哈囉！2016 年港女喺度首次同大家打聲招呼先！
話說上個星期，我咪同大家精選左個 2015 年十大 Hashtag 嘅，估唔到 2016 年先啱啱過左一個禮拜，已經爆出多個新的網絡潮Tag，例如係＃被報平安、＃自己方式、＃被叫雞 等等，真係睇少一秒都唔得掂呀！不過，今日我唔講呢件事，反而想講下另一單「傑出關公災難」－啟德坊行人專用街道命名比賽。
如果大家有留意開，應該唔會對呢啲 抽水 活動感到陌生，例如上個月就有廉署的一人一句撐廉潔的標語創作比賽，同埋港鐵的看圖造句活動，都係另一啲公關災難。事隔都唔知有冇兩個星期，今次就到土木工程拓展署搞左個街道命名比賽，真係鑊鑊新鮮鑊鑊甘。
據我所知，政府就好鍾意喺佢地嘅工作入面，利用市民的腦汁 加入市民參與，集思廣益嘅，以代表佢地的工作係以「服務市民」為宗旨。可惜嘅係，佢地只會喺一啲無傷大雅，做左同唔做都冇乜分別的工作度，加入市民的意見，例如整個 Logo、寫句標語、改個名之類。當一啲重要政策要出台，或者要規劃香港的未來的時候，嗰啲諮詢，佢地就唔想俾你參與，只會搵埋晒啲「老朋友」撐場。
搞下活動呀比賽呀呢啲本質上其實唔係一個問題，但正所謂「識睇一定係睇留言」，網民的創意簡直就將呢啲活動的精粹發揮得淋漓盡至，每一次喺唔同的比賽及活動入面都可以充分利用個啲機會，顯示大家的時事觸角不特止，仲諷刺到時弊，成功吸引到大眾對不同事件的關注。
如果你間 Agency 只係睇數字就收貨架喇，咁呢幾個 Campaign 完全係收到宣傳之效，仲非常成功添，網絡上的 engagement （參與度：包括 Like、Comment 及 Share）非常高同非常踴躍。之不過宣傳效果並唔單止係睇數字，仲要睇埋內容架嘛。如果散播嘅係對品牌形象有正面回嚮的話，當然多多益善； 相反，你梗係唔想人地唱衰你架嘛！
我唔知政府啲人係咪真係估唔到網民的抽水能力係咁強（其實有無限個前車可鑒囉～），定係佢地無視左網絡的影響力（今年叱吒坤哥攞咁多獎，唔係仲覺得網絡冇影響力呀？），如果佢地突登開個 Post 出黎俾位人地入，俾水人地抽，簡直就係自己整個陷阱俾自己踩。政府民望低到已經唔想再講，啲官同埋親政府人士又咁多醜聞，點解佢地可以完全放棄自己的形象呢？
唔好咁灰住，雖然政府對於社交媒體的運作及效果都仲係唔熟悉，但我地仍然有好嘅教材俾大家參考下，例如 HKTV 最近嘅「今晚要劏雞還神」 Campaign，同樣係利用網民的創意，但就有正面的效果喇。其實「識睇一定係睇留言」（User Generated Content, UGC）宣傳系列係充滿好多變數，唔係咁容易駕馭，政府個底都未打好就成日向高難度挑戰，咪死晒火囉～
Leave a Comment