聖誕又到！連放三日假，最好當然是約埋一班朋友開 Party，盡興一下。唔想同人逼，只係諗住留喺屋企歡聚的話，唔少人都會選擇叫外賣或到會，懶得自己煮丫嘛！小編對上幾次同朋友開 Party，仲試過網購生蠔及海鮮刺身添！聽落好似好奢侈，但一班人食，除返開其實都唔係好貴咋喎。Ocean Three 做網購咁成功，原來早在 2009 年已開業，當時並未有人好似佢地咁喺網上售賣新鮮食材，「創業」呢樣野更加係未成氣候啦！正當小編以為佢地當年已經咁前衛，識得用科技創業，誰知道他們背後切切實實有一段「血淚史」…
美夢幻滅 禍不單行
34 歲的何智聰（阿聰）是 Ocean Three 的創辦人之一，現時一共有 7 間門市，公司有 100 名員工，但想當年，他與 Partners 誤打誤撞「創業」的時候其實只得三個人，而且開業目的從來就不是賺錢，只是為了「散貨」。
七年前（2008年），阿聰日頭在地盤打工，晚上在 eBay 做電子產品買賣，假日還做海鮮買賣，日日早出晚歸，賺到十多萬一個月，更儲了第一桶金，順理成章地結了婚，生了兒子，還打算將大陸買賣海鮮的生意擴大。這樣的故事好像耳熟能詳，有如童話故事一般夢幻。
但現實是，2008 年底就發生了金融海嘯，當時市道低落的情況相信不少人猶有餘悸。阿聰與 Partner 本來一心想著要在大陸開餐廳，同時大做海鮮轉售生意，於是從外國大量入貨，誰知道當時的客卻拖數，遲遲未找，最後搞到阿聰倒蝕訂金不特止，還要處理已訂的貨。
正當他正躊躇著下一步的時候，他的妻子因為突發性心臟病離去了，留下只有七個月大的兒子。阿聰傷心欲絕，「金融海嘯、老婆不在、被騙了錢、上有高堂、還有兒子要照顧，我當時日日都企唔到起身，只能額頭掂住枱，日日趴係度。」但愛面子、唔衰得的他始終要硬著頭皮撐下去，為了兒子。
「原來生蠔係咁平」
外國的海鮮送到來，除了說無限句「仆街喇」之外，唯有看看來貨價，再想辦法賣出去。一打開箱再㩒㩒計數機，「下？！6 蚊隻生蠔？」另一箱，「下？！10 蚊隻生蠔？」他們心想，「係咪打錯單？」過去他們訂海鮮的時候，是一箱一箱計的，從來沒有拆散過逐件計，所以他和 Partner 都不禁驚嘆「原來生蠔係咁平」，於是開始以低價 ＄8－10 隻生蠔轉售。生蠔以外，還有象拔蚌、麵包蟹、登革斯蟹等等，但他們還未想過要怎樣從中賺大錢，只是想盡快將貨賣出，換錢回來。沒有辦法之下，他於是開始逐個逐個朋友打電話聯絡，「揼心口」叫朋友試下。
有一次他帶了些生蠔出席聚會，朋友帶來幾支酒，一同試吃，卻沒辦法收到錢，又不想傷到和氣，才決定把心一橫，與 Partner 開公司，開出正式的單據。Ocean Three 這才貿貿然誕生了，那時是 2009 年尾。
大潑冷水 Partner 不理
因為妻子離別的傷痛尤在，阿聰無辦法不全力貫注工作上，每天仍舊在打電話搵客買海鮮，甚至連 Partner 也看不過眼，說「你唔好成個乞兒咁『唉』人買野啦！」更建議說要做網頁，讓更多人知道 Ocean Three 賣海鮮。阿聰當時也沒有心情應付，淋了一盤冷水到 Partner 身上，說，「我地俾人呃晒啲錢呀，邊有錢做網頁呀，唔係幫手就行開啦！」
但他的 Partner 沒有被他的冷水影響到，去圖書館借了書自學寫網頁。用了三個星期，做了一個 Ocean Three 的初代網頁供人訂購海鮮，而且剛好 Facebook 在當時興起，阿聰每天就在 Facebook 貼相，然後亂 Tag 朋友，藉此當宣傳。阿聰笑說，「後來出活動撞見朋友，佢同我講當時因為成日被 Tag 落生蠔度，Unfriend 了我。」現在 Ocean Three 除了有網頁，還有 Android App，他也沒有再在 Facebook 亂 Tag 人做宣傳了，倒是天天仍舊穿著 Ocean Three 的 T 恤，每次出活動做人肉宣傳板。
戰略合作 看好內需
六年過去，Ocean Three 由只有三個人搭膊頭一齊做的公司，變成而家養緊 100 人的企業，全港有超過 60％ 的生蠔都是由 Ocean Three 供貨，但他說辛勞沒有減輕過，「以前一開始諗點樣散貨，而家要諗點樣管理好間公司，我變成了公司內部的 PR，真正負責搞好關係。」同時，幾年間，競爭對手陸續出現，但他並不意在要打低其他對手，他反而認為要將敵人變成「戰略合作伙伴」，一齊做大個餅，而且 Ocean Three 主力做本地人生意，因為他相信長遠來看，香港的「內需」才是他們的目標。
「贏了世界又如何」
訪問結束後，小編問了阿聰，既然公司的狀況都算上了軌道，兒子又已在讀小學，生活也應算比較穩定吧，個人係咪開心返好多？阿聰坦言自己本來就不是追名逐利的人，只是一路走來少了一個人在旁邊，無論自己有多成功，兒子有甚麼經歷，她也看不到。以前過時過節，他會突然躲起來哭，現在也算是調適了，「都掛住架！但也學會了知足，贏了世界又如何？」其實訪問間，阿聰答不出來老婆對他的影響，但小編覺得可能這就是她對他最大的影響了。
分享到 :
最新影片
