唔知有幾多朋友有睇港隊打世界盃外圍賽呢？早兩日個場真係好緊張，香港隊險勝一球，攞到 3 分！（唔好以為我好似識足球，其實港女係永遠都唔會明白咩係越位 XD）知道香港贏左個刻真係開心到跳起 Yeah，有種吐氣揚眉的感覺！
係嘞，最近小妹又去上堂喎，繼上堂有同學講香港好落後，今堂 Professor 就問「咩係愛國呢？」，跟住有同學就話係奧運的時候撐自己友就係愛國，既然係咁如此類推，踢波的時候，我撐港隊的話…
都係唔講呢啲喇！是咁的，我最近去左秋電展，見到開發 Android PC 的 Jide Technology 擺檔（如果唔知呢部 Android PC – Remix Mini 係乜，你可以睇返 unwire 早前的報導及專訪），於是就走埋去同佢地傾兩句，都幾感人，想同大家分享一下。Between，我就唔係 backer，所以對於佢地幾時出貨就唔太關心，不過佢地就同我講話出緊貨架喇，叫大家俾啲耐性～
唔知係我太敏感定係佢特登，佢同我講話佢地好～重視香港市場，所以今次特登黎香港擺檔，除左因為公司 Founders 係香港人，仲發現左一啲 Significant 嘅數字：個 Project 係 Kickstarter 上面集資時，最多的 Backer 係香港人，而 Kickstarter Campaign 完左之後，係佢地網頁做 Reserve 的 Top 3 地區中都有香港。雖然佢話無可避免地，Remix Mini 的首發地點一定係美國，因為以擁抱科技的地區來講，美國始終係最強勁，消費力高不特止，啲人亦都好願意嚐新，但佢都非常 impressed 原來香港人係咁撐自己友，同時亦有咁多香港人係咁熱切追求新科技。
佢仲同我講，話當初係 Kickstarter 集資搵 PR 搞宣傳個陣，冇諗過香港的反應會咁熱烈。佢地以為美國勁係正常丫，人地好有系統，出文介紹及散播得非常快，所以預左會有數字飆升； 勢估唔到香港出宣傳的時候都有同樣效果，多謝香港人咁話。
小妹同佢傾完之後，莫名地覺得好感動，你地一定覺得我好膚淺又易氹啦，人地講兩句你就信～係又點喎？反正我信了? 原來從別人口中聽到自己友被讚、被欣賞，係會有感動的感覺；原來香港人一直都好團結；原來我骨子裡始終都係香港人。
我諗我明白「愛國」係咩一回事了！
Leave a Comment