籮文：「影相有大光圈及OIS 中價機旗艦味」Samsung Galaxy A5 及 A7 初步評測

2016-01-12

Published by

籮文

Samsung A 系列主打高性價比，上年推出過 A5, A7，今次推出的 A5, A7 的 2016版規格大致相同，只係擁有不同尺吋的 1,080p 全高清屏幕，也配備八核心處理器、QuickCharge 充電、指紋解鎖等，想知有幾抵玩就要繼續閱讀以下文章！

旗艦級玻璃金屬雙工藝機身

雖然 A5，A7 2016版都係中價機，但貫徹 A 系列高性比嘅特點，今次 A5，A7 2016版機身用到平時只會於旗艦機（即 Note 5、S6等）上先會見到嘅玻璃、金屬雙工藝機身。邊框用上金屬材質，造工精細，斜邊切割令光線折射更閃亮，而機面及機背都有 2.5D 玻璃面，機身更圓渾，上手感覺絕對有旗艦級的手感。A5 設有金及黑色，而 A7 則會配備金、粉紅金及白色，籮文手上就有部黑色 A5 同粉紅色 A7 ，我就比較喜歡黑色夠高貴又有神秘，而依莉詩見到部粉紅色就即刻心心眼。

▲今次 A5，A7 2016版機身用到平時只會於旗艦機（即 Note 5、S6等）上先會見到嘅玻璃、金屬雙工藝機身。

▲機面及機背都有 2.5D 玻璃面，機身更圓渾

▲邊框用上金屬材質，造工精細，斜邊切割令光線折射更閃亮，機底可見喇叭、MicroUSB 位及耳機位。

▲左側有音量鍵

▲兩部機上手感覺上大細差不多

5.2 及 5.5 吋 1080p 屏幕

雖然有 Note 5 同 S6 嘅影子，但屏幕就由 2K 變成 1080p。A5 擁有 5.2 吋屏幕，而 A7 則有 5.5 吋，不論 A5 定 A7，屏幕像素密度都有 400 ppi 以上，細緻度非常唔錯，以「聞 Mon」距離閱讀都唔見有起格情況，而色彩都非常 Sharp，尤其 Samsung 原裝介面顏色運用都好豐富，令屏幕更搶眼，而兩部機屏幕都有 2.5D玻璃面，令畫面睇落勁有立體感，好似浮出黎咁。另外，兩部機都支援「螢幕模式」選擇，自動跟據情景優化屏幕飽和度及對比度等，但係就冇得自訂屏幕色溫。

中價機都有指紋解鎖

兩部機都加入 Home 鍵指紋感應器，提高手機的私隱保安。籮文試過，雖然登記指紋需時比其他手機長，需要按壓廿幾次，而且指紋登記數量都比其他手機少，只可以登記三隻手指，但係解鎖速度同準繩度都十分高，可以話係一勞永逸。仲有一個以指紋網站登入功能，可以使瀏覽器記住用家嘅 ID 同 Password，下次只要按一下指紋就登入，但係依個功能就只適用於手機原生瀏覽器。

▲解鎖速度同準繩度都十分高

▲雖然登記指紋需時比其他手機長，需要按壓廿幾次，而且指紋登記數量都比其他手機少，只可以登記三隻手指

▲仲有一個以指紋網站登入功能，可以使瀏覽器記住用家嘅 ID 同 Password，下次只要按一下指紋就登入，但係依個功能就只適用於手機原生瀏覽器。

主相機有大光圈＋ OIS 前鏡頭更有120度廣角

A5 及 A7 影相當然唔及大佬 S6 有 1,600 萬像素，但係就同樣擁有 f/1.9 大光圈及 OIS 光學防手震，而前鏡頭就得 500 萬像素，不過勝在120度廣角鏡夠 Wide，一大把朋友 Selfie 都冇難度。f/1.9 大光圈同 OIS 除咗令吸光度增加，夜間拍攝更得心應手外，亦讓用家更易拍出前清後朦淺景深效果。無論 A5 定 A7，相機對焦速度都幾快，果然係有旗艦機嘅味道。

▲A5 同 A7 嘅鏡頭都微微突起

▲除咗自動模式，仲有專業模式，可以較白平衡、ISO，曝光補償，但就冇得較快門同光圈。

▲就算室內光線不足，影出黎驟眼睇色彩非常鮮豔，但放大後可見存在輕微油畫化和雜訊問題

▲但大光圈的淺景深優勢仍然存在

八核 CPU 配 2GB ／ 3GB RAM 一般使用好足夠

A5 同 A7 分別用上 2GB 及 3GB RAM，但同樣用上 8核 CPU，兩部機用起上黎都好順，未有窒機情況發生，相信都與介面優化有關。儲存空間兩者都有16GB，當然亦支援 Micro SD 擴充，但就不能同時享有雙咭雙待功能。電池方面，A5電池有2,900mAh，而 A7 則有 3,300mAh，同級手機中電池容量都算大，相信可以用足一日。