河國榮這位前 TVB 藝員，相信有追開大台劇的朋友都好熟悉佢啦！佢係劇入面有做警司、外國人等等，但最近竟然放棄娛樂圈，走去做 Uber 司機！咁大轉變，真係嚇到個心離一離呀！咁好機會，我們 unwire.hk 的籮文自然立即來個「野生捕捉」，試下河國榮手車之餘，又同佢傾下計啦！
L：籮文
H：河國榮
L：其實 Uber 應該點發音呢？有啲人講「U 爸」，但有啲人又話應該係「烏爸」，究竟邊個讀音先正確？
H：如果係英文讀法，正常係讀「U 爸」嘅，但我聽講佢唔係英文而係德文來，所以德文讀法應該係「鳥爸」先啱。
L：哦原來係咁。係呢，其實你介唔介意人哋叫你做「鬼佬」呢？
H：我都幾鐘意「鬼佬」呢個稱呼架，因為佢係廣東話文化嘛！如果無咗會覺得很可惜。
L：咁你對你前公司（即係 TVB）有咩睇法呢？
H：對我來講，如果無 TVB 就無河國榮，呢個係真嘅。不過我覺得係市場同經濟方面，佢哋（TVB）而家好難做。因為以前係人都會睇 TVB，但而家時代唔同曬啦，啲人會上網睇 video，連我自己都會上網煲劇啦。
L：咁你知唔知咩係網絡 23 條？
H：我聽過，有一部分我係支持嘅，因為版權始終都係重要。但我有一位朋友對法律很熟悉，親自睇過（網絡）23 條，佢話其實好多人講得誇張咗，大部分議員又都無時間去睇（清楚啲條文），好多都係懵嘅！
L：BTW，我真係趕住番工，不過同你傾計真係好開心！咁你有咩聖誕願望？
H：都係希望大家開心，健康，想個樣有個樣，同啲親戚朋友開心就得啦！
L：好，咁我祝你聖誕快樂，心想事成！題外話，你手車認真正，不愧係揸咗十幾年呀下！
H：多謝，Yeah！但更正一下，其實嘛……我點止揸十幾年咁少呀，你未出世我已經揸緊啦！
L：Orz……
Leave a Comment