小米上星期在北京所舉行的發表會上公佈了不少新產品，除咗紅米 Note 3 之外，過去一年網上不斷傳聞小米將會推出最新款的小米平板 2 亦係一大重點，輕薄全金屬機身作為賣點，並會推出三個不同版本，而最令人意外的是其中一個版本將會採用 Windows 10 為系統，但 Win10版本要12月下旬才開售，想知籮文手上依部小米平版2 抵唔抵玩就請閱讀以下文章！
飛甩膠感 金屬機身
由上一代嘅青春色系膠機身，今代改到全鋁合金的一體式機身設計，機身色系仲有太空銀及香檳金以供選擇，都夠高貴。由膠變金屬當然感覺高級咗，但係手感冇因此變差。小米平板 2 厚 6.95mm 重 322g，比起對上一代薄 18% 及輕 38g。但係注意，金屬機身真係幾跣手，籮文試機時都跌咗幾次落枱，但係機身又冇花嘅。其實小米平板 2 整體外型都唔差，但有一個位就令籮文覺得好礙眼…一開盒拎部機出黎，睇到機背最頂位置有粒黑色嘢，我以為係污糟，用指甲想摑甩佢。摑唔甩先發現，原來係 Mic 黎嘅。
▲睇到機背最頂位置有粒黑色嘢，我以為係污糟，用指甲想摑甩佢。摑唔甩先發現，原來係 Mic 黎嘅
跟足 Apple , 卡都冇得入
第一代只有 16GB 版本選擇，但係就支援 MicroSD 卡擴充容量，而今次小米平板2 做到真正嘅一體化，就係連 MicroSD 卡都冇得入。小米平板2 有16GB及64GB容量以供選購，手上的16GB版本一開盒就已扣4GB，只淨 12GB 可用空間。視乎用途啦，如果買黎都係用作睇線上影片用，16GB都夠嘅。
▲Download 多兩隻 Game，淨返10.32GB
6,190mAh 電池 用 MicroUSB Type-C
機身更薄更輕係要付出代價，第二代的電池容量為 6,190 mAh，比第一代少約 500 mAh，其實 500 mAh 話多唔多，話少唔少，但可能因為第二代有經過軟件優化，日常使用持航力都可以用到一日。而今次小米平板2 用上 MicroUSB Type-C，除咗雙面都插得之外，仲支援 5V / 2A 快充，盒內附送嘅充電線係 USB Type-B to MicroUSB Type-C，唔似 Nexus 5X 兩頭都係 Type-C 咁麻煩。
7.9吋螢幕 2K解像度
同上一代一樣，用上7.9吋 2048×1536 解像度螢幕，解像度係1080p 的 1.5倍，像素密度有 326 ppi 都算唔差，即使「聞 Mon」嘅距離都唔會見到文字有起格情況。此外，籮文發現螢幕亮度十足，較到最光時直頭會覺得「燦」眼，相信烈日當空下使用都可以輕鬆閱讀畫面。
▲像素密度有 326 ppi 都算唔差，即使「聞 Mon」嘅距離都唔會見到文字有起格情況
▲籮文發現螢幕亮度十足，較到最光時直頭會覺得「燦」眼，相信烈日當空下使用都可以輕鬆閱讀畫面。
影相都係用返手機啦
小米可能知道影相功能對於平板黎講已經唔重要，所以無再升級相機功能，保留上一代嘅800萬像素後鏡及500萬像素前鏡。雖然無升級，但效果都算係合格，後鏡有 f/2.0 光圈，與主體距離近少少時都可以影到散景效果，環境夠光時畫質都可以接受，但如果黑暗地方拍攝畫質就麻麻，放大可以見到明顯油畫化。
▲800萬像素相機表現比想像中好，線條細緻。
▲油畫化都未算嚴重，但環境太暗時，好易影到鬆郁矇
效能OK 冇窒機
用上 Intel Atom X5 2.2GHz 處理器，2GB RAM，於 MIUI7 介面上操作好順暢，用左大半日都鮮有窒機情況，惟玩 3D Game 時會有跳格情況。跑安兔兔得分為 76994分，僅次於 HTC ONE M9。留意第二代小米平板會推出三個不同版本，其中一個版本將會採用 Windows 10 為系統，但 Win10 版本要12月下旬才開售。
籮文：「金屬機身夠硬淨」
老實講依部第二代小米平板應該係價錢平，功能上都足夠日常文書處理或者睇片用，而金屬機身都令一部平價機睇落更加高貴。如果你需要一部平板放喺俾小朋友玩，又或者普通 Presentation，依部都係一個好選擇。十二月下旬會推出 Windows 10 版本，好似仲更加吸引。
