落咗幾日雨，經過一大班店主的努力，各區的年宵係今日開市啦！我依莉詩就梗係第一時間去全港最大、最多創意產品的維園，行過大運，順便搜羅得意精品話比大家知啦！
美食篇
雖然呢排天氣時晴時雨，不過店主們都好似無懼產品會淋濕，反而因為天氣凍，設計咗唔少充滿創意又實用的 cushion，攬枕等，希望過個肥年。當中以食物做主題的亦佔了不少攤位。
1) 凸出街市
舊街市愈來愈少，唔少人都記掛行街市叫賣的情景，估唔到就係年宵出現！一舊舊的五花腩、三文魚扒掛係到等人揀，下面仲有一籮籮大菇、薯仔、白菜擺晒出嚟，加埋店員的落力推銷。真係成個街市咁！
年宵攤位：154號
▲ 馬里奧變大菇、薯仔、百財聚寶白菜等鎖匙扣有大有細，個個的圖案都唔同，像真度都幾高架！
▲ 每到年尾都要買 D 五花腩壓年，擺咗幾日都唔知食唔食得。有咗呢舊五花腩 cushion 就唔怕會變啦。
2)煎釀三寶
就係凸出街市的隔離，咁啱有檔賣煎釀三寶。平時乾貨攤都以學生老闆為主，一嚐賺第一桶金的滋味，但呢檔就由幾位有正職的成年人為追夢而搞。雖然魚肉釀茄子同三色椒 cushion 的外型麻麻，不過檔口設計就好有心思，可以去睇下啊！
年宵攤位：153號
▲ 魚肉釀三色椒，睇到都流口水！
3) 燒野家
講得食物又點少得日式街頭小食。呢間就售賣近期流行的鯛魚燒雪糕，上面仲可以自己加威化條同 M&M，幾可亂真。另外，仲有叮噹最鍾意的豆沙包同大大粒的章魚燒添！
年宵攤位：172號
▲鯛魚燒雪糕 cushion 可以黐上威化條同 M&M 等配件，等佢成為獨一無二的鯛魚燒。
▲ 章魚小丸子 cushion 成個波咁，冬天攬住夠晒暖。
▲ 豆沙包雖然唔係百寶袋，不過打開都會變張被出嚟架！
4) Thisway
平時去 Subway 買三文治，就係叫 This this this this 然後 yes 就埋單。去呢間 Thisway 就唔怕啦，個個店員都係靚仔大學生，青瓜、煙肉、蕃茄、芝士乜配料都有得揀，實配到個啱心水的包，可以食飽飽。
年宵攤位：167號
▲ 配料有厚有薄，可以係毛巾、座墊同 cushion，全部都可以獨立用。
▲ 呢個三文治真係夠晒足料青瓜、煙肉、蕃茄、芝士樣樣齊，想一啖咬落去似乎有難道。
潮語篇
除咗食，以潮語做題材的產品都係今年一大重點。如果你睇得明，又覺得有共鳴的話，9成就同小編一樣係不折不扣的香港人。
5) 懷舊兵室
讀書、上莊、住hall、part-time、拍拖基本上係每個大學生都必做的事，但急住出 pool，好多時變咗兵仔兵女都唔知。而呢檔就係由 14隻兵仔兵女合資而成，產品設計亦投入咗佢地唔少心聲，就好似 3款以兵仔出 Pool 做主題的毛巾，就充份反映咗做兵的無奈。
年宵攤位：118號
▲ 唔通真係要會數碼世界先可以變成食女獸？
▲ 唔通蓋住毛巾就可以變超人？唔知買咗，新一年又係咪可以成功出 pool 呢？
6) 吾好猴擒
呢幾個大學生同樣用潮語做咗幾個 cushion，上面的「做咩啫你」、「搵食啫」、「Sor9ry」再加個奸笑圖案，好抵死呢！
年宵攤位：82號
▲ 店主哥哥講解比我聽個呢對「啪啪啪」暖手套的設計意念時，自己紅都面晒啊！
7) 他媽歌詞
「你快樂過生活，我拼命去生存」呢句歌詞相信講出唔少人的心聲。呢 D 廣東歌的歌詞印係毛巾度，唔知會唔會令係沖涼時忍唔住唱番兩句呢？
年宵攤位：97號
▲ 你又知唔知「陪著你走，一生一世也不分」係邊首歌的歌詞呢？
8) 理大勵志堂 x 新年賣乜狗
當你睇到隻叼住樹葉的樹熊，應該好自然想加叫「唔 L 係掛」。呢系列的攬枕有正負兩面，一面笑面迎人，另一面反晒白眼，就好似做人一樣，唔通心入面話緊你會話你知咩。
年宵攤位：87號
▲ 樹熊同八哥攬枕一面笑面迎人，令一面原來連中指都舉埋。
潮爆可愛篇
每年年宵，該年的生肖產品都會特別多，但今年除咗 emoji 馬騮 cushion，好似唔多見有其他猴年產品，反而我見到一 D 可愛造型的產品。
9) Skyleproduction
今年芝士撻大熱，唔止過江龍係香港開分店愈來愈多，就連 cushion 都出埋。雖然唔講仲以為係蛋撻，不過有坤哥加持，仲唔大賣？
年宵攤位：209號
▲ 買芝士撻會送埋一套魔術貼五官，等你隨時幫佢變身，變迷你兵又得，變B. Duck又得，得咗！
▲ 呢隻香蕉船上面有 3隻馬騮仔，你可以自己黐 D 魔術貼英文字去佢地個身到。新年自用又得，情人節表白又得，得咗！
10) Pandaluv
年宵好多時都係學生第一次自己設計產品，第一次自己賣。而 Pandaluv 的團隊唔止年宵，設計就係佢地的職業。今年佢地就以自家設計的卡通熊貓做藍本，製作會帶來好運的達摩 cushion ， 希望新一年賺過盆滿砵滿。
年宵攤位：21號
▲ Pandaluv 達摩 Cushion 打開係張被，既可愛又實用。
出發前用手機睇定先！
行年宵幾乎係每年的指定動作，不過有時人多到根本睇唔到 D 攤位係賣乜，而今年就有個叫 Boutir Collect 的App 嘗試將 O2O 的概念引入年宵，等大家出發前就可以睇到每一檔有咩賣，從而一擊即中。
▲ Boutir Collect 好似一般 Online Store App ，不過佢就有個專 for 維園年宵的特輯，俾店主可以 up 佢地的產品上去。而我地就可以事先入去個 App 做足功課，睇清楚貨品資料先血拼，更特別的是，佢有埋維園年宵地圖，咁就唔怕多人到蕩失品啦！
▲我今日晏晝睇過，係總共 294個乾貨攤入面，目前已經有 190檔的資料，數目仲不斷增加咁添，資料都幾齊架！
▲每一個攤檔都有得「Follow」、「Collect 」的功能，睇啱就可以儲定到時去。另外，有部分攤檔提供網購服務，可以直接用 Paypal 俾錢。萬一年宵錯過咗無買到，之後仲可以上網買番添呀！
分享到 :
最新影片
