之前預告過 Hello Kitty 將會係今個聖誕登陸昂坪市集，今日我依莉詩就親身去幫大家視察環境，順便仲去埋新開的葉問體驗館添！
Kitty 車廂伴自然風光
上市集之前， Hello Kitty 已經係纜車等緊大家。唔單止纜車車飛上印上Hello Kitty 公仔， 15 架纜車也會變身成 Hello Kitty 主題車廂，等你一次過將 Hello Kitty 同沿途優美自然風光盡收鏡頭之內！
▲ 纜車車票上印有 Hello Kitty 公仔，粉絲一定要留為紀念啊！
▲ 只有 15 架纜車是 Hello Kitty 主題車廂，而且仲要係水晶車廂先有，要搭到唔只要俾多 D 錢，仲要俾 D 耐性啊！
▲ 車廂內外都有 Kitty 貼紙，咁就可以一次過將 Hello Kitty 同沿途優美自然風光盡收鏡頭之內。
▲ 離開車廂，沿路都貼滿好多 Kitty 同佢家人好友的裝飾架！
市集 Kitty 融入大澳特色
到達市集，一個個充滿大澳自然及文化風情的 Hello Kitty 裝飾等緊你同佢地合照。坐纜車的 Kitty、同牛牛玩緊的 Mimmy、垂釣中的爺爺、忙著曬鹹魚的嫲嫲、掘緊蜆的 Dear Daniel，仲有買緊小食的爸爸和媽媽，每一個都造型可愛。同時，配合聖誕，每個裝飾旁都放置了以蝴蝶結形狀裝飾的聖誕樹，為水鄉增添節日歡樂氣氛。
▲ 圓形廣場嘅巴士站以 Hello Kitty 蝴蝶結點綴長椅、巴士站牌也有可愛嘅蘋果圖案。
▲ 聖誕樹以蝴蝶結形狀做裝飾，好有 Kitty feel 呢！
▲ 踏入昂坪市集，Kitty 爺爺係棚屋前垂釣，而嫲嫲則忙著曬鹹魚同蝴蝶結形蝦醬。
▲ 另一邊 Dear Daniel 係海邊掘蜆，準備加送。
▲ Hello Kitty 就係旁邊觀賞中華白海豚。
▲ 再走入去，Kitty 係美食攤檔售賣緊大澳小食－炭燒雞蛋仔。(好彩唔係 Kitty 頭形嘅雞蛋仔)
▲ 隔離係爸爸、媽媽賣茶粿。
▲ 最後仲有檔豆腐花呢！不過呢個裝飾好似唔太覺眼。
AR 與葉問隔空切磋
昂坪市集係俾一家大細旅遊的地方，又點可以只有 Kitty 呢？所以市集亦新增了「葉問體驗館」，將電影中曾出現的精選場景、展示電影主角的戲服及難得一見的正宗詠春兵器盡現眼前。同時，只要下載「葉問3」軟件，就可以利用手機程式科技擴增實境技術（AR），將 1:1 的電影主角即時帶到現場，透過手機屏幕和大家互動。
▲ 雖然館內有 Wifi ，不過下載都需要一段時間，要耐心等待啊！
▲ 開咗個 App ，之後掃瞄場景內的 QR code ，葉問同張天志便會立即現身啦！
▲係《葉問3》中，天志大武館係葉問同張天志互相對決的重要場景。透過 AR ，你就可以同葉問切磋武藝啦！
▲ 呢度的其中一個亮點係專程由上海劇組運回來的原裝詠春標記「木人樁」和旁邊的電影原裝兵器展示架，當中更有電影中出現過的詠春鎮派孖寶—「八斬刀」及「六點半棍」。
▲ 另一個場景係費蘭奇的地下拳館，你可以同泰臣拳擊搏鬥。
▲ 當然不少得在地下拳館場景旁，展出了電影中泰臣和甄子丹穿過的戲服。
▲ 另外藥房場景所擺放的所有藥物，都按照40年代葉問於香港的時期而製造，大部份是電影中出現過的原裝道具。藥房場景旁亦展出電影中張永成的旗袍戲服。同樣，以手機對準金漆招牌，女主角熊黛林便會出現手機屏幕同你合照 (雖然有 D 恐怖)。
依莉詩點評
坦白講，市集山長水遠，又低幾度，冬天要去記得著多件衫，今次 Kitty 的裝飾如果放係大澳或者商場會吸引好多，起碼除咗影相都可以做下其他嘢。至於葉問體驗館，雖然免費入場，但要係市集消費先入得，入到去可能 15分鐘就行完，對於本地人吸引不大。當然昂坪市集始終都係 for 旅客的地方，間唔中有 D 新嘢就會有人去，或者偶然帶爸爸媽媽來一次本地遊都 OK 嘅。
聖誕氣氛 ★★★☆☆
必影指數 ★★★☆☆
日期：2015 年12 月3 日至 2016 年3 月8 日
地點：昂坪市集
Leave a Comment