以往 Moto X 系列每年只出一機，但今年一來就兩部：分別係 Moto X Style 及 Moto X Play。 Moto X Play 就屬於中階機，而 Moto X Style 屬於旗艦機。如果有睇開我哋 Unwire 就應該有留意籮文寫過一篇 Moto X Play 嘅評測，今次就同大家試試 Moto X Style！
Moto Maker 任你自訂款式… 不過都係冇香港份
同好多 Motorola 產品一樣，Moto X 買家可以喺 Moto Maker 網頁自訂款式。Moto X Style 可以揀嘅機身顏色包括白金、白銀同埋黑灰。包圍鏡頭嘅金屬片及喇叭位亦有得揀顏色，當係一個小點綴。而背蓋就有多達十種顏色可供選擇，仲另有 Saffiano 皮革同木材嘅背蓋，留意，並唔係印有木紋圖案，而係真係木材呀！另外仲可以刻字喺機背添。不過各位香港嘅 Moto Fans，真係唔好意思，香港仲未有行貨呀，而水貨網就未必有你想要嘅 Customization ，好可惜囉唉。
▲背蓋就有多達十種顏色可供選擇，仲另有 Saffiano 皮革同木材嘅背蓋，留意，並唔係印有木紋圖案，而係真係木材呀
▲包圍鏡頭嘅金屬片及喇叭位亦有得揀顏色，當係一個小點綴
開箱! 竟然送 Bumper
Moto X Style 個包裝盒走簡約風，不過 Size 就大過好過其他手機嘅包裝，包括之前試過嘅 Moto X Play。一打開，左邊就係手機，右邊有配件。配件當然唔少得常見嘅火牛連USB 線 同 耳機啦，不過除此之外竟然附送一個透明 Bumper，依個原廠 Bumper 確實造工唔錯，裝上 Moto X Style 上亦都好順眼，要扮裸機都可以呃到下人。送 Bumper 依個的確係好貼心嘅舉動，不過意思係咪部機條邊好易整花呢？（可能係我諗得太多）
▲Moto X Style 個包裝盒走簡約風，不過 Size 就大過好過其他手機嘅包裝，包括之前試過嘅 Moto X Play
▲竟然附送一個透明 Bumper，依個原廠 Bumper 確實造工唔錯
好靚仔（心心眼）果然係有 Style
今次拎返黎試嘅係白色機面配香檳金機邊，背蓋呢就…唉呀冇木材背蓋呀，而係白色 Soft Grip 背蓋。不過老實講雖然唔係木背蓋，依部 Moto X Style 真係已經好靚，玻璃面有 2.5D 圓滑設計，機邊金屬材質閃令令，機頂有斜邊切割。同早前試嘅 X Play 同樣係 Soft Grip，不過兩個型號嘅紋路係唔同嘅，依部 X Style 係斜紋，而 X Play 係交叉紋。睇返 X Play 嘅評測你會見到我話 X Play 背蓋好老套，而今次我就覺得 Moto X Style 斜紋簡約好多靚好多。外觀總結黎講，我覺得佢係別樹一格，唔會覺得似邊部邊部其他牌子機，名乎其實係有 Style！
▲同早前試嘅 X Play 同樣係 Soft Grip，不過兩個型號嘅紋路係唔同嘅，依部 X Style 係斜紋，而 X Play 係交叉紋
▲玻璃面有 2.5D 圓滑設計，機邊金屬材質閃令令，機頂有斜邊切割
5.7吋 2K 屏幕 ＋ 前置喇叭仲要係 Stereo ＝ 睇片打機無得輸
對比起細佬 Play 只有 5.5吋 Full-HD 屏幕，Moto X Style 擁有大啲清啲嘅 5.7吋 Quad HD （2560 x 1440） 屏幕，像素密度高達 520ppi，市面上算係最 Top 一批。除咗官方數字上優勝，籮文都測試期間都發現屏幕顏色同亮度表現都十分出色，就算烈日當空下使用，只要較到最光亮度就可以繼續清?閱讀屏幕，同時顏色亦好鮮豔，一啲影響都冇。
▲有一般同自然飽和度兩個 Setting。
▲可見 Moto X Style 亮度比 LG G4 更亮，色彩亦比較自然
睇片打機除咗視覺上要注重，當然聽覺享受亦非常重要啦，唔似好多其他手機喇叭喺機背或機頂機底，Moto X Style 個喇叭係前置嘅，睇片時聲音就直接傳入用家耳朵。 而喇叭仲要係 Stereo，換言之有左右聲道，經籮文測試，用黎聽歌真係好似歌手喺你面前唱咁，唔似其他機，個歌手好似喱埋咗喺你手機後面咁。而且音量都有十分好表現，開到最大都唔覺得拆呀！
▲籮文就用 Moto X Style 播放近期好 Hit 嘅 Drake – Hotline Bling。隻舞好正之餘，雙聲道前置喇叭係我試過咁多手機喇叭內最好聲嘅一部。
冇 OIS 係差小小
同 Play 一樣，Moto X Style 有 2,100 萬像素主鏡頭同500萬像素前鏡，不過 Moto X Style 主鏡頭支援 4K 同埋 60fps 嘅 1080p 影片。不過兩部機都有一個共同致命傷，就係冇光學防手震 OIS，令到低光環境下影相好易就會朦。雖然冇 OIS，但足夠光源下，相機表現絕對係良好，顏色表現好夠鮮，光暗都分明，2,100 萬像素亦算係超高，放到大一大都未見有起格或油畫化問題。但係冇光學防手震實在係致命傷，夠光時表現好好，低光時嘅表現就要靠你雙手啦，練下唔手震先啦！而前鏡都有一個驚喜，就係有前置閃光燈，但籮文就覺得效果唔太自然，不過總好過冇，黑暗環境下影雖然唔係影得靚，不過都好過咩都影唔到。
▲ HDR 自動啓動，全張相都十分清?，不帶走一片雲彩
▲同樣 HDR 自動啓動，建築物線條，條條分明
▲可惜一到室內較暗地方…
▲無 OIS 幫助下朦晒！
電量一般比 X Play 略少
以上都講過一堆 Moto X Play 同 Moto X Style 嘅分別，不過電量方面就好有趣，旗艦機 Moto X Style 只有 3,000mAh 容量電池，反而中階的 Moto X Play 卻有高達 3,630mAh 容量電池。大家要知道 Moto X Style 有較大較高清嘅屏幕，其他規格亦更高級，耗電量必定比 Moto X Play 更大，反而電池容量就更少，所以兩者嘅續航力差距一定唔細。果然，試玩咗半日，大約七、八小時就要叉電，相比起 Moto X Play 可以用差唔多兩日，簡直係差天共地。相信用家真係要日日帶埋尿袋出街以策安全，因為 Moto X 係冇得換電架！不過都有樣好嘢要讚下嘅，就係兩部機都支援 Motorola 嘅快叉技術 TurboPower，而且仲跟機送埋 TurboPower 25 嘅叉機俾你，叉幾分鐘就可以用多幾個鐘，的確係勁嘅！
▲留意返 TurboPower 25 火牛同叉電線係連住不可分割的
籮文：「差個 OIS ，點解會無行貨」
對 Moto X Style，我真係又愛又恨。機身設計好靚，手感亦好好，日頭影相亦好靚，叉電又可以用 TurboPower，我最欣賞就係個前置喇叭，睇片一流。但點解！？點解影相冇 OIS，點解一暗少少影相就又鬆又矇，點解內置只得 3000mAh 電量。仲有，點解冇行貨？點解冇得玩 Moto Maker… 實在太可惜。
價錢：$4,395
查詢：2405 8071 （Expansys)
分享到 :
最新影片
