而家啲人成日講網媒係大趨勢喇，冇人揸住份報紙黎睇架喇，個個都係低頭族，拎住部電話上網睇時事睇圖睇片架喇！
其實係咪真架？
點解我咁問呢？呢個問題都唔淨係一天兩天嘅事黎架喇，事關我啲 FD子s 都唔睇《蘋果日報》、《明報》、《立場》、《獨媒》（我自己係會睇埋「政府新聞網」、《港人講地》、《時聞香港》等等）… 呢啲都算啦，可能係太多字，但佢地連「熊仔頭」呀、《毛記電視》個啲都唔睇架喎！「東方昇？邊個黎架？」有時我諗住 share 啲搞笑片俾佢地睇下啦，當我在「熱烈地彈琴熱烈地唱」的時候，佢地都唔識笑個下先大鑊，搞到我成日都諗係咪我有問題呢？大家都係上網啫，點解佢睇啲野，同我睇個啲有咁～大出入？定係我笑點太低，佢地點解唔識笑嘅？！仲要呢個情況唔係發生喺一兩個人身上喎，係好幾個 Group 都係咁喎…
點解嘅點解嘅點解會咁嘅？！係咪我啲口味咁奇特？！
後來有一次我忍唔住，問佢地點解唔睇呀？佢地個答案並唔係「好忙，冇時間」或者「好悶，唔知佢講乜」，而係「好好笑咩？佢地講個啲野同我都無關，個個都要知架咩？」
我語塞。真心，唔知講咩好。
我由細細個開始已經好鍾意睇報紙，屋企人話我細細個最鍾意痴住爸爸叫佢教我讀報紙上的字。甚至中學個陣我學校日日都要我地做剪報，有時中英各一，逼住要睇港聞版、國際版、評論、專欄、讀者投稿等等，好攰架做呢份功課，因為剪報唔只係剪爛份報紙，仲要寫意見（個個議題都俾意見，頭都大埋），但真係建立到睇新聞的習慣。
後來離開校園，到社交媒體興起，一有得喺 Facebook 睇，我就瘋狂 Like 晒呢啲 Page，唔理係人定鬼，只係想了解下唔同人係點樣詮釋同一件事。但呢個時候，我發現，我同啲朋友睇嘅野越來越唔同，佢地好像從來都沒有睇新聞的習慣；更不要說而家出左黎做野，大家面對及關心的人同事都非常不同，可能這就導致分岐吧…
偶爾我在想，我係咪真係揀左一條同「主流」咁～唔同的路呢？明明我睇開個啲 Page 都有萬九幾個人 like 左…
