依莉詩：「一家大細嘅恐龍遊樂場！」－ 3D 魔幻館之恐龍世界

Let it go! Let it go! 暑假之後 Elsa 同 Anna 番咗去有雪嘅地方繼續唱歌，不過佢地歌聲實在太悅耳，嘈醒咗史前王者，令原先以《魔雪奇緣》3D 畫做主題嘅 3D 魔幻館瞬間被恐龍侵佔，今日我依莉詩率先闖入呢個恐龍樂園，帶大家冒險一番！

恐龍陪你影全家幅

同其他 3D 館唔同，3D 魔幻館每期只會佈置成單一主題，走入館中就仿如置身史前時代，你可以以第一身角度融入 20多幅畫中，同土人一齊用箭擊退暴龍、企係高處岩石邊觀察素食龍互動、走過恐龍潭上嘅吊橋等。3D畫 同巨型恐龍模型交織，一隻隻栩栩如生嘅恐龍好似想追殺你咁，驚心動魄，各位父母係影相之餘要好好保護自己嘅親生骨肉，免得變成恐龍午餐啊！

▲ 唔好以為係陸地好安全，隨時有恐龍係河入面跳出嚟偷襲你，仲唔快 D 走又點逃得過水龍嘅血盆大口呢？

▲ 就連天空都有好多翼龍對你虎視眈眈，行路要靜靜地唔好俾佢地發現呀！

▲ 萬一無路走仲要學識爬牆嘅本領，但著住高跟鞋真係好難逃生啊！

▲走到恐龍潭上嘅吊橋可謂步步驚心。

▲ 但其實又唔係隻隻恐龍都咁兇猛嘅，就等我活捉隻三角龍留去做 Sashimi 先！

▲ 呢隻暴龍仔就俾我馴服咗啦！

小朋友有嘢玩

除咗影全家幅之外，場內仲有 4個以恐龍做主題嘅小遊戲。小朋友不但可以坐上恐龍電車感受騎恐龍嘅滋味，仲可以動手體驗發掘化石嘅樂趣。父母仲可以放活躍嘅小朋友入恐龍彈床，等佢地放下電添！

▲ 場內仲有大恐龍同小恐龍俾大家騎，隻隻都好鬼生猛，識行識走，小朋友一就鍾意。不過可以行嘅範圍唔大，3-5個代幣只可以騎 5分鐘，如果小朋友唔肯落番嚟，大人都幾肉痛架！

▲ 只需要 1個代幣，小朋友就可以係恐龍化石區一嘗發掘化石嘅樂趣。

▲ 蛋有蛋味，但唔知恐龍蛋有無恐龍味呢？想試下不妨比 3個代幣用小型泥車 5分鐘內掘隻試下(誤)。
▲ 最後，父母仲可以帶小朋友到精品區選購恐龍玩具，進一步提升佢地對發掘新事物嘅興趣同對恐龍嘅熱愛。

依莉詩：「畫少，勝在入場平！」

3D館通常都針對成班 Friend 或者情侶去留倩影，入場費差唔多要成百蚊個，如果成家入去都幾貴下，而呢間 3D 魔幻館就主攻一家大細，雖然 3D 畫比較少，而且主題單一，不過價錢比較合理，仲有多個專比小朋友玩嘅遊戲，應該可以吸引唔少家長假日帶小朋友入去影番張有趣嘅全家幅。

3D 魔幻館之恐龍世界

日期：2015年 10月 17日 開始

地點：九龍灣宏照道 38 號 MegaBox 9/F － 3D 魔幻館

門票：$20

遊戲代幣：$10/個 (買十送一)

相關影片﹕