改編自 2009 年奧斯卡最佳外語片嘅美國版《謎情追兇》，唔少人會攞佢同原版作比較，而且大多數嘅評論都係被比落去；無睇過原版嘅小編當然無法作出比較，但可以同一樣未睇過而又擔心今次 Hollywood 翻拍「爛戲」嘅讀者分享，其實並唔係咁差咁劣質。想知點解就繼續留意下文！
故仔講述 FBI 探員 Jess 同 Ray 調查一宗同 911 恐怖份子有關嘅姦殺案，但死者竟然係 Jess 女兒。檢察官 Claire 因證據不足而撤消起訴，疑兇得以逍遙法外，從此人間蒸發。十三年轉眼過去， Jess 已決心退隱， Ray 卻仍然堅信佢能破解疑團並討回公義。
睇故事簡介同預告片時會以為係以 Jess 嘅角度去睇呢個故仔，但原來係用 Ray 嘅角度去睇故事。一開始的確會覺得有點詭異，但慢慢睇落去，當更多嘅秘密同大話被揭曉，就會發現點解用 Ray 嘅角度睇呢場追捕姦殺案兇手故事。除此之外，唔但止敘事角度唔同，方式亦有唔同。故事一開始就係十三年後， Ray 搵番個逍遙法外而又整咗容嘅疑兇，返去搵 Claire 重開案件再敘述十三年前姦殺案情形。電影會一直以插敘嘅方式去展示故仔，人物形象更好咁刻畫出來。不過小編發現插敘講故仔時轉接比較生硬，好在今次只係十三年前後兩個時間線，唔會有混亂嘅情況出現。
插敘講故仔嘅方式，小編唔算好 buy ；始終轉接做得唔好就好難令人投入到個電影氛圍入面。不過勝在今次 Secret in Their Eyes 嘅音效做得相當出色，為整套電影鋪上懸疑氛圍；而且亦能夠係緊湊嘅情節同無咁 heavy 嘅劇情中捉住合適節奏，觀眾亦唔會因為緊張音效而搞到好有逼迫感。
雖則《謎情追兇》以 Chiwetel Ejiofor 扮演嘅男主角 Ray 去睇故事，但唔少觀眾入場睇應該係會睇 Nicole Kidman 同 Julia Roberts 吧。之前有傳聞兩位影后不和，今次拍《謎情追兇》更係火上加火，但咁並無阻兩位嘅發揮。 Nicole 扮演嘅 Claire 係一個哈佛畢業嘅 FBI 首席律師，而 Julia 扮演嘅 Jess 就係一個普通 FBI 探員，兩位都係戲中有明顯嘅演技比拼，不過小編認為 Julia 稍勝： Julia 嘅角色 Jess 係姦殺案受害者嘅母親，由平靜到崩潰大哭，之後更心生恨意到最後冷靜得嚇人， Julia 嘅演出都好令人佩服。雖然 Nicole 亦都充份表現出高傲冷豔性格嘅 Claire ，而且質問兇手 Marzin 時更係相當好戲，不過相比起 Julia 嘅角色嚟講無咁突出。（話講回來，始終 Julia 嘅角色發揮空間係比較大嘅）
要講比較失望嘅，竟然唔係電影入面嘅問題，反而係香港嘅翻譯問題。《謎情追兇》一貫香港電影片名翻譯風格，但好明顯觀眾只睇個名係好難理解得到佢會係講咩（尤其「謎情」比人感覺主軸線講愛情）。而 Secret in Their Eyes 呢個原名定得相當好，同戲中嘅內容相吻合，亦好易令人聯想到畫面。其實差嘅並唔只係片名，一路落去嘅字幕翻譯都唔算好好。例如：「 You’re such a dxxk!」譯做「你好硬膠」。但其實之後有講「性別歧視者絕對唔會同我講呢樣野」，其實會同「你好硬膠」係明顯接唔上。只能夠講譯者好成功用港式方法譯出嚟，若然唔太注意英文對白時還可以。
好多人睇完 Secret in Their Eyes ，覺得值得探討嘅係公義係現實社會係咪真得到申張，因為即使 Marzin 殺咗人而佢可能有機會阻止恐怖襲擊，救返成千上萬人所以不被控訴。小編都覺得「公義」係成套戲嘅大主題，但小編更想講嘅係「復仇」。
（劇透來了！）
結尾 Ray 發現 Jess 話係十三年前早已殺死咗 Marzin 係一個大話，因為 Jess 講過「死刑太便宜佢」。而原來呢十三年嚟 Jess 一直都自行監禁住 Marzin ，要令佢體驗痛苦嘅滋味：生不如死。結尾嘅揭曉可以話好震撼，因為理性得嚇人：一槍殺死殺人犯太便宜佢，「終身監禁」先至係最終極痛楚。但 Jess 知道佢可以走甩法律，所以選擇捉佢嚟實行監禁。佢咁做嘅同時亦即係間接監禁自己，將自己困係過去嘅悲痛中不願離開。好多時人總係覺得對傷害你嘅人復仇，你內心會覺得好過啲，以為咁樣就係釋懷；但復仇就好似踩入泥濘中，你只會越陷越深，付上嘅更可能係你嘅一生。每段復仇，其實走到最後，最傷嘅始終係自己。
就無睇過原版嘅觀眾嚟講， Secret in Their Eyes 的確係一部唔錯嘅 Hollywood 片：佢仍然能夠保留到深度，卻又不失娛樂性。有值得探討嘅話題係電影中展現，但電影情節並唔算 heavy ，一般觀眾都可接受得到。加上三位主角演技不俗，唔拖戲好快直入單一故事線，睇上去相當舒服﹑易入戲。如果鍾意懸疑嘅讀者不妨一睇！
評分： 7.5/10