是咁的，上個月嘅今日，即係 11 月 16 號，我同個 friend 講，我想試下唔用Facebook一個月（我嘅唔用指唔 engage，即唔 like 唔 share 唔 comment 唔出 post，雖則我係區選之後出過 post，叫做破咗一日戒)，而自己為重度Facebook用戶，邊有可能真係唔睇？但對我嚟講，都想睇下自己唔用 Facebook 一個月有咩變化 / 感受。
今日終於都到咗喇。我發覺你睇完唔講係好難架。咁即係有口難言嘅感覺。你明明見到有樣嘢，你好想 like、好想 share，但係你都要忍住手。
我以為 Facebook 最多咪又係政治嘢時事嘢，其實發表意見又有乜謂？反正人人一把口一百種真相，你講完都。點知到你真係唔可以 comment 嘅時候，你又發覺原來 Facebook 裡面其實都可以有好多真誠嘅交流，好似墳場新聞嘅青永屍之類，佢係真心地同佢啲 Facebook friend 交流，而唔係純粹地為左某一件大事發表自己嘅偉論。
或者係 Facebook 你會發覺好多岸郊野吾賞鯉 (註)，但係其實原來有好多野都值得你 like 值得你 share，亦有好多人好多事你好想去 engage 落去，例如你新增嘅功能，會回顧你嘅「當年今日」，呢啲係好珍貴嘅回憶。Facebook 唔係可有可無，Facebook 已經成為左生活既一部分，亦係好多人生活既一部分，網絡世界就係真實世界嘅延伸。話網絡上嘅人係廢人，只係反映佢脫離新一代嘅思維，完全脫離於時代嘅步伐。
而原來無得用 Facebook 最令人唔舒服係嗰一種無法參與既隔絕感覺，好似困左係玻璃房，講嘢但係你聽唔到。原來 Facebook 裡，有人講嘢你係好想回應，有某啲事你真係唔講唔安樂。
有某啲自由，你會失去咗先知。
但當我體驗到呢份暢所欲言嘅感覺，我就知道網絡都係要捍衛嘅地方。
呢排有好多大事發生，區議會、網廿三、地鐵超支，whatever。當你仍然為呢啲野感到氣憤而想係網絡上出聲，其實表示你仲係好愛呢個地方。
係呀！我真係好愛呢個地方！
註：此言本出於一位社運人士之口，後來由墳場新聞青永屍嘲諷改為「岸郊野吾賞鯉」。唔明？讀一次，再 Google 下啦 XD
