近排天氣咁凍，唔係心思思打邊爐就係想食煲仔飯，但有時窩居細到連廚房都無可以點？依莉詩最近搵到個「懸浮飯煲」，唔單止可以煮煲仔飯，仲可以煎、炒、煮炸都得，一個煲就煮到餐飯，夠晒慳位。
18 般武藝集於一身
依家 D 飯煲多功能愈來愈多，價格亦可以上到成萬蚊。今次呢個「懸浮飯煲」4千幾蚊，但同樣 18般武藝樣樣得，佢，內置 18種個功能，包括：煮飯、煮五穀米、煲仔飯、炆、燉、豆類、燉蹄筋、滷水 、無水焗、烘烤、煲湯、粥、BB粥、蒸、意粉、 蛋糕、炸煎 及 酸奶。就算好似我呢 D 唔識煮餸的，放晒 D 材料落去襟個掣，都一樣可以日日唔同款。而且有埋 24 小時預約，番工前放晒材料入煲，夜晚就有靚湯飲。
▲ 點解要叫「懸浮飯煲」呢？因為佢的懸浮式設計 (按落去彈彈下咁好搞笑) 聚熱能量非常高，就算關掉電源，食物的溫度亦不會突然驟降。
▲ 飯煲的內膽係鋁金屬製作，厚 3mm，除了唔黏底，仲可以承受酸性食物的挑戰，甚至煲薑醋。
▲ 如果覺得唔夠用，可以額外購買 304不銹鋼內鍋，據說用來油炸、炒煮或煲湯會有更佳效果。
一鍵煲出真 ‧ 煲仔飯
電飯煲煲出靚飯太基本，見佢有個「煲仔飯」功能當然要試下。但估唔到真係勁方便，用正常的水、米比例，只要揀選「煲仔飯」模式，飯煲就會自己以適當的時間同爐溫去煮。45分鐘之後，熱辣辣，而且有脆卜卜飯焦的煲仔飯就食得啦！
▲ 煮煲仔飯都係用同平時一樣的水、米比例，只係加咗 D 臘腸同蝦米。
▲ 揀好模式，開始加熱的時候，唔知點解飯煲四周霧晒煙，真係嚇死我。(後尾有人同我講，原來係我塞唔實條膠邊所以咁呀！下次要注意番先得！)
▲ 不過 45分鐘之後，香噴噴的飯就食得啦！飯心仲好軟熟。
▲ 煲底仲要有金黃色的飯焦，卜卜脆，啱啱好。
煎炒唔黐鑊
既然煲好飯，我就試下炒餸。雖然我平時對住個爐就會好騰雞，但今次用「烤烘」模式，調校到 185度，15分鐘，就可以打開個飯煲落油炒。可能唔洗 hold 住隻鑊，點搞 D 餸都唔會飛出嚟，成件事簡單咗好多，而且點炒都唔黐底，好啱新手用。
▲ 雖然打開蓋炒，但火力好夠，好快 D 餸就熟。
▲ 飯煲入面送咗本食譜，我揀咗雜蔬烤牛肉嚟試。當然，我呢 D 新手梗係係超市買醃好的牛肉片啦！
▲ 係咪炒得似模似樣呢？
油溫夠高，炸出茶餐廳風味
炸嘢都係好簡單，用「油炸」模式，調校到 185度就可以炸。油溫好快就夠高，炸出嚟的雞翼同薯條色澤都好均勻，而且唔會點彈油，其實都幾好。不過就因為內膽係平底，要用好多油。
▲ 同樣我都係用預先醃好的雞翼，咁就實無死。
▲ 其實都唔洗用到 185度，炸炸下爐溫可能太高，開始彈油，要降低番個溫度先有好轉。
▲ 因為內膽係平底，要用好多油。我就係因為唔想浪費咁多油，選擇用筷子反薯條令佢炸得好 D，結果就彈到隻手了，嗚嗚…
▲ 估唔到炸雞翼仲危險，今次仲彈到塊面，嗚呀，工傷呀！！！
▲ 唔知係咪我技術唔太好，炸出嚟好似太油。
▲ 不過雞翼就好均勻，好有茶餐廳風味。
拆件清洗唔怕萬年污漬
成日聽人話，煮嘢唔難，洗嘢難。特別呢個煲煮乜都得，一定彈到四周油，好彩係好似模型咁，好多部件都可以拆卸清洗，咁就唔怕萬年污漬。不過咁講，雖然係比起普通飯煲易清潔，但如果要炸嘢，而又有地方的話，都係用鑊好，始終 D 油都會彈到個主體，而個主體又唔可以沖水洗，一度令到我好煩惱。
▲ 蓋板有螺母固定，扭出嚟就可以將整個蓋板拆出。
▲ 膠邊可以輕鬆咁拆出嚟洗，但問題就係，煮好飯之後，因為冷縮熱縮，膠邊會成條甩出嚟。
▲破泡器同樣可以拆出嚟洗。
▲ 呢個位可以拆件，咁就唔怕 D 倒汗水塞晒係入面。
▲放倒汗水的格都算大，唔怕煮太耐會滿瀉。
依莉詩短評
電飯煲焗蛋糕已經 out 咗，原來依家一個煲可以做到咁多嘢。雖然 4千幾比起普通飯煲貴，不過如果 D 窩居細到連廚房都無，又唔想日日出街食，都係慳錢方法。而對於我呢個入廚新手，呢個煲又唔黐底，炒嘢個陣又唔洗 hold 住隻鑊，點搞 D 餸都唔會飛出嚟，成件事簡單咗好多。我覺得好好用呢！
Homey 廚王烹調機
售價：$4,388
查詢：滙天 2340 0951
Leave a Comment