好多人都話，送情侶手機係最好嘅禮物。因為手機日日跟身，如果變成「情侶裝」，日日用起手機都會諗起另一半，其實都幾 Sweet。但係就黎又到咁浪漫嘅聖誕節，緊係唔可以好普通咁送個手機出去就算啦，今集就教男WIRE 民應該送咩機俾女仔先啱對方心意，再教大家點包裝先冧到另一半 (好簡單架咋)！
假如情侶裝只係用同一款手機，咁世界就少好多煩惱啦！可惜嘅係，世事並唔係咁膚淺，叫得情侶機，一定要有自己特色之餘又有相同嘅特色連繫住大家。否則一街乜風物風，咪全街都係你情人？好，事不宜遲，今日筆者決定先教咗男生揀女朋友嘅手機先，以免你地 Last minute 先嚟諗買咩，到時有咩三長兩短就唔好啦！
因為男仔同女仔用手機嘅習慣唔一樣，所以挑選手機之時，都要有唔同嘅策略，今次阿瓜為大家介紹嘅手機點解能夠成為「無敵情侶裝」，係因為兩款各自針對男女唔同嘅使用習慣。
女仔鍾意自拍就係人都知，但係自拍並唔係女士自戀咁簡單，阿瓜話你知，其實自拍好多時都係一段戀愛開始同增進感情的好方法。因為大家習慣前鏡影相無神器，要兩個人貼到好近先影到，呢啲身體接觸係增進感情嘅好方法。不過，又唔係乜嘢手機自拍都得，一陣功能唔好搞到俾女友係凱旋門面前爆粗就死喇，到時你真係作法都唔掂。(唔知咩嚟？自己睇返黃子華個棟篤笑啦！) 所以，要揀啱部手機好重要，今日要介紹嘅呢款手機就啱晒鍾意自拍嘅女朋友喇！
拎得出嚟自拍，除咗鏡頭要靚之外，當然個外型都要唔輸蝕啦。ZenFone Selfie 有粉色系(清新藍)嘅機背，係後面睇落就夠晒cute！
ZenFone Selfie 有樣好貼心嘅設計，就係可以將螢幕顯示部分縮小嘅單手操作模式，只要按兩下 Home 鍵，就可以縮細螢幕去一邊，方便單手使用。有時行街一手拎住袋一手又要覆 Whatsapp 都非常容易。
有時自拍隨咗要影得廣，有時都想做到一啲後鏡先做到嘅「景深」效果 (前清後濛) 。但下下要轉返後鏡自拍，又睇唔到效果，又驚走位撳錯掣。而喺 ZenFone Selfie 就唔使咁麻煩喇，因為前鏡已經可以使用到景深。想再特別啲Post 上社交網站呃 Like，可以拍埋 GIF 動畫。
內置 1300 萬前置鏡頭嘅 ZenFone Selfie，前置鏡頭非常強勁，除咗做到景深同 GIF 動畫之外，仲有咁高像素，影出嚟嘅影像質素非常不俗。前鏡仲有自行設定膚色、美白、大眼、瘦面等等唔同嘅美顏功能，啱晒班女人！
以下係手動模式，無論係快門，ISO、EV、同埋白平衡都可以自已設定，市面上無乜幾部機可以連前置鏡頭都有得手動設定，女仔可以隨時設定一個最適合嘅模式去自拍。
事關有時出夜街，想自拍一下但街燈唔夠光，影出嚟嘅自拍又多雜訊，又睇唔清個樣。ZenFone Selfie 嘅前置鏡頭就有補光 LED 功能，就算係燭光晚餐或者係低光環境，都能夠發揮好大作用。仲有就係，有兩種唔同色溫嘅補光燈，就唔怕啲光打落塊面咁硬好似 Key 相咁啦。
雖然呢個包法有少少「偷雞」，但係都好過你就咁用花紙包掛？顯得你無 Heart 之餘，一拎起手都知你送咩啦，邊有驚喜？
阿瓜就建議咁多位男生，其實而家上淘寶可以買啲手摺星星(可以search：手摺 星星 成品)，其實送到黎嘅時候已經摺好晒，唔洗自己逐粒摺架嗱！買個靚啲嘅盒包住，用星星墊底，有需要放多一兩隻聖誕小公仔 (可以於 12 蚊店度揀，大把款) 入去，等佢可以擺喺 office 枱頭，日日望住。當你女朋友一打開仲覺得你花咗咁多心思實冧死佢！
最重要係，ZenFone Selfie 而家只係賣 $1,999 ，抵過買「潘朵拉」啦，起碼手機用上手，一諗就記起你。而家喺推廣期內購買，仲送埋原廠電池及充電座套裝 (價值 $259) ，聖誕 Party 就可以俾女友瘋狂自拍啦！
