朱古力迷有口福！ Billy 實試海港城 Chocolate Trail Café 及精選四大必買

作為一個朱古力迷，係香港的確已經有唔少國際品牌比你揀；但「選擇」呢家野，又點會嫌多嘅呢？由即日起至 2 月 21 日，海港城舉辦年度大型活動「Chocolate Trail 情．尋朱古力」：既帶來 12 間國際朱古力品牌期間限定店，亦首設 Chocolate Trail Café ，可以話係朱古力迷嘅福音啊！今次就由 Billy 我帶大家去睇下  Chocolate Trail Café 到底有邊幾樣係必試，同埋為大家精選五間必買嘅限定店啦！

首設 Chocolate Trail Café 多款特色朱古力 Tasting Menu

首設嘅 Chocolate Trail Café 推出嘅特色朱古力 Tasting Menu 包括咗朱古力同威士忌、紅酒、中茶、西茶、咖啡以及特色飲品嘅配搭，相當之有趣。而且仲特地請來著名品酒認可導師李凌霄先生為意大利朱古力品牌 Domori 及法國朱古力品牌 zChocolat 配上唔同口感同味道嘅威士忌。

有咁多種特色朱古力配搭，而本身係 alcoholic 嘅小編最推介嘅當然係威士忌搭配！我個人就十分推介 SMWS 27.109 呢款，包括咗 Domori 嘅 Lattesal 同埋 zChocolat 嘅 White Z Chocolate 。 Lattesal 係由厄瓜多爾製成嘅牛奶巧克力配上法國海鹽，甜味與鹹味之間平衡唔錯；至於 White Z Chocolate 亦係甜咸嘅配搭，甜係來自焦糖，而咸嘅部分就係馬達加斯加嘅波旁香草，入面嘅果仁就係 Piedmont 榛子慢烤而成。與威士忌配搭亦只係需要 $60 ，其實價錢亦相當合理！不過若然唔鍾意飲酒的話，可以選擇 Chapon 嘅 Feve De Cacao 配搭 Pacific Coffee 嘅哥斯達黎加豆製成嘅蒸餾咖啡：咖啡嘅甘甜焦糖同朱古力嘅可可﹑果仁取得平衡，均勻咗可可豆嘅質感，呢款價錢只係為 $30 。

精選四大必買朱古力品牌限定店

試完特色朱古力，當然就係要瘋狂咁掃下海港城嘅朱古力店。今次更有 12 間期間限定進駐嘅國際朱古力品牌，小編就為大家搜羅咗四間必買嘅限定店，去到海港城就唔洗咁頭痕試邊間好啦！

1. Domori

啱啱係 Chocolate Trail Café 已經推介過嘅 Domori 就係小編嘅首選啦！意大利品牌 Domori 首次來港設店，佢嘅朱古力都係選用世界稀有可可豆品種 Criollo ，用 bean to bar 技術去做出最頂級朱古力。被獲名為「2015年全球最佳品質朱古 力製造商」嘅 Domori ，絕對係朱古力迷嘅朝聖第一站啦！

2. Z Chocolat

第二站就係來自法國嘅 Z Chocolat 。由法國傳奇朱古力大師 Pascal Caffet 親手設計創作嘅 Z Chocolat ， 無論產品定包裝都仿佛藝術品咁，最 signature 嘅當然就係佢嘅名貴桃花心木木盒盛載朱古力，每個木盒均由法國工匠親手製作 並且刻有獨立號碼，係咪好獨一無二呢？至於朱古力方面，鍾意黑朱古力嘅小編就強力推介 z 雙層夾心黑朱古力；而鍾意較甜嘅朋友，店員分享話榛子杏脆牛奶朱古力牛奶亦係唔錯選擇！

3. Chapon

Chapon 最先吸引小編嘅唔係佢嘅朱古力，而係佢童話故事般嘅盒子。而佢嘅朱古力唔單只口味選擇豐富，而且形狀亦相當多變。而且佢唔單只可以買現成朱古力，更可以買朱古力粉自己返屋企慢慢整。嗱，佢嘅外形咁討好，女仔收到實會好鍾意，各位有女朋友嘅男讀者係情人節識點做啦！ XD

4. Frederic Blondeel

來自比利時嘅 Frederic Blondeel ，係由曾獲多個獎項嘅朱古力大師 Frederic Blondee 主理，由烘培可可豆到製作朱古力都一手包辦嘅少數品牌。包裝仍然精緻，但佢更著重係朱古力嘅內涵上。小編最推介大家試嘅係愛爾蘭咖啡松露，不過鍾意甜啲的話可以揀焦糖杏仁黑松露或者香脆榛子黑松露。

同場加映：兩大明星曲奇 – Homie Cookies 和鋒味曲奇

食得多朱古力，都總會食到有啲膩；係呢個時候最好就係轉轉環境去食下曲奇！今次進駐海港城嘅仲有兩間曲奇店，包括由鄭欣宜主理嘅 Homie Cookies 同埋謝霆鋒嘅鋒味曲奇。佢地都係首次進駐海港城，而且兩間位置都係痴埋一齊，買完 Homie Cookies 行幾步就可以順便買埋鋒味曲奇！

Homie Cookies

 

鋒味曲奇

影相打卡：朱古力雕塑展

除咗食同買之外，亦都可以選擇睇朱古力雕塑影相打卡嘅！今次朱古力雕塑展由獲得「2015世界巧克力大師賽」第三名嘅香港半島酒店朱古力大師 Marijn ，以「Welcome to the Jungle」熱帶雨林為主題創作兩件全新作品；以及來自香港，同樣參加「世界巧克力大師賽」十強嘅香港 JW 萬豪酒店糕餅廚師霍耀文創作三件作品，包括得獎作品「Avian Inspiration」。

Billy 點評

嚟緊唔夠兩個星期就新年，唔夠一個月就到情人節，兩者有咩共同點？就係送禮總係走唔甩朱古力。不過成日送黎送去都係金莎 ﹑ GODIVA 同 Agnes. b ，年年都咁係人都會食厭。今次海港城引入 12 間國際頂級朱古力品牌限定店，為各位鍾意朱古力嘅朋友提供相當豐富嘅選擇，而且價錢亦比現時香港已設有嘅國際朱古力品牌相差不甚遠；加埋有 Chocolate Trail Cafe ，帶女朋友或者一家大小嚟試朱古力同影相，真係一個幾唔錯嘅選擇！