昨日 Edward 同大家試過 Nexus 5X 嘅設計、手感、熒幕質素等，今日試多一陣之後，再同大家分享一下 Nexus 5X 嘅效能、影相以及其他方面嘅表現，以及琴日唔少讀者想知嘅各項問題吧！
今次呢部 Nexus 5X，效能其實同 LG 嘅其中一部旗艦 G4 差唔多，只係 RAM 只有 2GB，比 G4 嘅 3GB 少 1GB，另外熒幕由 2K QHD 降為 1080p 而已。不過可能因為 Android 6.0 Marshmallow 原生 ROM 係系統效能設計方面做得更好，加上比 LG 品牌嘅手機少好多其他 APPS，雖然一開機後 RAM 都係得番一半可用（1GB 左右），但整體都仍然好暢順，無 G4 用用下會窒下窒下嘅感覺，感覺算係幾好，筆者甚至覺得用落同一部旗艦機無乜分別！
▲從安兔兔評測可以見到一開機可用 RAM 已剩下 960MB，大約 1GB 左右，無咗一半。
▲不過平時用落真係好順，唔似係一部 2GB RAM 嘅手機。
為咗試盡 Nexus 5X 係效能上去到邊，筆者都用幾隻遊戲試過佢嘅效果，分別為較靜態嘅 Clash of Clans、Angry Birds 2 及 SimCity BuildIt，以及較多動作場合，畫面亦較細膩嘅 Marvel Future Fight 及 Asphalt 8，全部遊戲係遊玩上都極為暢順，感覺同係 5、6 千蚊嘅旗艦機上面玩無乜分別，可見用 3 千幾蚊買到嘅，算係幾唔錯嘅效果，而用安兔兔評測獲得 45,682 分嘅高分，亦印證咗筆者嘅感受係正確嘅。
▲試過係 Nexus 5X 上面玩 Clash of Clans、Angry Birds 2 同埋 SimCity BuildIt，都完全無問題，十分暢順完全唔窒。
▲再係 Nexus 5X 上面試玩 Marvel Future Fight 同埋 Asphalt 8，都一樣好順。
▲用安兔兔評測測試，獲得 45,682 分，以 3 千幾蚊嘅手機來講，仲可以第日第一時間獲得 OS 更新，筆者覺得收貨啦。
不過值得一提嘅係，上一篇文筆者都提過當 Nexus 5X 係高效率運作個時，鏡頭位置會出現比較暖但未至於辣手嘅情況。呢個發熱情況似乎係打機個時更加明顯。筆者只係玩咗 Clash of Clans 同埋 Angry Birds 2，當想載入 SimCity BuildIt（都仲未開始玩 Marvel Future Fight 同埋 Asphalt 8）個時，因為橫向拿住部機，左手拿住 Nexus 5X 嘅位置正正係鏡頭位，發覺開始有辣手嘅感覺。於是用測溫槍再度一度，發覺溫度原來直線上升至 43.8 度！而機背中間同底部位置，溫度亦分別升至 36.8 度及 34.7 度！大家可能覺得：都係溫溫地唧，未至於辣手掛？不過筆者其實係喺冷氣房入面打機，都已經去到呢個溫度，一旦夏天個時係室外打機，溫度隨時唔止呢個度數，屆時隨時真係會辣手！
▲打打下機，筆者就係咁樣拿住部手機，就發覺左手摸住手機個個位有少少辣手。
▲跟手用測溫槍一測，發覺去到成 43.8 度，比昨日用安兔兔評測個時同一位置測到嘅 39.4 度，足足高咗 4.4 度！大家要知道個下筆者只係玩緊 Clash of Clans，而且係冷氣房都係咁，如果夏天係室外打機嘛……
▲機背中央位置都分別升到去 36.8 度同埋 34.1 度，比昨日測試嘅 31.5 度同埋 30.1 度，都高咗唔少…….難怪打幾分鐘機筆者已經覺得部機有少少辣手……
至於相機方面，Nexus 5X 主鏡頭為 1,230 萬像素，而且同 G4 一樣設有雷射輔助對焦功能，佢嘅像素大細亦比一般智能手機大，達到 1.55µm，令相機係表現上，尤其是係較低光環境下拍攝，質素都真係幾唔錯，甚至可以媲美或勝過唔少 5、6 千蚊嘅旗艦手機！而雷射輔助對焦功能，亦令 Nexus 5X 係對焦速度上極為快速，基本上一開相機 APP 就已經影到相，而且筆者係唔同場景下試影過，係未試過有對唔到焦、對錯焦或者迷焦情況出現（使用自動對焦而非手動禁熒幕指定對焦點），用來玩 snapshot 真係一流！而且佢具備 HDR+ 功能，係拍攝擁有高光元素嘅相片時，個啲位唔會爆哂光（例如：廣告牌），仲清晰睇到廣告牌上面嘅光管字，呢點都係令筆者喜出望外之處。不過比較可惜嘅係，佢未有內建而家幾流行嘅 OIS 光學防手震功能，令係比較暗嘅環境下拍攝相片，如果手揸相機 hold 得唔夠穩，就會出現手震情況，導致相片鬆郁矇。
▲介面都係以簡潔為主。
▲從上面影片大家就見到，有雷射輔助對焦，對焦速度真係好快，基本上一穩定機身已經對完焦，而且十分準確。
▲主鏡頭像素為 1,230 萬，唔算好高但一定夠用。
▲上代 Nexus 6 都已經拍到 4K UHD 影片，不過似乎機價太貴；今代 Nexus 5X 咁抵買，又支援 4K 拍片，唔知引唔引到大家拍多啲？
▲模式入面有得拍 Photo Sphere 全景相片同埋一般全景相片，分別係前者係影 720 度全方位全景相片，即係影埋天同地面；而後者就一般 360 度全景相片。
▲一貫嘅影全景設計，有個圈圈俾大家對準去影相，用落都幾容易。
▲連全景相片都可以揀解像度，呢個設定好似係 Android 手機比較少有，不過要留意係如果揀咗高，唔止處理時間都幾長，而且張相出到來都成 8MB 以上！
▲上面係普通全景相片，下面就係 Photo Sphere 全景相片，效果好唔好就見仁見智啦，我就覺得還可接受啦……
▲另外 Nexus 5X 內面嘅鏡頭模糊功能，亦類似我哋一向知道嘅「先拍攝後對焦」功能，不過筆者試過幾次先成功影到一張……都幾難用。
▲影完之後睇番相簿，如果係用咗「鏡頭模糊」模式拍照嘅相片，會見到「如需重新對焦，請輕觸這裡」，點按它之後再點按選擇對焦點即可，而下方係用來調較對焦點嘅精準度。完成後點按「完成」就可以了。
▲影夜景效果都算唔錯，影出來能實際反映現場氣氛。
▲不過放大 100% 睇張相，其實都有幾明顯油畫化情況。
▲拍攝有光差較大元素嘅夜景，都有唔錯嘅效果。
▲影夜景都幾唔錯㗎！
▲中距離到微距效果都幾好，清晰之餘顏色都幾自然。
▲至於 4K 拍片方面，就算拍夜景質素都似乎幾好，唯一係無 OIS，搞到條片都幾震……
▲另外邊行邊拍片，條片就更加震，尤其是好似筆者咁係唔夠光環境下影，真係睇到條片都有啲頭暈……
至於前置鏡頭方面，像素就只有 500 萬像素，而唔似 G4 咁有成 800 萬像素，質素方面縮圖睇個時都還好，但放大 100% 時就會見到因為雜訊較多，導致相片清晰度有所下降，亦有明顯油畫化情況。雖然加入 HDR+ 功能後，相片高光位亮度會自動「禁」低，出番啲細位出來，但筆者試過有機會令臉部亮度下降，變成好似「面黑黑」嘅效果。所以前鏡質素整體來講，只屬網絡分享級數，大家唔好有太大期望。
▲前置鏡頭只有 500 萬，可以話夠用而已。
▲效果如果唔放大來睇都算 OK，但如果同高光物件距離比較近，會出現如上面右圖咁，塊面黑哂嘅情況。
▲而且張相放大來睇，都一樣有油畫化情況。
至於昨日有讀者問到，Nexus 5X 配備嘅 NFC 功能，會唔會讀取唔到八達通資料？筆者就下載咗八達通官方 APP，再用手上嘅八達通試一試，開頭兩次放係機身中間都未能成功讀取，於是筆者再將卡放係機背較高位置（即係鏡頭位置），之後聽到嘟一聲後，畫面就成功顯示出八達通交易資料！證明 Nexus 5X 讀取八達通卡係無問題嘅，不過大家就要將卡放係鏡頭位置先至讀取得到。
▲一開始筆者只係好似其他手機咁，隨便擺張八達通係機背。
▲得到嘅係呢個畫面，話未能閱讀到八達通。
▲以為唔支援，之後再試下放高啲，即係如上圖鏡頭嘅位置。
▲就可以成功讀取八達通入面嘅資料啦。
至於喇叭質素方面，筆者試過用 Nexus 5X 睇 YouTube 影片，發覺因為佢用咗立體聲前置喇叭，所以如果開到最大音量，係絕對夠大聲嘅，不過咁嘅情況下，音質會明顯有所下降，唔止喇叭出現「拆」聲情況，人聲亦因此會變得唔夠清晰。筆者會建議大家開到最多 70%，但呢個音量下，如果身處比較嘈雜嘅地方，就有可能聽唔清楚音效。所以筆者建議大家都係用番耳機聽歌睇戲罷啦。
▲Nexus 5X 採用前置雙喇叭，音量係比上代大聲咗少少嘅。
▲不過睇番呢段片大家就知道，較到 100% 音量係夠聲，但係就拆哂；但較番去 70% 左右，又好似細聲咗啲，人聲都好似矇咗咁唔太清晰。所以筆者建議大家睇片聽歌都係用番耳機啦。
以往嘅 Nexus 手機，亦有另一個問題，就係相比其他品牌，例如：LG、Samsung、HTC 等嘅手機來講，鈴聲相對唔夠大聲，震動亦較弱，搞到大家成日都會 miss call。而去到 Nexus 5X，雖然似乎有所改善，但唔算完全解決，鈴聲係較嘈雜嘅地方（例如：番工放工時間嘅地鐵車箱），仍然係比較難聽到。當然大家可以係「音效與通知」設定入面，開啟「來電時同時震動」功能，但震動強度似乎都唔算太強，如果放部手機係布較厚嘅褲袋，又或者女士們放係手袋入面，仍然有會 miss call 嘅危機。所以如果你身邊有朋友用 Nexus 5X，大家都係唔好太怪責佢成日 miss call 了，因為佢都係無心嘅……
▲至於鈴聲方面，如果放係檯面，地方又夠靜嘅話就都聽到嘅，但係嘈少少嘅地方筆者估計都係有機會聽唔到，加上震動都仍然係唔算強，好似筆者咁放係牛仔褲袋，miss call 機會估計都唔低……
至於試用一晚，各位 wire 民問筆者 Nexus 5X 有冇咩大 bug？我就唔太發覺有，只係試過有一次影完相之後關咗熒幕，過幾分鐘之後想再拿出來影相，再進入相機 APP 時畫面就 keep 住漆黑一片，只剩下相機介面按鍵（但按鍵除快門鍵之外全部係有反應嘅）。筆者試過 force quit 隻相機 APP 再入去，仍然係解決唔到問題，最終需要重新啟動手機，先至解決得到。筆者唔知呢個係咪 Nexus 5X 嘅 bug 啦，如果各位 wire 民入手之後有相同問題，歡迎係文末留言報告一下。
▲筆者試過一日，唯一嘅大 bug 就係好似上圖咁，入到相機但熒幕黑哂影唔到相，要 reboot 部機先影得番。
整體來講，Nexus 5X 係各方面表現上，真係令筆者幾滿意，尤其是相機方面更加係喜出望外，對焦速度之快令佢可以真真正正成為筆者嘅 snapshot 隨身伙伴！雖然相片質素未去到完美，但質素上好老實講已經比好多同價、甚至 5、6 千蚊嘅旗艦手機都要好。唯一係佢最大容量都係得 32GB，又唔可以插 microSD 記憶卡擴充儲存空間，對於會下載好多 APP，又有好多歌同片要放入手機嘅用家來講，真係好大困擾！
▲雖然 Nexus 系列手機好處係無乜內置 APP 霸佔手機儲存空間，但 16GB 可用嘅都係得 10.55GB 左右，對於一部唔可以插卡擴充空間嘅手機來講，真係唔夠用。
當然大家會講：反正佢支援 OTG，將啲歌同片放入支 USB 手指入面，然後同 Nexus 5X 接駁，咪解決到問題囉！但問題來啦：一來如果大家係街行個時放部手機入褲袋，再插卡支 USB OTG 手指係部 Nexus 5X 嘅 pat pat 度，真係方便？二來大家唔好忘記 Nexus 5X 係用 USB Type-C 插槽，而市面採用 USB Type-C 嘅 OTG USB 手指真係唔多，真係買到嘅款式而家可能係 10 隻手指數得哂。呢個，反而係筆者覺得 Nexus 5X 最「雞肋」嘅地方……
至於 Nexus 5X 究竟電量如何？可以用到幾耐？用唔用到一日？差電又快唔快？筆者畢竟試咗部機一日未到，都未可以好確實話俾大家知個效果，呢一點俾多個 weekend 時間俾我，下星期一再同大家報告。
