HTC 舉行記者會，正式推出 One M9+ 相機升級版，以及 One E9 Dual Sim，即是降級版的 One E9+ Dual Sim。一升一降，今次先同大家介紹 One E9 Dual Sim，降級位主要係個屏幕，由 2K 降到 1080p，同埋相機2,000萬像 降至 1,300萬像，其他整體同 E9+ 相差不多，不過價錢就平咗一大截！想知係咪抵咗，繼續睇落去！
E9+ 推出時最為人詬病嘅就係塑膠背蓋，雖然個邊框都係金屬，但仍然俾人話佢成部機都膠膠地。今次身為降級版嘅 HTC One E9 Dual Sim 竟然夠膽死，連邊框都變埋膠！呵，不過今次就成件事合理好多，因為 HTC One E9 Dual Sim 係降級版，價錢都降咗一大截呀嘛，而且籮文覺得 E9＋ 膠啲唔膠啲，今次一體化全膠機背嘅 E9 係更視覺上更協調，更簡約靚仔。E9 Dual Sim 有銀鑽白、琥珀棕同今次我哋手上依部石墨黑，雖然反轉部機就全膠，不過機面依然係金屬材質。
▲金屬邊框 Down grade 變埋塑膠 但依然靚仔，甚至更加靚仔咗。籮文尤其鍾意依個啞黑色，有神秘感嘛！
▲此圖可見，機框都膠埋
▲ 2 個 Nano SIM 插槽之外仲有獨立 MicroSD 卡槽，此為真・雙卡也！
黎到一大降級位，屏幕。E9+ 最大賣點就係有5.5 吋 2K 屏幕，今次 E9 屏幕同樣係 5.5吋，不過由 2K 變成 1080p，都係個句，一分錢一分貨呀嘛。不過咁喎，籮文就覺得對於大部份用家，其實 1080p 都已經好夠用，如果唔烘埋個 Mon 度睇，其實睇唔到分別。雖則屏幕有降級，不過音效方面同樣係吸引，保留 HTC BoomSound 同 杜比 5.1 立體聲，前置喇叭睇片一流，唔似其他喇叭喺機背嘅手機，睇片要用手兜返啲聲上黎。
▲雖則屏幕有降級，不過音效方面同樣係吸引，保留有前置喇叭
▲保留 HTC BoomSound 同 杜比 5.1 立體聲
無錯，f/2.2 光圈、28 mm 主鏡頭，由 E9+ 嘅 2,000萬像素跌到 E9 嘅 1,300萬像素，跌幅其實好大。不過籮文就覺得係「由超高像素，變為 OK 高像素」，畢竟都係降價版，1,300萬像素其實都已經好唔錯，而且影出黎色澤分明，線條尚算清?。留意返降 Lv 嘅只係後面主鏡頭，而前鏡係冇分別，同樣有 HTC Ultrapixel 鏡頭。
▲畢竟都係降價版，1,300萬像素其實都已經好唔錯
▲驟眼睇，逆光下線條仍然清?
▲ Zoom 大就會發現，係有油畫化問題，但未到嚴重水平。而對面海嘅車車都可以逐輛數得出。
▲前鏡仍然表現良好，繼續有內置美肌功能
其中一個降級之處，就係內置儲存空間由 32 GB 降至 16GB，不過籮文相信多數人都有 SD 卡，應該對大家影響不大，如果冇嘅話買機就記得買埋 SD 卡啦，microSDXC 最高可擴充到 2TB。處理器同上代一樣，用上 MediaTek 2.0 GHz 八核心處理器，不過 RAM 就由 3GB 降到 2GB RAM，不過可能介面有優化過，都好順冇窒機，日常使用應該唔會輕易分到嗰 1GB RAM 差額。
▲內置儲存空間由 32 GB 降至 16GB，不過籮文相信多數人都有 SD 卡，應該對大家影響不大，如果冇嘅話買機就記得買埋 SD 卡啦
▲閒置時，都有 850幾 MB 可用記憶體
總結一下，當時 E9+ 一開賣係賣 $4,398。而以上介紹依部 E9 雖然比 E9+ 少咗 1GB RAM、鏡頭少 700萬像素、少 16GB 儲存空間、個 Mon 冇咁清，同埋個外型膠啲…，不過價錢係平 $1,500 蚊。雖然降級又降價，不過籮文就覺得 E9 同 E9+ 嘅性價比相若，冇話邊個抵啲。抵唔抵就係見仁見智嘅，不過出一個平價版的確可以俾買家多一個選擇，難道這就是 HTC 大包圍各用家群的機海戰術？
售價 : $2,898
