臨近年尾應該唔少朋友都 plan 好出發去日本搶福袋，難得去到梗係順便觀光下啦！之前依莉詩放年假去咗大阪同京都成個星期，睇咗唔少燈飾，依家就介紹下呢個全關西最大的彩燈祭俾大家，絕對會一去難忘！
琉璃溪彩燈祭位於京都南丹市，其實都幾遠下，如果由京都車站出發轉下車最少都要個半鐘先到。沿途已經愈來愈黑，附近冇街燈冇建築物，上到山仲非常凍添！不過就係因為係山上面，先有一個咁大，又咁黑的地方俾人靜靜欣賞彩燈的美。而且我一落車就落雪，加埋 D 燈飾真係超靚超浪漫。過萬呎的燈海每隔一段時間仲會跟住音樂閃動，同香港的燈飾比，完全係另一個層次。
▲ 可能因為太偏僻，又係平日，所以都無乜人，主要都係當地人為主，可以行得好輕鬆。
▲ 穿過金色的燈光隧道就見到幾個可愛的小聖誕老人。
▲ 再穿過一條條星光道路，就可以見到萬呎燈海，眼前就係一個字，靚！
▲ 燈海每隔一段時間仲會跟住音樂閃動，非常浪漫。
▲ 天使都來到合奏美妙的旋律。
▲ 燈海的另一邊有多個更小型的裝飾，好有童話色彩。
▲ 連野鹿都由奈良跑來襯熱鬧。
▲ 起初我唔明點解放金豬係度，原來係琉璃溪的吉祥物。
▲ 雪人都好可愛啊！
除了燈飾，每晚 17:30、18:20、19:20 同 20:30 會有 4 場每次 10分鐘的光雕表演。起初我以為只係係空地棟塊板投射 D 圖案就叫光雕表演，但到後半突然噴煙，所有人都就被煙霧包圍，加埋光的折射，就好似極光一樣係半空流動，拀到非筆墨可以形容。
▲ 可能唔想螢幕光影響到其他人，現場無人拎相機影相，於是我都專心欣賞。但都希望大家身同感受，我官方 Facebook 轉載了兩張相俾大家睇。
雖然去彩燈祭都幾遠下，不過大阪同京都都有接駁巴士可以去。我今次就選擇咗由京都車站出發，搭電車至 JR 園部車站再轉搭免費接駁車。但要注意的是當地 12 月差唔多 5 點天黑，6 點已經係去程最後一班，而平日 8 點係回程尾班車，如果鍾意影相的話最好預留兩小時以上，唔係真係影唔晒。(接駁車時間請至官網確認)
▲ 由 JR園部車站轉搭免費接駁巴士車程大約需要 30分鐘左右。
▲ 由能勢電鐵的日生中央車站轉搭免費接駁車接駁巴士車程大約需要 35分鐘左右。
本來 12 月中去京都唔期望見到雪，估唔到上到山俾我親身見到呢！雖然為咗趕接駁車我只留咗個半鐘左右，所以好多景都影唔晒，不過只係留一陣已經夠醉人。係香港絕對唔會睇到咁大規模、咁少人、咁有氣氛的燈海，如果冬季去開關西的朋友一定要去睇啊！
日期：2015 年 10 月 31 日至 2016 年 4 月 3 日（16:30 ～ 21:30）
地點：琉璃溪溫泉/〒622-0065 京都府南丹市園部町大河内広谷 1-14
入場費：成人 1,000 円、兒童 500 円