最近有朋友問筆者：究竟買手提電腦買邊部好？咁當然啦，唔同人唔同需要，選擇都會唔同。但唔知有幾多 wire 民都係同筆者朋友一樣，想買番部出去見客唔失禮，樣又俾人感覺專業，又容易用呢？喺今次故事，筆者就拿來市場上最受商務用家歡迎的兩部手提電腦：Apple MacBook Air 13″ 同埋 Lenovo ThinkPad X1 Carbon 比一比，等大家喺買手提電腦個時，都可以有個參考啦。
輕薄型機款選擇要慎重
對於商務用家來講，多數都係成日要出街用電腦，揀嘅機款多數都係諗輕薄型款式。但選購輕薄型手提電腦，其實有幾方面要注意的，而家就等筆者同大家分享下啦。
一）機身要夠紮實
既然成日要拎出街用，機身一定要夠紮實啦。筆者唔只係講緊跌落地無咁易整爛個種紮實，其實輕薄型機款有啲比較平嘅款式，為咗盡量偷薄機身，都未必會對機身有太多保護，變成如果將部機放入公事包或者背囊，一個唔覺意大力壓落去，隨時會整壞部機，通常呢啲情況熒幕係首當其衝！大家都知道，一部電腦熒幕維修費通常都唔平，萬一買部平嘢但整番個熒幕要 2/3 部機嘅維修費，咁就無謂啦。
二）電量係重點
成日拎出街用，除咗機身之外，電量都一樣咁緊要！始終喺街都唔係咁易搵到插蘇頭幫部電腦充電，以前就係唔少輕薄型 Windows 手提電腦，使用時間都只係得 3、5 個鐘，最後令唔少打算入手輕薄手提電腦嘅商務用家轉投 Apple 懷抱。但今時今日 Windows 手提電腦嘅使用時間已經長咗好多，通常 8 至 10 個鐘係等閒事，加埋升級去 Windows 10 之後，相信應該可以進一步加長使用時間。如果大家今日選購輕薄型手提電腦，就唔洗局住揀 Apple 啦。
三）注意 Windows 機要係 Win 10 先好買
之前 Windows 7 相信令唔少電腦用家都用得好滿意，但 Windows 8 / 8.1 筆者只能以「難用」來形容，相比 Mac OS X 喺呢兩年就加入咗唔少實用嘅新功能，此消彼長下，大家想選購輕薄型手提電腦，自然會先考慮 Apple 嘅 MacBook Air。但自從 Microsoft 推出 Windows 10 後，唔止無咁食資源，整體操控都快咗好多，仲令電腦無論有冇觸控熒幕都咁好用，筆者甚至覺得比 Windows 7 更加好用！加上之前預載 Windows 7 / 8.1 嘅電腦，都可以免費升級去 Windows 10。有咗呢個新 OS，大家揀輕薄型機款就有更多選擇啦。
邊部好啲？Lenovo ThinkPad X1 Carbon vs Apple MacBook Air 13″ 大比併
頭先都提過，如果講輕薄型手提電腦機款，Lenovo 嘅 ThinkPad X1 Carbon（下簡稱 X1 Carbon）同埋 Apple 嘅 MacBook Air 13″（下簡稱 MBA）係最受用家歡迎嘅兩部機款。但兩部機究竟揀邊部好啲呢？以下筆者就以日常生活應用作實例，同大家比一比。
一）邊部輕身啲？
根據官方數字，X1 Carbon 重量為 1.31kg，而 MBA 重量就係 1.35kg，兩者數字上相差只係 40g 左右。而真係拿上手或者放入公事包拿出街，感覺其實唔差太遠，所以如果講邊部輕身啲？數字上係 X1 Carbon；但實際用落，差唔多。不過如果計番 X1 Carbon 係一部 14 吋熒幕手提電腦，而 MBA 只係 13 吋熒幕機款，咁 X1 Carbon 就真係優勝啲嘅。
▲外攜來講，X1 Carbon 作為 14 吋機款相比 MBA 真係輕身少少，但要好認真甚至兩部機同時拿住先 feel 到。
▲至於 MBA 來講，一樣都係好輕身，但要記住呢部只係一部 13 吋熒幕嘅機款……
▲但如果放入公事包或者背囊，個 40g 重量差距就唔係好 feel 到了。
▲不過外殼來講，X1 Carbon 會比較容易黏上指紋或其他污糟物，相反 MBA 由於採用金屬外殼，所以就無咁易黏上指紋等，對於有潔癖嘅用家，可能會有啲介意。
二）邊部硬淨啲？
之前都提過，輕薄型機款帶出街，自然要以「硬淨」為首要考慮因素。今次兩部受測機款，X1 Carbon 採用咗碳纖維機身，是一般用來製造飛機同埋賽車嘅物料，而且機身據官方表示通過多項獨立軍事級別測試（如塵埃、震盪、高溫、低溫、高度、水、濕度、太陽輻射、真菌及鹽霧的抵抗力測試），硬淨程度應該唔洗點懷疑；至於 MBA，就採用了全金屬物料一體成形 Unibody 機殼，雖然官方未有表示採用什麼物料，但以筆者使用經驗都屬於好硬淨嘅物料。所以於「硬淨」程度來講，兩部機可以講係打成平手。
▲X1 Carbon 採用碳纖維機身，加上據官方表示通過多項軍事級別測試，真係好硬淨。
▲至於 MBA 方面，就採用全金屬物料一體成形 Unibody 機殼，同樣硬淨。
三）端子邊部齊？
出街機又要輕薄款式，其實都預咗端子唔會好似重甸甸嘅 Desktop Replacement 機款咁齊㗎啦。但出到街用，如果太少搞到用起來唔方便，咁又唔得。兩部機入面，X1 Carbon 就有 HDMI 輸出，去到人哋公司做 present，只要對方有條 HDMI 線同埋有 HDMI 端子嘅電視 / 投影機就得，唔洗驚好似 MBA 咁唔記得帶轉線。USB 方面，兩部機都有兩個 USB 3.0 插頭，睇落好似平手，但 X1 Carbon 就擁有 AOU（Always-On USB 3.0），就算關咗電腦，只要電腦駁住火牛，USB 都仍會繼續供電，用來差手機一流。
不過 MBA 都有佢嘅優點，就係內置 SD 讀卡器，唔似 X1 Carbon 咁要外駁讀卡器先可以讀到 SD 卡入面嘅相 / 片，對於成日要過相過片嘅用家來講真係比較方便。不過整體來講，筆者覺得 X1 Carbon 端子齊得來實用好多，尤其係 HDMI 插頭，做 present 唔洗驚忘記帶轉線，對商務用家來講真係幾重要。
▲X1 Carbon 內建 HDMI 輸出，唔洗驚出去 present 唔記得帶轉線，搞到駁唔到大熒幕。
▲X1 Carbon 嘅 USB 仲支援 AOU 功能，就算關咗電腦，只要係駁住火牛，都一樣可以充電。（大家可以留意 ThinkPad 標誌上的紅點沒有著，代表電腦處於關機狀態，並非休眠。）
▲至於 MBA 方面，缺點係只有一個 Mini-Display 輸出端子，如果要駁 HDMI 就要另買接線，唔記得帶就麻煩了！
▲不過優點係內建 SD 讀卡器，影咗相之後可以直讀檔案，唔洗另攜讀卡機。
四）熒幕邊部靚？
每部手提電腦，用家每日對得最多會係邊個部件？無錯，就係熒幕！所以熒幕質素好壞，對使用感受都有好大影響！今次兩部機款，X1 Carbon 採用咗 14 吋 1080p 解像度熒幕，而 MBA 就採用 13 吋 1,440 x 900 解像度熒幕，單係視野範圍來講，MBA 真係無 X1 Carbon 咁大。另外，X1 Carbon 採用防反光啞面熒幕，而 MBA 就採用鏡面熒幕，無疑鏡面熒幕用來睇戲打機畫面會感覺比較靚同鮮色，可視角度亦相對較高，如果係一般用家，比較多時間會拿部機來睇片睇相或者打機，MBA 似乎比較理想。
但對於商務用家來講，尤其是係室外工作或用電腦，熒幕反光會令雙眼容易感到疲倦，X1 Carbon 嘅防反光熒幕，就算長時間睇都唔會覺得辛苦，而且低啲啲嘅可視角度，亦可以防止係出面做嘢個時，坐係旁邊嘅八卦精偷睇你嘅公司機密。所以對於商務用家來講，X1 Carbon 嘅熒幕似乎更加實用。
▲X1 Carbon 熒幕解像度為 1080p，解像度較高，顯示範圍亦較大。
▲至於 MBA 就只有 1,440 x 900 解像度，睇網頁時顯示範圍相比較細。
▲X1 Carbon 熒幕設有防反光設計，雖然可視角度相對較窄，但就能有效防止身邊「八卦精」偷睇你電腦熒幕上面顯示緊嘅嘢，而且係室外工作亦可防止熒幕反光令雙眼容易疲勞（大家可以見到光管照住都仍然睇到內容）。
▲至於 MBA 就採用鏡面熒幕，感覺係較鮮較靚，可視角度亦較高，但係室外工作遇上陽光，會比較反光，睇得無咁清之餘雙眼亦因為反光覺得剌眼，所以容易感到疲勞。
▲用上防反光熒幕嘅 X1 Carbon，用來睇 1080p 60fps YouTube 影片，可見熒幕有明顯偏藍情況，多媒體表現只屬一般。
▲至於用 MBA 播放同一段影片，一向多媒體表現都係強項，所以用 MBA 來睇片效果真係好好多，最少女角膚色唔會變做「藍血人」。
五）邊部最好打？
對於商務用家來講，除咗熒幕，第二個平日用得最多嘅部件，肯定係鍵盤！尤其係要成日打 proposals、開單嘅用家來講，打字感受就更加重要。如果單純講鍵盤打字感受，X1 Carbon 同 MBA 嘅按鍵表面面積其實都係大約 15 x 15mm，不過鍵深方面，筆者試用過覺得 X1 Carbon 會去得比較深，同埋回彈力都比 MBA 好，對於要長時間打字嘅用家來講，相對會無咁易累。所以單純講邊部機鍵盤最好「打」，MBA 雖然都唔差，但真係要好似筆者咁好長時間打字寫稿，我就覺得 X1 Carbon 比較舒服啦。另外 X1 Carbon 的鍵盤更具備防濺水設計，就算唔小心倒瀉水落鍵盤上面，都唔會整壞電腦，呢一點 MBA 就較為遜色了。
至於操控方面，X1 Carbon 可以用鍵盤、TouchPad + 幾種手勢及 ThinkPad 自家嘅小紅點 + 滑鼠左中右鍵操控，部分機款更可以加入觸控熒幕，用手指直接點擊熒幕操控；而 MBA 就只可以用鍵盤同埋 TrackPad + 手勢操控電腦，幸好係手勢操控上，採用 Mac OS X 嘅 MBA，真係比採用 Windows 10 嘅 X1 Carbon 全面同易用得多。所以操控上，兩部機可以講係各有優點。
▲X1 Carbon（上）同 MBA（下）按鍵表面面積其實一樣，只係外形有少許唔同，前者底部有少許彎彎設計，而後者就採用全正方形設計。
▲X1 Carbon（上）同埋 MBA（下）嘅鍵盤都有背光功能，係漆黑環境都可以打到字。
▲X1 Carbon 鍵深較深，回彈力亦較好，長時間打字手指都唔會覺得累。
▲至於 MBA 鍵深就相對較淺，而且回彈力較差，長時間打字點都會累。
▲X1 Carbon 除咗鍵盤同 TouchPad + 手勢操控，仲有自家嘅小紅點 + 滑鼠左中右鍵操控電腦，有啲型號仲有埋觸控熒幕設計，操控上更全面。
▲MBA 就只有鍵盤同 TrackPad + 手勢操控兩種選擇，不過老實，如果單純用手勢操控來去睇，MBA 採用嘅 Mac OS X，確係比 X1 Carbon 採用嘅 Windows 10 多元化同好用得多。
六）邊部最安全？
其實仲有一點商務用家係好重視，個樣就係保安！畢竟帶出街嘅跟身輕薄手提電腦，往往會內藏好多公司嘅機密資料，如果部電腦嘅加密程度做得唔夠好，萬一唔見咗電腦，唔見機事小，入面嘅機密資料流出，導致公司有各方面損失，先係最大鑊嘅事！至於兩部機嘅保安功能，X1 Carbon 就內建咗指紋辨識器，唔止令大家登入電腦更方便，唔洗輸入水蛇春咁長嘅密碼，如果配對合適軟件，更能有效保護電腦內嘅機密資料，令偷機者或者執到電腦嘅人「得到部機，都得唔到入面嘅料」。
至於 MBA，都有佢嘅保安功能，Apple 內建咗「FireVault」功能，只要開啟咗呢個功能，就會自動加密磁碟內嘅內容，要開啟呢啲檔案，就要輸入密碼先得。雖然保安上都算安全，但軟件加密始終唔及硬件加密，所以係安全性能上，X1 Carbon 似乎比較出色。
▲X1 Carbon 內建指紋辨識器，令登入電腦更方便。
▲至於 MBA 就無內建指紋辨識器，只能靠 Mac OS X 內建嘅 FireVault 功能為電腦內檔案進行加密。不過軟件加密感覺總係比硬件加密無咁安全吧？
七）邊部最長氣？
最後一點，亦係大家都關心嘅選購因素，就係：邊部最長氣？筆者為咗係短時間測試出效果，就同時用兩部電腦，熒幕均調至最光，並播放同一段 1080p 60fps 解像度嘅 YouTube 影片大約 70 分鐘，睇下兩部機都係 100% 電量情況下，兩個鐘後各自剩番幾多電？最後結果係 X1 Carbon 剩下 61% 電量，而 MBA 就剩下 74% 電量。如果按此比例計算一下，係呢個使用環境下，X1 Carbon 由 100% 電量用至 0%，大約可以使用 179.5 分鐘，換言之大約係 3 小時左右；而 MBA 係呢個使用環境下，由 100% 電量用至 0%，就大約可以使用 269.2 分鐘，換言之大約係 4 個半鐘度。
當然，一般人平常使用手提電腦，係無插火牛情況下，都唔會將熒幕光度去到咁盡，所以兩部機係一般情況下，X1 Carbon 估計應可使用 5 小時左右（官方規格內聲稱可使用 10.9 小時），而 MBA 就估計應可使用 7 個半鐘左右（官方規格內聲稱可使用 12 小時）。可見 MBA 係使用時間方面唔止比較長，亦比較貼近官方聲稱嘅使用時間。似乎 Windows 手提電腦係「長氣」能力上，仍然同 MBA 有一段距離。
不過值得一提的是，X1 Carbon 支援快速充電技術，唔洗一個鐘就可以差到 80% 電量，算是對相比較短使用時間的一項彌補吧。
▲播咗 70 分鐘 YouTube 片之後，X1 Carbon 剩下 61% 電量。
▲而 MBA 播咗 70 分鐘 YouTube 片之後，就剩下 74% 電量。
總結：Lenovo ThinkPad X1 Carbon 商務功能稍勝一籌
整體來講，其實今次受測兩部機款，對於成日要出街用電腦嘅用家來講，都係好出色嘅機款。不過如果真係要分出勝利者，Lenovo ThinkPad X1 Carbon 始終係較為出色嘅一部，唔止夠輕夠薄夠硬淨，熒幕、鍵盤、端子設計、甚至保安性能，亦係針對需要成日出街做嘢嘅商務用家度身訂造。加上佢原生就採用 Windows 作業系統，對於習慣用 Windows 機嘅用家來講，唔洗特登學點用個新 OS，亦可以用番哂之前用開嘅軟件，可以講係無痛升級。
唯一係 X1 Carbon 係售價上比 MBA 貴少少，而且使用時間確實不及 MBA。但從另一角度去睇，以 X1 Carbon 額外提供嘅功能同設計，加上提供 3 年國際保養，MBA 如果要做到同等的保養期，就要另加接近 2 千蚊購買 AppleCare 先得，所以 X1 Carbon 購買時價錢貴一截都仍算合理，所以如果大家近期想揀番部輕薄型可以成日拿出街做嘢用，個樣又見得下人嘅手提電腦，Lenovo ThinkPad X1 Carbon 似乎較 Apple MacBook Air 13″ 適合。
選購 Lenovo ThinkPad X1 Carbon 小貼士
如果大家決定選購 X1 Carbon，以下有兩個小貼士俾大家參考一下，等大家可以以最合適嘅價錢，買到最適合自己用嘅機款：
一）上官網買更多選擇
當然，如果大家只係想揀預設規格，去邊間有賣 X1 Carbon 嘅零售商買都無問題，而且可以即時拿機走。但如果大家想進一步強化規格，去令部機更適合個人需要，上官網買肯定係最佳選擇。一來型號選擇較多，無論大家係想用咩 CPU、想要幾大 storage、要唔要觸控熒幕、解像度係 1080p 定係 2K，統統有相關預設規格機款俾大家揀；就算都係唔啱心水，喺選擇機款後仲可以自行升級某啲規格，例如：storage、配件等，而最重要係大家就算足不出戶，都可以買到新機，因為係官網買機係包埋免費運送服務，只需要幾日就會送到你屋企或者辦公室，唔洗同人係腦場或商場鬥迫，又可以揀到啱心水機款，仲唔係最佳選擇？
官網連結請按此
▲上官網買 X1 Carbon 選擇會比係舖多好多，單係預設 config 都有 6 款俾大家揀。
▲揀完之後大家仲可以進一步升級儲存空間，又或者加購唔同嘅配件。
二）學生 / 教職員 / 舊生都有優惠
相信唔少學生、教職員或者舊生都會趁每年暑假嘅 Back-To-School 優惠期買新機，但萬一過咗點算？唔通要用正價買機，又或者要等廠方提供優惠先得？咁又唔洗！其實 Lenovo 有提供官方嘅教育商店，只要用學校提供嘅 email（通常都係 .edu.hk 字尾）建立自己嘅 account，咁就任何時間都可以用到 educational offer 以筍價入手新機啦！不過要留意，每個戶口每年只限購買一部新機，唔好諗住幫埋屋企人或者朋友買呀！
教育商店官網請按此
Leave a Comment