事先聲明，呢篇唔係之前嗰篇試搭順豐新 App 嗰隻順 Phone 車，而係名乎其實嘅順風車。話說筆者於 1 月 1 號參加咗越野跑比賽，聖誕有 3 日長假，當然趁所有慶祝都完晒嘅 Boxing Day 去練習下！跑完將近 20 km，腳都斷。到達烏蛟騰之時，走咗架小巴，另一架小巴要等勁耐，因為趕住走嘅關係，我哋想搭的士，但係身上得張八達通，一係就搭 Uber 㗎啫，但係 Uber 又無車。
咁點算呢？筆者同個朋友講笑咁講，不如試下截順風車啦。
朋友話：「都好喎，係香港截順風車唔知有咩嘢發現。」
好啦，不如試下啦。
於是我哋一路行去搵巴士站嘅同時，筆者就舉起手指公（截順風車手勢），嘗試截順風車。結果一舉，路上第一部車就停低。
筆者厚顏地走上前，同果位好心哥哥講我哋嘅情況，本身我哋打算叫好心哥哥喺火車站方便就落低我哋，但係再問之下，原來佢出沙田，咁好心哥哥就話：「咁車埋你哋出沙田啦」，我哋覺得簡直係 Perfect 池呀！
好心哥哥二話不說就將後座整理好，仲好客氣咁同我哋講：「你哋要屈就下坐逼少少喇！」
筆者上車之後，坐坐下都記者格上身，同好心哥哥都交談咗一陣，問下佢會唔會覺得好唐突，無啦啦有人截順風車。好心哥哥話，其實我哋都唔係第一個，試過有人好似我哋咁又係一路搵唔到車，又試過有人行山受咗傷，行動不便於是又義載佢哋去醫院。佢話，車係咪都咁行嘅，咁有人有需要咪載咪佢哋囉！
筆者聽到呢度，其實都好感動。因為估唔到，原來一直以為只會係外國公路會發生嘅嘢，喺香港都可以發生嘅！
其實，能夠喺香港截到順風車，證明香港人都仍然都好有愛心嘅。之前有報道話，有人眼見啲車成日都載得一兩個，浪費咗啲位嘅同時亦浪費咗啲資源，而且一架車只載一個人亦都相當唔環保，於是有人亦發起同區居民義載服務，喺 Facebook 開群組邀請有心嘅司機加入，叫做善用資源咁話喎，其實筆者覺得咁樣都幾溫情洋溢，彰顯咗「科技改善生活」嘅精神！
始終能夠有「順風車」呢回事唔係必然，一個地方如果無互信、人同人之間冷漠、市民無教養、幫人之後會有一身蟻嘅地方（大約喺香港北面就有一個咁嘅國家喇！），根本就唔會有司機肯義載，截車嘅人亦未必敢上，因為可能有危險。順風車呢個經驗話俾筆者知，我哋要好好保護大家之間互信嘅根基，咁樣科技改善咗，我哋嘅生活先有變美好嘅可能㗎！
想睇返真人實驗 1 ？㩒入去睇下啦！。