唔知大家平時放假鍾意做啲咩架呢？最近秋高氣爽，應該有唔少人會答去郊遊或者去行山吧！作為一個不折不扣的乾物女，放假除左匿埋係屋企煲劇之外，其實我都好鍾意睇戲，而我睇戲呢個愛好係從小培養出黎架！
讀小學個陣，我屋企就已經慣左喺 Family Day 的夜晚一齊睇《明珠 930》，好多年都係咁，雖然係啲落晒畫嘅電影，都不失為一種好娛樂。睇左咁多年《明珠 930》，其實當中有兩套戲對我留下極深的「陰影」，一套係《變蠅人》，另一套戲應該係同死神有關，但唔知叫咩名，只係記得最後一幕有個死神的影子經過兩個熟睡小朋友的床。呢兩套電影搞到我從細細個開始，瞓覺就一定要搵張被遮住個頭，同埋勁驚個啲識得飛嘅蟲，有時仲會發惡夢俾烏蠅曱甴包圍，嚇鬼死。
中學時期，都有 Keep 住睇《明珠 930》，仲會去租碟睇（因為《明珠 930》太成日翻播舊片）。個時好瘋狂，一放假就同爸爸去樓下租碟舖睇人地有咩新戲，租碟舖真係好正，提供廉價娛樂，而且除左荷里活大片，仲可以接觸到好多唔同國家的電影。個時我地最鍾意睇日本韓國個啲劇情慢到死嘅電影，人地會嫌佢節奏慢，但我地成家都好鍾意個種淡淡然、不動聲色的電影，最記得係《下一站天國》，不過細個係唔會識個啲存在主義或者談生死的哲學，但都係一種見識。
後來讀大學個幾年習慣唔同左，呢個時期睇多左好多戲，因為一人有一部電腦，鍾意幾時上網睇舊戲又得，新戲都出得好快。有一段時間我仲去左韓國 Exchange，去人地嘅戲院睇下戲，可能係隔離飯香，嘩簡直可以「平、靚、正」形容，佢地大商場入面的戲院本身已經係高級啲，但價錢仍然平過香港學生價！畫面仲要係超高清，唔會睇睇下有個黑色圓點。
而家出左黎做野，就會願意使錢多啲入戲院睇新戲，成日都望住個 App 睇下有咩新戲上，自己一個又好，同朋友一齊都好，入戲院變得好平常。上個周末，兩日，我睇左六套戲，有入戲院，有上網，也睇碟，好多元化。你話我宅又好，乾又好，悶又好，咩都好啦，睇戲已經成為左生活一部分了～今個星期睇咩好呢～？有冇好介紹～？
Leave a Comment