台，一係就唯有回家後才放到電腦或電視上一齊睇。但 Family Square 這款軟件，只要大家在手機上也安裝了相同軟件，並與 Galaxy View 配對後，大家用手機拍下的相片或影片，就可以即時 upload 到該平台，而上載完成後，家中的屋企人就可以即時透過 Galaxy View 的大熒幕欣賞得到，超級方便！另外，Family Square 亦不只限於 Samsung 手機使用，筆者手上的 LG V10 及 iPhone 6s Plus 亦能下載並使用得到。不過筆者在 V10 上使用時，間唔中都會出現彈 APP 情況，似乎穩定性有少許不足，希望未來 Samsung 可以改善一下吧。
▲Galaxy View 內建 Family Square 這個相片 / 影片分享軟件。
▲首先大家要在手機上安裝了 Family Square 這個免費軟件，基本上其他 Android 或 iPhone 手機都可以下載得到。
▲安裝完成後就進行配對，在 Galaxy View 上輸入你手機的號碼，此時手機端應已完成 Family Square 軟件的安裝並開啟軟件。
▲之後手機會收到配對請求，點按「接受」。
▲配對完成！
▲之後利用手機內的 Family Square 影相（或利用此軟件讀取用其他相機程式拍攝的相片或影片），選好想分享的相片 / 影片後按確定。
▲然後相片 / 影片就會上載到 Family Square 平台上了。
▲上載完成後，你身在家中的家人就可以透過 Galaxy View 睇到這些相片了，仲方便過上載去 Facebook 或者 IG 然後叫他們上去睇呢！
▲另外值得留意的是，在 Family Square 內的相片，還可以用來做 screensaver 架！
電量不算長建議長駁火牛
至於電量方面，官方聲稱此機可以連續使用 8 小時，但實情又是否這樣？筆者就下載了 Netflix，並將熒幕調至最光狀態，以串流模式收睇了一集《DareDevil》，發覺短短 51 分鐘內，已耗用了 19% 的電力；如果以此推算，在此使用環境下，估計 Galaxy View 應該可以使用 4 個半鐘左右。當然，筆者明白這是較極端的情況，因為筆者將熒幕亮度調至最光，而擁有 18.4 吋熒幕的 Galaxy View，熒幕肯定是最耗電的，如果大家將熒幕亮度校回「自動」的話，相信應該可以用多 1 個至個半鐘左右，亦即是 5 個半至 6 個小時，雖然仍與官方聲稱的 8 小時有少許距離，但筆者認為都算 OK 了。當然，如果大家打算用它在家長煲一日劇，最好還是長駁火牛使用，這樣就不用擔心唔夠電啦。
▲Galaxy View 是不能用 microUSB 頭充電的，只能透過隨機附送的火牛。點解？
▲一睇火牛輸出伙數達到 19V，相信大家都明白了吧？（一般手機或平板火牛輸出伙數只有 5V……）
▲至於電量方面，睇一集 Netflix 劇集（唔計片頭片尾大約 51 分鐘左右），已用了 19% 電量，基本上如果熒幕開到最光，只能使用 4 個半鐘左右。
總結：都算幾好用價錢較「晾」
整體來講，Samsung 今次推出這部 Galaxy View 平板，算是市場上比較另類的產品。當然，講最大或者第一部，Galaxy View 亦並非 number 1，但配套來說它亦算做得不錯，尤其是立體聲喇叭的包圍感，用來睇戲堅唔錯（只要不是開至最大音量……）。唯一是它的售價方面，以一部用過時規格（1.66GHz 八核心處理器、Mali-T720 圖像處理晶片、2GB RAM 及 32GB 內置儲存空間）的平板來睇，確實有點「晾」。如果售價可以下調至 3 千以下，相信會有一定吸引力。
售價：$4,598
查詢：Samsung（3698 4698）
分享到 :
最新影片
