早喺 5 月 unwire 已經同成功申請數碼港創意微型基金嘅 Holumino 做過專訪，傾吓有關佢哋創業時申請資助嘅心得同埋面對嘅困難，俾貼士有理想有創意但欠缺資金為夢想踏出第一步嘅年輕人。我哋今次再搵佢哋講吓整網頁嘅工具，因為無論自己創業定係個人興趣，而家呢個環境冇個靚仔網頁又點見得人呢？如果你哋冇咩 budget，又冇專門寫網頁嘅同事，Holumino 嘅提議就啱晒大家喇！
而家網上面有好多工具，可以幫你做唔同方面嘅工作，Holumino 今次就介紹咗兩個「幫你整網站嘅網站」，方便一 D 冇乜 budget 搞網頁嘅初創企業。
1．wix.com
Holumino 嘅網頁 都係用 wix 揼出嚟，而 wix 同下面介紹嘅 strikingly 最大分別係 wix 容許有唔同分頁，佢入面有好多範本（template）俾你揀，分類得非常仔細，亦簡潔美觀，就算對「美感」非常唔敏感嘅朋友，都一定唔會揀錯！而且操作亦唔算困難，網上更有朋友話用 wix 整網「難學易精」，學識咗就唔使驚，而且用 wix 製作嘅網頁都係 responsive 嘅，喺唔同嘅流動裝置上都可以顯示同使用。
除左網頁要夠靚仔之外，唔少朋友都會擔心 domain name （簡單嚟講即係網址）嘅問題，駛唔駛喺其他地方申請同俾錢呢，wix 可以一站式幫你攞 domain name 同埋 host 網頁，呢兩樣都要收費架。因為免費版本會有「wix」個名喺入面，應該冇人想自己公司嘅網頁出現其他 brand 嘅名咁奇怪掛！
2．strikingly.com
一入到去 strikingly，最明顯嘅分別就係佢提供繁體中文介面（wix 只得英文介面），而且佢標榜只係需要「 30 分鐘就建立出一個又漂亮又好用嘅網站」。不過 strikingly 專門做「一頁式」網站，即係成個網冇分頁，基本上唔駛㩒任何制，只要不斷向下 Scroll 就可以睇完個網。同樣地，佢都有好多 template 俾你揀，大家亦都可以俾錢買 domain name。
3．WordPress
坊間唔少 blogger 或者傳媒都慣用 WordPress 整網頁，以前 D 人用 WordPress 主要用嚟做自己個 blog，而家亦有人用嚟起公司網。WordPress 有好多 plug-ins、小工具，亦有好多網絡社群支援，就算佢比較難用（因為有好多功能），網上都有好多網友專家可以幫手解決疑難雜症。
不過，Holumino 就話雖然 wix 同 strikingly 好方便，但係佢哋嚟緊都會自己寫返網頁，因為用現成嘅 template 有好多制肘，「有時想要靚 D 嘅過場，例如 video 或者其他互動元素，template 好多時都做唔到」，最後咪又係要另外比錢搵人或者自己攪返，所以針無兩頭利，都係睇你要求有幾高啦！
Leave a Comment