以前想係金鐘食 D 平平地又有質素的嘢好難，自從上個月 M記概念店推出自助沙律後，最近就輪到 7-Eleven 概念店開業，而且仲針對愛健康同創意的 OL 推出了唔少食品。今日我依莉詩就親身去品嚐一下。
有位座唔洗再立食
7仔有熟食其實唔係咩新嘢，不過位於力寶中心呢間概念店集 Café 同便利店於一身，係 1,400呎的店內，設有室內同室外座位，並提供 30分鐘的免費 WiFi服務，買完嘢可以坐底慢慢食。亦因為概念店走時尚型格路線，所以裝修上一改紅、綠、白的元素，轉以黑、啡色為主調，配合昏黃柔和燈光 及 木系餐桌，令感覺倍感舒適。不過唔講真係以為自己去咗另一間連鎖 Café。
▲ 店內設有座位俾人慢慢坐，終於唔洗再立食。
▲ 戶外的坐位寧靜，我去到的時候有唔少人係度傾生意，所以盡量影部份無人坐的位置俾大家睇。
新鮮食品更具特色
對於我呢 D 經常走來走去的窮人，7仔的撈麵、三文治絕對係救命之選，但係得金鐘番工，食頹餐都要頹得健康、頹得有質素，所以呢間概念店就推出了多款獨家美食。
1) 飽肚之選－自選 Noodle Bar
如果肚餓想入嚟食撈麵，要講聲 Sorry，因為呢度提供的是高級版 Noodle Bar，麵底變成日式拉麵、烏冬、米線及韓國水晶粉 4款，湯底就有雞湯、蕃茄湯同期間限定湯底選擇，最低消費 $28。你仲可以加配 20款配料，當中包括瑞士雞中翼、泰式香茅魚餅、越南扎肉、溫泉玉子、日式叉燒及韓國泡菜等每款配料由＄5－＄10不等，豐儉由人。
▲ 比起撈麵，呢度的確有更多選擇，不過 3餸麵加嘢飲，一餐都成 $50-60 架！而我特別推薦韓國水晶粉，麵條彈牙又特別，最少唔似烏冬、米線咁大路。
▲ 幸好就算咩都唔加，淨麵都有 D 雜菜跟埋，我呢個非金鐘人都總算食得起。不過值得一讚的是，湯同麵係分開裝，一來唔怕淋晒，二來怕熱又想速食就可以落少 D 湯。
2) 港式小食新創意－黑松露腸粉
呢度都有港式小食，不過腸粉唔再落甜醬咁簡單，黑松露腸粉 同 海皇醬腸粉 聽落就夠番貴氣，味道亦非常特別，鹹鹹香香的醬汁配上白滑腸粉，每份＄25，連飲品。另外，店內仲有特大魚蛋 同 蕃茄湯通粉等創新港式小食 ，等你有一早就可以食到個與別不同的早餐。
3) 咖啡師調製－即磨咖啡
7仔有即磨咖啡唔係咩新鮮事，現時全港已有超過 180間 Daily Café，不過今次概念店引入專業級半自動咖啡機磨咖啡豆，仲專誠聘請兩位駐場專業咖啡師即場調製，手打牛奶同即場拉花都無問題，以 $22－30一樣來講，夠晒誠意！
▲ 三兩下手勢咖啡師就調製出一杯香濃的咖啡了。
4) 甜心之選－3.5 牛乳軟雪糕
唔知由幾時開始，7仔再無軟雪糕賣。今次見番久違了的 7仔軟雪糕真係好驚喜，而且仲係用日本特選3.5牛乳製成，香濃牛奶味的軟雪糕配上香脆 waffle cup，完全升晒呢！我指…個價錢，承為 $25 杯。
▲ 除了普通軟雪糕，1月28日起仲有兩款 $35 的雪糕甜品登場，係凍冰冰的牛奶軟雪糕上淋滿咖啡，睇住雪糕慢慢溶化，好有藝術感！
▲ 另一款雪糕甜品同樣以牛奶軟雪糕就主角，配合暖笠笠的朱古力 Brownie ，一冷一熱，口感同味覺都有極大的刺激。
5) 美好的開始－新鮮焗製牛角包
唔少人都會係 7仔買麵包、三文治做早餐，概念店亦特意推出獨家口味的三文治，例如醃牛肉、香芒咖喱雞等等。同時，每日 8點、11點同兩點半都會推出係店內新鮮焗製的牛角包或丹麥卷等麵包。
▲ 三文治同其他分店的豐富，所以價錢都貴接近一倍，$13-16一件，加 $10 可配果汁或加 $12 配咖啡。
▲ 為迎合愛健康的 OL，我發現到日式枝豆配拉差蛋黃醬 ($18) 同 水耕菜苗 ($15.9)，成杯即食，夠晒健康。
▲ 店內有個暖櫃，朝早為滿麵包，而下午會放暖湯等，等人唔洗叮都可以有暖笠笠的食物。
6) 健美之選－燕麥乳酪杯
對於愛健康的人，蔬菜同三文治未必足夠。概念店推出了草莓、藍莓及蘋果 3款口味的燕麥乳酪杯 ($28)，加上略帶嚼勁的穀物片，幫助腸道消化，愈食愈健康。
7) 宵夜最愛－獨家小食
雖然有好多熟食，不過 7仔離不開便利店的形象，有多款零食、飲品選擇。而概念店更新增唔才有機的佐酒小食同特色啤酒，等大家宵夜啤一啤。
▲ 雪櫃內有好多未見過的啤酒品牌，俾追求新鮮的人慢慢試。
▲ 有機零食係佐酒的好選擇。
依莉詩後感
7仔同 M記都係平民食堂，但嚟到金鐘就變成高級版概念店，食物的質素同價格都相應提升。以小編我呢個非金鐘人可能唔太明白，亦覺得 $28個淨麵有 D 貴，更唔會成杯枝豆當早餐。不過的確睇得出概念店係裝修、入貨同食物上都花咗唔少心思，針對上班族個種熱愛寧靜、創意、健康的需要，以我所見，店內有唔少上班族係到食牛角包嘆咖啡呢！
7-Eleven概念店
地址： 金鐘力寶中心1樓2B舖
營業時間：星期一至五 07:00-21:00、星期六 07:00-17:00、星期日及公眾假期 休息
Leave a Comment