近排天氣轉涼，皮膚開始變得乾燥，但護膚品又難吸收，就算幾懶都好，導入導出機都係時候出場啦！不過導入導出機又唔只得 Hitachi 同 Ya-man，今次介紹呢部 Panasonic「溫感」離子美顏器同樣使用離子技術，好唔好用就等我依莉詩分享下啦！
三角形導頭更貼面
呢部「溫感」離子美顏器同之前介紹過的 Hitachi Hada CRiE Plus 差唔多，同樣使用離子技術做導出導入，機身輕巧及充電式設計，使用時唔洗插著線，躺在沙發、玩緊電話，甚至帶去短途旅行用都非常方便。而我覺得呢部美容機最大的特點係鈦金屬三角形導頭設計，比起 Hitachi 的圓形導頭更貼面，就連鼻翼同眼肚的死角位都可以顧及到。
▲ 盒內除了「溫感」離子美顏器，仲有火牛同化妝棉固定環。但固定環只有一個如果整唔見咗就麻煩了。
▲ 只要 1小時就充滿電，可以帶佢四圍走。
▲ 三角形導頭可以更貼面，就連鼻翼同眼肚的死角位都可以顧及到。
▲ 同 Hitachi 一樣使用時需要握實機背的金屬板及讓導頭緊貼面部才能運作。
導出效果明顯
用得導入導出機，唔洗講都知第一個步驟係深層清潔，利用離子技術將帶電極的污垢從毛孔導出，並吸附到沾了化妝水的棉花上。而呢部機只要 3分鐘就可以完成，都算幾快，而且係我用完 Panasonic 綿密泡沫潔面器 卸妝潔面後，再做導出，化妝棉竟然都仲有黃色同黑色粒粒，睇嚟都幾有效。
▲雖然三角形導頭幾貼面，不過佢個化妝棉固定環就設計得有 D 鬆，用的時候化妝棉會有機會移位。
▲ 測試前小編先用 Panasonic 綿密泡沫潔面器 卸妝及潔面，之後用平時用嚟導出的「紅水」分別用手同機清潔面部的左右。右面用呢部機導出完的化妝綿明顯比左面只用手抹過的化妝綿有更多污垢。
溫感 + 微震加速導入
至於導入方面，有兩個步驟，首先以離子導入保濕 3分鐘，再以溫熱按摩 3分鐘以促進吸收。當中離子強度有 3段選擇，而溫度有 2段選擇（約40°C及47°C），可以因應需要同喜好去調節。感覺上同用 Hitachi 無乜大分別，只係多咗微暖，而護膚品的吸收同樣比以雙手按摩加快了。
▲ 機身會有 2段溫度調節（約40°C及47°C）同 3段離子強度選擇 (強、中、弱)。不過每完成一個步驟都會自動關機，需要手動再開始，唔會好似 Hitachi 咁自動跳到下個步驟。
▲ 雖然使用面霜、美容液及眼霜吸收比以雙手按摩快，不過用導入面膜的效果似乎沒有 Hitachi 的好，3分鐘後面膜都仲有好多精華呢！
依莉詩「三角形導頭零死角」
呢部「溫感」離子美顏器同之前介紹過的 Hitachi Hada CRiE Plus 差唔多，同樣使用離子技術做導出導入，機身輕巧及充電式設計，非常方便。而呢部的導出效果唔錯，仲有埋溫感功能幫助打開毛孔。官方建議每天使用，每個步驟各使用三分鐘，總共 9分鐘，比起 Hitachi 的更快，而且仲要平 D 添！當然，如果唔計較價錢， Hitachi Hada CRiE Plus Hot&Cool 有埋冷敷功能，可以收縮毛孔，令皮膚更緊致啦，不過呢部的性價比都算高架！
零售價: HK$ 1,280
查詢：Panasonic (2833 0955)
分享到 :
最新影片
