天恩前排上網買咗起晒角嘅硬殼背囊返黎，籮文見個款咁型，梗係要試下啦！Solid Gray，荷蘭設計師操刀，荷蘭本土製造，除咗外型獨特，仲以環保為大前提，使用可回收再造的單層工業用聚丙烯（PP）摺成一個背囊，超有科幻感。想知有幾型，就要閱讀以下文章啦！
官網訂購・等送貨・開箱！
唔好以為 Solid Gray 叫做 Gray 就淨係得灰色，其實仲有黑色同白色，天恩就覺得白色難襯，黑色又有個鐵喺中間，感覺太粗爌，所以就訂咗灰色。而且灰色唯一可以見到 (Wireframe) 線條 (做 3D 的人應該明我講咩) ！除咗個袋身可以揀顏色，袋帶都有5種顏色揀。上官網買 Solid Gray，計埋四百幾蚊運費，灰色同白色就要 HK$1,865，黑色就再貴啲，俾咗錢大概都要等返 3 個星期左右先送到黎香港。送到黎，用家要自行將揹帶扣上袋身，而扣位非常隱閉，籮文都研究咗一陣先至扣到。
▲唔好以為 Solid Gray 叫做 Gray 就淨係得灰色，其實仲有黑色同白色，除咗個袋身可以揀顏色，袋帶都有5種顏色揀。
▲唔講咁多，開箱先！
▲隨箱附送一個防塵袋
▲再開袋，先至見到個背囊，還貼著一些防花的保護貼
可更換不同顏色揹帶
籮文都提過官網有不同顏色的揹帶，其實佢有一個彈弓扣的設計，可以將唔同顏色的揹帶扣上，甚實左右兩種不同顏色都可以。
▲送到黎，用家要自行將揹帶扣上袋身，而扣位非常隱閉，籮文都研究咗一陣先至扣到。
有林寶堅尼 Feel 不過 遠睇誇啦啦 近睇…
對於汽車愛好者籮文，Solid Gray 俾我第一個印象就係好有林寶堅尼 Feel。依個「盔甲」由設計到生產都係於荷蘭進行，每個 Solid Gray 背囊都以單獨一塊單層聚丙烯切割再摺疊而成，籮文做過 Research，單層聚丙烯（簡稱PP）係一種高密度、耐潮濕、耐腐蝕、耐蟲蛀的一種塑料。
咪以為背囊上嘅白色線係印刷出黎，其實係摺痕黎架。見個外型三尖八角，唔好以為得個樣，其實佢嘅形狀都係經過計算，以達到最堅固嘅形態。不過講真，籮文就真係覺得感覺上無視覺上咁硬淨，物料有d似試前d 膠造的「考試盒」一樣，唔似 Rimowa Limbo 果d 硬度，不過勝在輕。
▲對於汽車愛好者籮文，Solid Gray 俾我第一個印象就係好有林寶堅尼 Feel。
▲每個 Solid Gray 背囊都以單獨一塊單層聚丙烯切割再摺疊而成，咪以為背囊上嘅白色線係印刷出黎，其實係摺痕黎架
▲籮文就摸過實物就無視覺上咁硬淨，物料有d似試前d 膠造的「考試盒」一樣，唔似 Rimowa Limbo 果d 硬度，不過勝在輕。
個款就夠晒型，實用性又如何？
Solid Gray 用上可以百分之百回收再造的單層聚丙烯材質，官方表示有效減輕背包重量同時可以保持強韌耐用，背囊頂有手挽，籮文拎過上手，重量其實同其他背囊相差不多。只要將袋面接近頂部的兩塊機關向上撥就可以打開背囊，打開之後，你會發現佢相對上比較似一個硬殼迷你喼多過一個「背包」。
唔似傳統背囊，打開咗 Solid Gray 就一目了然，裝咗啲乜 一眼睇晒，大頭蝦搵嘢就唔使反轉個袋先搵到。背位有一條 Y 字型束帶，最大可以裝到 15.6 吋嘅筆記型電腦，如果你部筆電細過15.6吋都唔怕佢會跣黎跣去，因為背囊裡面底部有塊海綿，就算籮文放部 MacBook 入去都可以穩定到。入面仲有幾個暗格俾放比較細件嘅「蠟雜嘢」，包保背囊入面井井有條。
▲背囊頂拉出來手挽位
▲拉開來就可以用
▲背囊重量為 976 克，同大部份傳統背包比較，其實只係重10% – 20%。不過講真，個款咁型，又有邊個會介意重一兩成？
▲只要將袋面接近頂部的兩塊機關向上撥就可以打開背囊
▲非常 Cyber 嘅打開方式，就好似太空船打開駕駛倉一樣。
▲背位有一條 Y 字型束帶，最大可以裝到 15.6 吋嘅筆記型電腦，如果你部筆電細過15.6吋都唔怕佢會跣黎跣去，因為背囊裡面底部有塊海綿，就算籮文放部 MacBook 入去都可以穩定到。
▲另外有多個收納空間，袋蓋的內面可以夾住一啲報紙或雜誌等
▲背蓋與袋身之間又有兩個收納空間，適合放鎖匙、耳機等小物品
三尖八角 舒適度又係點呢？
一直都係 Show 個外型俾大家睇，三尖八角，係咪好想知揹上背係咩感覺呢！Solid Gray 嘅背板就係一塊平板，可能你望落會覺得好唔舒服，但揹上背先發覺 Solid Gray 背板硬淨得黎都有一定嘅彈性，比想像中舒服，不過用得耐真係都會熱，夏天日子唔太適合長時間用。但硬殻都有啲壞處嘅，籮文依啲粗人，平時放嘢入袋就咁掟入去就算，但係用 Solid Gray 就要輕輕力放入去，亦都要小心尖角位割親手。背包低有兩粒「膠腳」，方便你「挨」係牆，但都要小心放驚刮花。
▲Solid Gray 嘅背板係一塊平板，不過有彈性，舒適度還可
▲低部兩粒「膠」方便放牆邊時不會跣低。
籮文：「堅係型 但實用度就一般」
外表就非常突出，不過實用度就真係一般般，始終傳統背囊儲物量比較有彈性，只要放晒啲嘢入去，夾硬拉到條拉鏈就 OK，但係 Solid Gray 礙於形狀同材質所限，入得晒就入得晒，入唔到就 bye-bye。而且經過籮文觀察，依種質料都係比較容易割花。建議真係日常返工返學輕用才合適，旅行或長使間使用就唔太好，一來膠貼背有點熱，二來搭車會頂住背部唔可以「挨」落牆。如果要以實用性去評分，Solid Gray 應該唔合格，但係佢外型已經深深吸引到籮文，實用性已經被我拋諸腦後，夠型未得囉！
售價：約HK$1,865 (未連運費)
