之前 Edward 曾經為大家測試過 iMac 21.5″ 4K 嘅表現如何，相信大家都心中有數吧。個時有讀者就問我：咁最新版本嘅 iMac 27″ 5K 又值唔值得入手？今日 Edward 就終於買咗 iMac 27″ 5K (2015)，究竟用落點而家就同大家分享一下。
21.5″ 4K vs 27″ 5K 分別係邊？
好多人會問：iMac 21.5″ 4K 同埋 iMac 27″ 5K 除咗後者機身大啲，熒幕解像度高啲之外，仲有咩分別？其實主要係 3 樣，陳列如下：
- 處理器時脈比 21.5″ 4K 高 0.1GHz，達到 3.2GHz，而更重要嘅係，只有 iMac 27″ 5K 係採用 Intel 最新嘅 Core i 第六代處理器（Skylake），而 iMac 21.5″ 4K 只係用上一代嘅 Core i 第五代處理器（Broadwell）
- 標準配置已可選擇 Fusion Drive 唔洗後加（不過筆者發覺大家揀最低配置再加去 1TB Fusion Drive 都只係 $14,668，相比上一級標配有 1TB Fusion Drive 去到 $15,488，足足平咗 $820！不過如果揀呢部就無得升級 CPU 去 Core i7，硬碟亦無得揀 1TB SSD。如果大家唔打算升 CPU 同埋 1TB Fusion Drive 都夠，不妨咁樣揀最抵！）
- 設有獨立顯示卡 AMD Radeon R9 M380（配備 2GB VRAM），對於需要剪片、處理立體圖像、或者玩對圖像處理要求較高遊戲嘅 wire 民來講，會比用 21.5″ 4K 正好多！
▲21.5″ 4K 同 27″ 5K iMac 除咗機身大細、熒幕大細同埋熒幕解像度外，主要分別係 CPU 同埋後者會有獨立顯示卡。
▲仲有一樣分別，就係 iMac 27″ 5K 機背仲保留咗個蓋，大家仍然可以自行加 RAM，而 21.5″ 4K iMac 就唔得了。
▲插槽方面，大細 iMac 都係相同的。
如果你問筆者邊部好啲？我會反問番大家：你嘅需要係邊？睇番上面三大分別，再睇埋屋企 / 辦公室有冇位擺大機，之後揀番最適合自己嘅機款，咁就係對你最好嘅機款啦。
熒幕比 iMac 21.5″ 4K 更準色！
之前試 iMac 21.5″ 4K 個時，Edward 都同大家分享過佢個 4K 熒幕色準已經算好準確，加上銳利度同細緻度好高，用來睇戲打機執相都一流！但當筆者買到 iMac 27″ 5K 之後，雖然佢都一樣係 P3 顯示器，但我用 Spyder 5 測試後，就發覺色準比 iMac 21.5″ 4K 更加準確！尤其是白平衡方面，白色讀數去到 6485K，同標準白色 6500K 極度接近！！基本上可以話，大家用佢來執相剪片，顏色錯嘅機率真係好低。至於亮度方面，最光個時都有 427.68 cd/m2，同 iMac 22.5″ 4K 差唔多。所以如果大家對 iMac 27″ 5K 嘅熒幕有期待，經驗證後筆者可以話俾大家知，呢部機真係唔會令大家失望。
▲同上代一樣都係用 5K 27″ 熒幕，不過就改為採用 P3 顯示器。
▲用來播 4K 60fps 片，唔止好銳利清晰，顏色都自然，而且係呢個效能下都好暢順，完全唔窒。
▲就算一個熒幕切開兩半，一邊睇網頁一邊睇片，睇網頁個邊唔洗放大都睇得清細字。
▲可視角度都好高！
▲用 Spyder 5 測試熒幕。
▲先睇白平衡同亮度，可見熒幕最亮情況下，白色讀數有 6485K，比 iMac 21.5″ 4K 更準。至於亮度都有 427.68 cd/m2。
▲至於色域方面，iMac 27″ 5K 同 iMac 21.5″ 4K 一樣，都去得到 91% AdobeRGB，可見 Apple 係控制產品質素方面真係做得幾好。
▲用 Spyder 5 矯正 iMac 27″ 5K 熒幕後，可見未矯正前（原本設定）人像膚色會偏青一啲，肉色肌膚變咗淡黃色（上圖），當矯正後（下圖）就無呢個問題了。
Fusion Drive 似乎都唔夠 SSD 好
之前 iMac 21.5″ 4K 測試入面，Edward 都同大家分享過千祈唔好用跟機配置嘅 1GB HDD，尤其係如果大家用慣 SSD，用番 HDD 真係會覺得好慢，所以點計大家都應該最少升級去用 1TB Fusion Drive。而筆者今次買到嘅 iMac 27″ 5K，就正係採用 1TB Fusion Drive。雖然大家可能話：嘩！新嘅 1GB Fusion Drive 得 24GB SSD 咋喎，而且只係用來裝個 OS，對讀寫速度應該無乜幫助下話？最多咪加快咗開機關機嘅速度囉。原來筆者都以為係咁，但一試之後結果完全出人意表：唔止開機關機速度快咗好多（開機只需要 19.36 秒入到 login 頁〔HDD 版本 iMac 需要超過 40 秒〕，關機亦只需要 14.08 秒完全關閉），就連讀寫速度都快咗，分別有 135.5MB/s 讀取同埋 121.6MB/s 寫入速度！所以呢樣亦印證到筆者之前嘅結論：買 iMac 千祈唔好揀 HDD 版本，就算預算有限都一定要升級去用 Fusion Drive，預算較多嘅不妨直接升去用 SSD，咁就真係 perfect 池啦！
▲總結上次購買 iMac 21.5″ 4K 買錯 1TB HDD 機款嘅經驗，今次買 iMac 27″ 5K 終於入手咗 1TB Fusion Drive 可以試下。
▲用 Disk Speed Test 測試 1TB Fusion Drive 嘅讀寫速度，讀取有 135.5MB/s，寫入都有 121.6MB/s，單係呢樣都真係比 HDD 機款快好多（之前試過係無論讀、寫都唔過 100MB/s）。
▲完全關閉 iMac 27″ 5K 只需要 14.08 秒，真係好快。
▲而由按下開關鍵起直至去到 login 頁面，都只係需要 19.36 秒開機時候，都係比 1TB HDD 快好多！
總結：iMac 27″ 5K 都唔太係筆者杯茶……
試過哂兩部最新兼唔同尺寸嘅 iMac，如果你問筆者究竟邊部好啲？我會根據自己以下需要來決定：
- 檯面真係無咁大個位放部 27″ iMac，非常佔據桌面空間，對於鐘意玩 dual mon 嘅筆者來講，27″ iMac 真係無 21.5″ iMac 咁實用…..
- 筆者無乜機會剪片，亦極少會打對圖像要求較高嘅遊戲（因為玩呢啲遊戲通常都去返 PS4 上面玩算數……），所以獨顯對於我來講，吸引力不大。
- 熒幕無錯色準係更準，但 iMac 21.5″ 嘅準確度筆者都收貨
- 最重要：抵玩好多！
所以用過 iMac 27″ 5K 之後，筆者都係覺得 iMac 21.5″ 4K 更適合自己。當然，大家嘅需要未必同 Edward 一樣，如果要剪片、做立體圖像等，又或者桌面真係有咁大空間放部 27″ iMac，更重要係預算較鬆動，咁大 iMac 真係會比較適合大家。而對於筆者來講，細 iMac 已經夠用有凸了，我寧願留番 budget 來升級去 1TB Fusion Drive 同埋買番塊 TrackPad 2 來用好過！大 iMac 嘛，始終都唔係自己杯茶……
售價：$13,888 起
查詢：Apple（800 908 988）
分享到 :
最新影片
