好多人都話，「其實 Android Wear 款款都差唔多」，的確除咗外型上有分別，基本上功能上都係大同小異。依隻 Asus ZenWatch 2 就做到其他 Android Wear 嘅大部份功能，但係價錢就平一截，想知有幾抵玩就要睇落去啦！
ZenWatch 第一代就被評論話錶面太大，女性用家唔啱戴，Asus 可能有見及此，今次第二代 ZenWatch 就推出兩個 Size，男裝款同上一代一樣擁有 1.63 吋屏幕，搭配 22mm 錶帶，而新增嘅女裝款則擁有 1.45 吋屏幕、20mm 錶帶。有三款色鋼材錶身包括：碳纖黑、閃耀銀、華麗金，而錶身外型冇大改（其實望落都有啲似 Apple Watch），最大變化就係多咗一粒錶冠，唔好以為好似 Apple Watch 咁多功能，其實 ZenWatch 粒錶冠只係一粒按鈕而唔可以擰，但係造工非常好，係外型上亦係一個點綴位。
▲今次第二代 ZenWatch 就推出兩個 Size，男裝款同上一代一樣擁有 1.63 吋屏幕，搭配 22mm 錶帶，而新增嘅女裝款則擁有 1.45 吋屏幕、20mm 錶帶
▲男裝款預設鋼帶
▲女裝款預設鏈帶
▲最大變化就係多咗一粒錶冠，其實 ZenWatch 粒錶冠只係一粒按鈕而唔可以擰，但係造工非常好，係外型上亦係一個點綴位
外型就夠 Grand，但係上手感覺又如何？由於預設嘅鋼帶唔啱 Size，籮文就將隻男裝 ZenWatch 2 換上隨盒附送嘅膠錶帶，快拆設計非常方便，只要將支針推到一邊就可以拆出錶帶，而戴上去 ZenWatch 2 重量適中，但係錶身比較厚，屏幕同手腕相隔一段距離，望落有少少唔順眼，但係整體感覺都舒服。
▲錶身比較厚，屏幕同手腕相隔一段距離，望落有少少唔順眼，但係整體感覺都舒服。
ZenWatch 黎到第二代，男裝款繼續沿用上一代 AMOLED 1.63 吋 320×320 觸控式螢幕，而女裝就用上 1.45 吋 280×280 觸控式螢幕，像素密度分別只得 278ppi 及 273ppi ，難怪睇字會見到有鋸齒情況，不過相信都冇人會用智能手錶嘅屏幕黎睇片，最緊要清楚睇到時間同 Message，何況智能錶黎講 ZenWatch 嘅屏幕都算細緻，比 Moto 360 (2015) 都要清，顏色亦好鮮豔，用咩 Watchface 都可以靚靚 Show-off 一下。但係 ZenWatch 2 最令人卻步嘅一點就係屏佔比，佢擁有相對其他智能手錶都要大得多嘅屏幕邊框，搞到望落唔夠型仔，不過事實上個屏幕邊框唔係黑麻麻咁簡單，燈光下細心睇可以見到有放射性的金屬紋路。
▲像素密度分別只得 278ppi 及 273ppi ，難怪睇字會見到有鋸齒情況
▲ Download 唔同嘅 Watchface 用黎襯衫一流
【評測】ASUS ZenFone 11 Ultra 外形 手感 屏幕 相機 效能詳細開箱評測 【評測】ROG Zephyrus G16 (2024) 外形 手感 打機表現 效能 鍵盤 端子開箱評測 ASUS 將於 20/5 舉行發佈會 推出 Snapdragon X Elite 便攜筆電
續航力對智能錶黎講非常重要，有邊個會希望隻手錶日日都要叉電？年初 Asus 曾經表示依代 ZenWatch 在續航力方面可維持一星期。除咗 Pebble Watch 之外都冇乜主流智能錶可以做得到咁強嘅續航力，所以籮文當然要試一試 ZenWatch 2 係咪真係咁堅。首先籮文下午將 ZenWatch 2 叉到 80% 左右，充電速度幾快，由 0% 充至 50% 只要 36 分鐘。但籮文身為 Pebble Time 嘅用家，就覺得同樣用上磁吸叉電設計嘅 ZenWatch 2 冇咁方便，叉電線唔可以擰轉叉，相反 Pebble Time 嘅叉電就可以雙向，但係 ZenWatch 2 嘅磁力強好多，就算拎住條線吊起隻錶都唔會跌，值得一讚。
下午5點半左右，叉到80%
▲用上磁吸叉電設計嘅 ZenWatch 2
▲從上圖可以見到，叉電只可以由左至右，想由右至左叉？啲磁力會推走你條線
▲ZenWatch 2 叉電線磁力好強，就算拎住條線吊起隻錶都唔會跌，值得一讚
▲下午9點半左右，跌到66%
籮文將光度較到 2 度由第一日下午5點半左右一直戴住黎用，由於第一次使用需要一啲同步程序，所以耗電量應該比日常使用高，直到第二日嘅下午5點左右，仲有 13%。睇黎維持一星期就真係需要將光度調到最暗（其實最暗光度都已經好夠），關閉 Always-On 功能等等先有可能，但正常使用應該都可以用到兩日先叉電，Android Wear 手錶黎講已經算非常出色。
▲直到第二日嘅下午5點左右，仲有 13%
如果你同籮文一樣係零運動人士，唔需要隻錶幫你量血壓又盛，而且懶到出汁，有 Message 都懶得拎手機出黎，依隻錶都幾啱你。唔同其他 Android Wear 總係要加啲專為運動而設嘅功能，依隻 ZenWatch 2 雖然只可以俾用家睇吓 Message、換吓 Watchface、襯吓衫，但係價錢上亦都平過其他 Android Wear 一截，籮文就覺得幾抵玩。
ASUS ZenWatch 2
建議售價：HK$1,998（男女裝同價）
查詢：3582 4770（Asus）
【評測】ASUS ZenFone 11 Ultra 外形 手感 屏幕 相機 效能詳細開箱評測 【評測】ROG Zephyrus G16 (2024) 外形 手感 打機表現 效能 鍵盤 端子開箱評測 ASUS 將於 20/5 舉行發佈會 推出 Snapdragon X Elite 便攜筆電