開工利是呢 D 嘢，雖然話係求個意頭，寓意開工大吉，一團和氣，生意興隆，但封得多又肉赤，封得少又太寒酸。今日就等我建議幾個又有體面又可以慳錢的派利是方法啦！
嗱～開工利是就唔一定派派一樣嘅，最緊要就係收得多個個收得開心，收得少個個條氣又順咁，所以抽獎都未嘗唔係一個好方法。最起碼隔離公司唔會八到你派 $10 咁少嘛，仲可以好大方咁話俾人知有十分一人抽到千元大利是添！
講運氣梗係唔少得六合彩利是啦！Cheap Cheap 地半注 $10 就搞掂，嗱～彩就俾咗你，你唔中係你唔好彩咋！不過唔想俾員工係背後咒罵，都係入多張 $20紙安全 D。
抽獎當然現金拎係手就最好啦！不過，如果你係大企業老闆，自問員工多到派唔切，又或者有員工係海外的話，可以試下派電子利是。其實微信的「新年紅包」或者支付寶的「新年討喜」係上年已經係中國好流行，唔少人都會想盡辦法抽多 D 利是，不過香港就用唔到。而今年東亞銀行就推出咗「i利是」，同樣要將手機 Apps 同電話號碼「綁定」，就可以遙距派利是，仲可以一次過派俾 10個人添！
唔想個個員工都派一樣金額，可以揀外表一樣的送禮物卡，就好似 iTunes 禮物卡 或者 Google Play Gift Card 咁，面值有大有細， $200、$500 和 $1,000 都有，咁就算佢地即刻拆利是都唔會尷尬嘛。
想靜靜雞慳錢，可以選擇現金券或者餅卡，因為大批多數有折，而員工收到又可以用嚟買嘢或者轉贈俾朋友。其實依家現金卷的種類好多，想平的可以係靚湯券、雪糕卷，$50內有找，要貴的可以亦都可以過千，例如盆菜券、乳豬券，豐儉由人。
如果公司有班工作狂，不妨送戲飛、主題公園入場券，甚至船飛、機飛等，鼓勵佢地放鬆下。平有平送，貴有貴送，最緊要員工覺得你貼心。而佢地放鬆完，精神好咗自然會回饋番公司，一舉兩得。
送自助餐券同現金券道理差唔多，都係因為大批多數有折，不過自助餐券就有多一層意義，就係可以俾員工有個聯絡的機會，齊齊食一餐。
有時遇著個頂心杉，又明知佢唔留得耐，真係唔想派利是俾佢。呢個時候，為表自己唔係方丈，可以選擇以員工的名義將某個金額捐贈到公益金等慈善機構。嘩，當佢收到張入數紙仲唔感動到喊出嚟。
其實開工利是都係討個吉利，大可以封 1蚊美金，寓意「一元復始」，新一年順順利利。
如果真係好唔鍾意個員工，連 $1 都唔想封，我有個好提議。就係放張 Mon 貼係入面，話俾佢知「我依家當你透明架啦！你最好同我自動消息。」
PS：講咗咁耐，作為員工的小編我，就梗係想收到現金大利是啦！
