Printer 大家就用得多喇，仲可能屋企都有一部添。平時印下文件，印吓相好多時都會用得到，咁但係大家又有冇諗過要添置一部 3D 打印機放喺屋企呢？可能大家會話「3D Printer 咁貴，買唔起囉～」、「又大部又唔識用～」、「乜唔係工廠先用㗎咩？」你哋咁諗就錯喇！香港團隊 Makeomnia 研發咗一部小學生都識砌嘅 3D Printer－TinyBoy，而且已經推出到第二代（TinyBoy 2），準備打入學界，最大嘅目標就係要普及 3D 打印技術！
3D 打印技術專利由 2006 年開始已經陸續到期，數碼港培育計劃成員 Makeomnia 其中一位創辦人 Parker Leung 當時已經睇準時機，等外國 Open Source 發展成熟時隨即引入香港。Parker 本身係一位老師，專教「設計及科技」，2011 年嘅時候已經嘗試將 3D 打印技術引進校園，當時已成功吸引一班同學仔，好可惜當時成本仍然好高，學生用起嚟一 D 都唔方便，於是萌生普及 3D 打印嘅念頭，希望可以製作一部普羅大眾都有能力負擔得起嘅 3D 打印機，長遠做到一人一機。
3D 打印合符 STEM 政策
適逢教育局將會喺今年計劃推動「STEM（科學、科技、工程、數學）教育」，而且好快會進行諮詢， TinyBoy 喺呢個時候推出就合時喇！Parker 認為 3D 打印技術正正符合 STEM 四大方面嘅教育工具，例如：科學，3D 打印採用嘅物料都有唔同種類，好似：粟米膠（PLA）、模型製作塑料（ABS）、彈性物料、混合唔同材質嘅物料等，同學需要考慮一下製成品嘅用途而決定用邊種材質；而科技同工程方面，3D 打印本身就係一個結合設計同應用嘅方案，學生可以發揮創意，自行製作成品；數學方面，製作立體嘅算式本來係高中數學嘅延伸課程部分，以前就冇將算式變成實物嘅範例，普及 3D 打印就可以將抽象嘅算術變成睇得見、摸得到嘅實物，咁就可以提早比學生發現更多嘅可能性。
小學生都識裝嵌
Parker 話希望 TinyBoy 可以降低 3D 打印門檻，等年紀較細嘅高小學生都可以自行裝嵌同操作，所以喺開發 TinyBoy 嘅時候除咗考慮到機身體積要細之外，仲要非常容易組裝，同時更加著重「教學」部分－ 3D 打印機以外嘅教學配套。Parker 多次強調俾學生接觸更多可能嘅重要性，令佢哋唔會被困喺傳統嘅「一條龍」框架入面（小學、中學、大學、打工）…… 可以鼓勵學生運用創新思維，創造更多嘅可能性。
Makeomnia 而家已經同好多學校傾緊合作，推出更多 3D 打印技術嘅宣傳同推廣，而且亦開始有學校主動搵佢哋合作，例如舉辦砌 3D 打印機活動。Parker 話預期 STEM 正式課程推出嘅時候，可以為 TinyBoy 帶嚟更大市場。
Leave a Comment