有時坐係 Office 成日掛住做真係連水都唔記得飲，最近就有一隻由一個香港團隊設計嘅智能水杯係 Kickstarter 集資，不但會記錄飲水量，仲會提醒你唔好飲咁多咖啡。今日 unwire 就訪問咗 Ozmo 嘅 CEO Serena Pau 同 設計師 Ming Tong 大談設計進度。
好嘅產品大多都係由生活開始，智能水杯嘅概念亦唔例外。Serena 發現身邊好多男人係公司唔飲水，搞到個口成日好臭，所以就想整一件產品提醒人飲水。「雖然智能水杯係中國、外國市場都有，但市場都仲好新。可能你覺得每日計住飲咗幾多啖水好無聊，但幾年前 D 人都係覺得行咗幾多步唔需要知，但依家嘅智能手帶都成行成市，所以要係市場未成熟之前做，等更多人關注保持足夠水份嘅重要。」
「之前同人傾開，真係會校鬧鐘提自己飲水。」既然有人會嚴肅對待呢件事， Serena 就更有信心去嘗試。不過 Serena 覺得香港市場比較細同分散，決定由美國市場開始做起。而智能水杯亦設計成 500 ml 嘅 size ，迎合外國人需要。Serena 不忘補充，香港人都適合放係辦公室，「大容量就唔洗成日行嚟行去裝水，方便好多。」
▲ 應用程式可以設定性別、年齡、身高、體重嘅數據，再根據生陳代謝去計每日要飲幾多水。如果目標達到，水杯嘅 3粒燈會同時著。
▲ 每日飲水嘅時間同份量都會紀錄清楚，如果你太耐無飲水，水杯會震動提示你。
▲ 咁大個水杯，香港人未必會拎住四圍走，Serena 就提議可以手動輸入飲水量或者降低目標以代替出街或者係屋企飲水嘅份量。
如果係 Kickstarter 訂咗呢個水杯嘅朋友都應該好關心水杯嘅研發進度，照小編所見完成度已經相當高了，Ming 示範分別倒水同咖啡入水杯，應用程式都可以準確偵測。而且仲有條鯨魚，show 比你睇飲咗幾多水 同 飲得夠唔夠水，如果缺水鯨魚就會擱淺係沙灘，相當得意。Ming 表示「App 介面暫時寫好，iOS 已經完成得七七八八，但因為 Android 個 App 寫法有 D 唔同，所以仲 debug 緊。不過預期 12月會發到第一批貨，希望 D 人會買嚟做聖誕禮物。」
▲ Serena 見市面上嘅 Water Checking 大多數都係以水滴圖案表示量水量覺得有 D 悶，所以想以鯨魚動畫顯示，等人覺得飲水係有趣嘅事。
▲ Serena 覺得唔少人會不經不覺飲得太多咖啡，所以加入偵測咖啡功能入水杯，等人有個 idea 知道自己會唔會飲得太多咖啡，從而更關注健康。
▲ 呢隻水杯就算買比唔識用電話嘅老人家都得，因為如果你超過一個鐘無飲水，個杯會震；如果飲夠當日目標，杯身嘅 3 盞燈會著晒；如果開咗蓋或者未扭實，會著 1盞燈提你。
▲ 水杯用 USB 充電，充一次就可以同 3-4星期，都算方便。
正如小編好多時係 Kickstarter 發現各式各樣概念產品一樣，呢隻水杯嘅生產資金都係由集資開始。Serena 覺得集資網站可以幫好多有新概念嘅人打開道門製造佢地第一件產品，同時亦有好多鍾意新奇刺激產品嘅人會買。「我自己係 Kickstarter 訂過好多嘢，發現好多時概念同實物好有差別。試過訂戒指，點知實物大到唔似一隻戒指，最後用唔到，亦試過走數或者 3-4年之後先有貨。不過我覺得依家 D 人改變緊，無咁離地，唔會只係概念嘅時候就推出。」除咗留於概念，原來產品延續性比較都係一個普遍問題，做過 10年 product designer 嘅 Ming 就打算水杯將來可以加更多功能，例如：可以利用 iHealth 連接去 fitbit ，偵察到你做緊運動，就會提你飲多 D 水。又或者一個 App同時連接幾隻杯，俾媽媽可以睇到小朋友平時飲水量。
係 Kickstarter 呢隻水杯係由香港團隊設計之後，我地就嘗試連絡 Ozmo 團隊，點知發現原來佢地公司就係 Unwire 樓下，呢個世界就係好細呢！而我平時係好少飲水嘅人，試用過呢個水杯之後又真係會留意番自己飲得夠唔夠水，不過如果個杯可以整得細 D 就好啦！
售價：60 美元（約 465 港元），預計 12 月發貨
查詢：Ozmo Smart Cup @ Kickstarter
