唔經唔覺原來我已經喺 Unwire 寫左一年 自我科技觀察 港女週記喇！睇返一年前嘅第一篇文，原來我一開頭係想同大家分享我喺 IT 界工作嘅趣事，哈哈！寫寫下都少左講自己，因為我擔心各位讀者接受唔到我太白痴，會出言悔辱我… 哎呀 Treegun 上身，係侮辱至真，咁我就少左個賺取無限商機嘅機會吖嘛… 嗱嗱嗱，趁住一周年，我又分享下我啲工作近況啦～
其實我覺得我喺過去呢一年已經進步左好多架喇，之前一開始返工，如果你同我講 UX、UI、API、.apk、Machine Learning、Big Data、XYZ Algorithm、Cloud… 我只係會覺得你講火星文，一頭霧水，完全覺得自己係零。想同啲業內人士傾計？水都冇得你吹呀！因為我唔知佢地噏乜，亦都唔識搭嗲。
而最搞笑嘅係，返工係會接觸好多 IT 界中做唔同範疇嘅人，有啲人做醫療科技，有啲人寫 App，有啲人做機械等等，次次當我以為自己好似明明地一樣野個陣，又會有啲新 Term 彈出黎，OK Fine，本來由零到一嘅距離就係好彈性架啦，繼續由零開始囉。有時有啲人話：「你唔使同佢講咁多架喇，佢唔會明架」，我唔介意嘅，因為佢都係講事實，大家嘅起跑線都唔同，我認冇底係差啲嘅，但有時諗返起都幾 Hurt，直情就係「貧者越貧，富者越富」的道理。
開頭真係會有啲沮喪，但份工係自己揀，仆街都冇得喊。既然 Technical 野唔得，咪避重就輕，做其他唔使咁 Technical 嘅野囉，工作幾時都係自己創造價值架啦！而家雖然我都識唔晒嘅（識晒我就唔係度做啦），但至少可以足夠理解啲 IT 人做緊啲乜，然後寫得返出黎（跳起 Yeah）！
其實唔識最緊要就係肯學，好似今年出黎區選啲後生仔咁，冇選舉機器幫你，冇財雄勢大的黨 backup，冇鐵票，咪自己勤力啲，落多啲區，做多啲功課，揼下石仔深耕細作囉。雖然人地唔會睇你個學習過程，只係睇到結果，但學到嘅野永遠都係自己嘅，我而家仍然努力學習中架，如果小妹有咩不足，希望各位大大高抬貴手，新一年繼續多多指教！
多傻唷囉師姑餓呢街師媽s～（日文黎架，唔係亂碼?）
