本以為小米係電池領域方面只會推出俗稱「尿袋」嘅外置充電池，但今日佢哋竟然來個反傳統，推出 AA 碱性電池！呢款名為「彩虹 5 號電池」，唔止外形美觀，而且仲附送一個膠盒俾大家裝住出街用，真係幾體貼。
據官方表示，呢款彩虹 5 號電池，採用日立 Maxell 電池核芯，相對唔知用咩核芯嘅 AA 電，理論上應該比較耐用同埋安全（唔驚爆炸？）。此外 10 枚電池都採用唔同顏色，睇落已經夠哂色彩繽紛。至於電量方面，據官方表示如果使用即影即有相機，可以連續拍攝 450 張相片，算係耐用。而用途方面，可以用於鍵盤、滑鼠、電筒、遙控器、甚至鬧鐘都得。
至於安全方面，彩虹 5 號電池採用了抗吸濕性能好、強度更穩定的新型密封圈材料，可令用家係濕度高、溫度高的惡劣環境下都唔會變形、脆化，仍能正常安全使用電池（官方表示）。另外，全鋼制預鍍鎳外殼比一般電池的鋼、鐵外殼，具有更高的抗阻性，有助提升電池的防漏液性能（官方表示）。底部亦設有絕緣環防止短路，令使用上更加安心。
呢款彩虹 5 號電池，一 pack 10 粒售價為 9.9 元人民幣（約 HK$12），唔算好平，同香港買一大 pack 廿幾粒電池除番勻個單價差唔多。但呢款電池暫時香港小米商店仍未推出，唔知大家有冇興趣係香港推出個時用下呢？
來源：小米
Leave a Comment