HMV 於 2013 年初曾經宣佈破產，好彩有白武士拯救，並進行大改革，先加開中環 HMV Ideal，早幾日再於銅鑼灣開了一間旗艦店，標榜「音樂‧時尚‧餐飲」集結一身，4樓嘅 HMV Restaurant & Bar 更加係開到凌晨兩點鐘，籮文當然去咗潮聖一吓，想知新店有幾正，閱讀以下文章啦！
點樣去呢？
依間新開嘅 HMV 旗艦店座落於銅鑼灣名珠城，只要到銅鑼灣港鐵站 E 出口一出，轉左再轉左，就會見到好大棟 HMV。話說籮文搭港鐵到銅鑼灣站一落車就見到好多 HMV 嘅廣告，一定唔會去錯出口，出咗去之後又見到一班靚女 Promoter 做我嘅指路明燈，包保唔會唔識路。
▲出咗去港鐵站之後又見到一班靚女 Promoter 做我嘅指路明燈
▲依間新開嘅 HMV 旗艦店座落於銅鑼灣名珠城，只要到銅鑼灣港鐵站 E 出口一出，轉左再轉左，就會見到好大棟 HMV
佔地 40,000 尺 變身「HMV 商場」
位於銅鑼灣名珠城 2 樓至 4 樓 的 HMV 旗艦店，佔地約 40,000 平方尺，籮文一去到都「嘩」咗一聲。標榜「音樂‧時尚‧餐飲」集結一身，二樓就賣黑膠、CD、DVD 等，而三、四樓則最令人驚喜，三樓除咗耳機及喇叭等影音周邊產品，仲有時裝、單車用品等 Lifestyle 產品。行完下面兩層，可以到四樓酒吧及餐廳坐一下。
▲中央天井位置可以一覽透視三個樓層
二樓 音樂、電影、玩具 主打黑膠
一進入 HMV，四圍都係黑膠碟，同時亦有黑膠唱機及配件，例如唱針等。當然繼續有好多音樂 CD、電影 DVD 或 Bluray 碟。最特別之處係可以見到英式電話亭及郵筒。雖然電話亭只係裝飾（入面冇電話），但唔知 HMV 會唔會定期將英式郵筒入面的郵件收集並寄出呢？
▲一進入 HMV，四圍都係黑膠碟，同時亦有黑膠唱機及配件，例如唱針等
▲當然仍有好多 CD。不同音樂類別都分佈在 2 樓不同位置，Jazz 及 Classical 更自成一閣。
▲雖然電話亭只係裝飾（入面冇電話），但唔知 HMV 會唔會定期將英式郵筒入面的郵件收集並寄出呢？
▲籮文見到黑膠區域內有一個櫃枱，雖然未有員工駐守，但上面有個牌寫住 “Records Listen Buy.Sell.Trade”，難道遲啲會有二手黑膠交易服務？
三樓 影音產品 及 Lifestyle
睇完碟可以上三樓睇耳機、喇叭等影音產品，不同品牌都有一個個玻璃包圍的專區，例如 B&O Play、Beats、Philips 等，客人可以入內試用產品。除了影音產品，還有單車用品、時裝等其他 HMV 分店缺少的產品。
▲不同品牌都有一個個玻璃包圍的專區，例如 B&O Play、Beats、Philips 等，客人可以入內試用產品。
▲就連單車都有得買
▲好齊全的 Minions 精品！
行到攰 上四樓飲杯嘢
終於到籮文最期待的四樓，有一間 Bar ＆ Restaurant，行到累了可以食餐勁。除了餐廳，四樓有一個 Gaming 區，可以試玩 Oculus rift VR 遊戲。
▲終於到籮文最期待的四樓，有一間 Bar ＆ Restaurant，行到累了可以食餐勁。
▲除了餐廳，四樓有一個 Gaming 區，可以試玩 Oculus rift VR 遊戲。
籮文：「唔係 HMV 分店咁簡單，直頭係一個商場！」
正確啲黎講，依間並唔係分店咁簡單，入面除咗其他分店都有嘅影音周邊產品，仲有衫褲鞋襪、太陽眼鏡、單車用品又有餐廳，要行晒依間 40,000 呎嘅 HMV 商場，籮文敢講，冇一個鐘都行唔晒。Bar & Restaurant 仲開到凌晨兩點（只限星期五、六及公眾假期前一天），以後半夜去銅鑼灣除咗食一蘭之外，仲可以去食 HMV！依間 HMV 旗艦店暫時仲係試業階段，除咗以上有嘅嘢，仲有不少服務有待開放，例如二樓飲品亭將會投入運作，睇碟睇到口乾可以買嘢飲呀嘛！
地址：銅鑼灣百德新街22-32號名珠城 2 至 4 樓
營業時間：
2/F & 3F Entertainment & Lifestyle
星期日至星期四：10:00 a.m. – 11:00 p.m.
星期五、六及公眾假期前一天：10:00 a.m. – 11:45 p.m.
4/F Bar & Restaurant
星期日至星期四：10:00 a.m. – 00:00 a.m.
星期五、六及公眾假期前一天：10:00 a.m. – 02:00 a.m.
分享到 :
最新影片
