想玩賽車唔係要去澳門就要到珠海，更唔好講飄移，係香港幾乎係無可能的事。不過我依莉詩最近就發現觀塘工廈竟然有個賽車場，仲打正旗號玩飄移添！於是我就搵埋籮文同 Billy 一齊鬥車啦！
呢個小型賽車場唔係玩真車，而係玩具車。Crazy Cart 由美國電動車品牌 Razor所研發，本來係針對小朋友的玩具車，不過因為可以輕鬆做出飄移效果，吸引唔少大人課金。車種除了大、中、細外，仲有可「片」出火花的新款車，無論大人定細到 1歲的小朋友都玩得，唔洗駕駛技術，純粹考膽識！
▲ 而最受歡迎的就是 Crazy Cart 負重最高140磅，適合 8歲以上的小朋友或者細笠女仔。
▲ 自問有懷仔咁的身型，怕坐唔落玩具車都唔怕。俾多十蚊揀大車就得， Crazy Cart XL 最高負重 240磅。
▲ 另外仲有最新可以「片」出火花的新 model 添！
至於賽車場其實係香港代理公司的 Showroom，賣車之餘索性將工廈單位改成三千幾呎的超多彎賽道俾大家一嚐飄移滋味。雖然賽道都係一眼睇晒，但每次可以容納 6架 Crazy Cart，約埋幾個家庭大人細路一齊玩都得，而且勝在彎位夠闊，踩油、扭軚，只要一手拉住飄移桿，另一隻手將手軑轉向相反方向，兩個後轆就會 360度轉，瞬間飄移入彎。試車前聽完負責人 Terry 的 5分鐘教學就可以正式出發架啦！
▲ 雖然時速只有 20km/hr ，不過小朋友同女仔都要著齊保護裝備先可以上場架！同時，場內設有搖控斷電，如果有用家用得過份失控或者當成碰碰車使用，會有搖控將所有車的電源關閉，確保安全。
▲ 入彎後，拉起飄移桿，車底就會升高並為後轆解鎖，令後轆可以 360轉向。
▲ 想飄移的時候記得睇清楚個箭咀，因為軚盤圈數細，扭少少軚已經可以 180度，扭太多好易打白鴿轉架！
▲ 賽道有 5個大彎，夠晒位俾你練習掟彎。
▲ 想掟個靚彎切勿跟車太貼啊！
一輪試過車之後，睇睇我地 3個的玩後感：
剛柔並重係最緊要，無論油門同軚盤都要適當地調節，太粗暴就會打白鴿轉，太溫柔就會唔夠速度甩尾。我建議初學者頭一兩個圈唔好用支飄移桿住，跑熟條賽道先。同埋記得著鬆身衫褲去玩，其實屈埋個身喺架車上面都幾攰，玩到我成身汗，條褲又差啲爆軚。
一開始會以為玩開碰碰車同埋機鋪賽車機，上手並唔困難，但實際上原來都幾需要技巧啊！尤其係玩嘅時候咩都要「輕」：輕輕踩油門﹑輕輕轉軚盤以及輕輕拉起飄移桿。如果噤或拉得太盡太快的話，好容易就會失控炒車；而且太用力就好容易手抽筋添！不過試多幾次，當上手之後有成功飄移到個下，隻手亦唔會咁攰，飄個吓速度同離心力真係好爽！
我本身就無乜方向感，玩賽車 Game 已經唔叻，仲話玩飄移真係越級挑戰。開頭我都唔敢亂嚟當車仔揸，但拉多幾次飄移捍，轉咗幾個白鴿轉之後又覺得個 feel 幾好。雖然去到尾我都未做到一個標準的飄移，不過都覺得好好玩，相信練習多幾次就可以完美甩尾架啦！
試完我地就覺得好過癮啦，可惜屋企無咁大地方俾我地買番去自己玩。不過負責人 Terry 就透露佢地至上年 10月正式營業以來銷情都唔錯，D 人通常買嚟係村屋或者屋企花園玩。佢仲話飄移無論大人定小朋友都想體驗，但真車飄移要授專業訓練同攞專業資格先可以試，花費唔少，所以相信會有一定吸引力。
Crazy Cart試車場
地址：觀塘開源道75號業發工業大廈2期9樓
營業時間：12:30pm-12mn
7/2/2016期間前試車價：$69/10分鐘 (星期一至五)；$79/10分鐘 (星期六、日及公眾假期)
查詢:3428 5298
相關文章﹕