誠品銅鑼灣旗艦店開咗 3年，仍然有唔少書迷特登過海打書釘。由今日開始，住九龍同新界嘅書迷唔洗去咁遠。因為誠品海外第二間分店喺尖沙咀星光行正式開幕啦！不過呢間同銅鑼灣個間有少少分別，全名喺誠品生活，而唔喺誠品書店，自然生活嘅部份佔得多過書，更引進 42 個原創品牌，當中 4 成更喺全港獨家品牌添，實行將台灣嘅生活品味帶到香港！就等我依莉詩帶大家睇睇當中 10 大創意品牌啦！
▲ 喺繁忙嘅廣東道轉入星光行，搭扶手電梯到 2/F 就走到誠品生活。
創意 x 人手製造
要稱得上文創品牌，售賣富有創意嘅手製品當然唔少得，所以就算叫這裡做創意市集亦不為過。
1) 紳士必備手工皮鞋 －「林果良品」
手製皮鞋喺香港已經愈來愈少，而誠品就引入咗台灣手工訂製鞋品牌 －「林果良品」到港，俾男仕們多一個選擇。店內放滿工具同懷舊裝飾，充滿情懷。不過香港店只賣現貨，不設訂造，所以想訂造都係要飛去台灣分店啦！
▲ 店內放滿製皮鞋嘅工具，令人想起鞋匠利用工具一步一步造鞋嘅情景。
▲ 呢對灰色配啡色嘅巴爾莫勒爾皮底靴只有香港先有得賣，連台灣總店都無架！
▲ 要做紳士，除咗一對手製皮鞋，當然要配番隻煲呔啦！
2) GRION
GRION 係台灣市集出身嘅小店，除咗有最出名嘅環保袋，仲有不同嘅布藝手作同惡搞明信片，非常有特色。
▲ GRION 最出名的「春捲包」有唔同顏色同圖案揀，又可以重複使用，唔怪得咁受熱愛環保嘅台灣人歡迎。
▲ 不過對我嚟講，呢系列動物布袋就更加吸引。掀開熊貓頭套就由動物變成人，超可愛呢！
▲ 另外仲有好多布製嘅動物飾物，放埋一齊成個動物園咁，睇見都好興奮，好想帶晒番屋企。
▲ 呢間店嘅明信片亦超有創意，當靜香遇上花輪同學，麵包同愛情下，唔知佢又會唔會放棄大雄呢？
▲ 另外店內有兩部扭蛋機，七彩繽紛，原來喺紮頭髮嘅橡筋。
3) 「25togo by Searching C」－ 充滿玩樂氣氛的生活用品
以 kidult 精神，將冒險、玩樂、探索嘅元素帶到人們生活中係「25togo by Searching C」嘅設計原則，所以無論雨傘、襪子、收納袋都充滿玩樂氣氛。
▲ 呢隻 colorful 嘅熊仔其實係收納袋，可以收藏各種充滿回憶嘅小物件。
▲ 望到呢對皮革獅子，突然令我諗起大仁哥同程又青呢！
▲ 杯唔一定係圓嘅，唔細心睇，仲以為呢盤係豆腐。
食是生活一部份
衣食住行，食本來就佔生活好大部份。一邊睇書一邊食鍾意嘅嘢的確係生活一大享受。
4) 台灣原材料 x 香港新鮮製作的 「BONJOUR 烘焙坊」
以歐式麵包為主嘅「BONJOUR 烘焙坊」係台灣有多間分店，為確保大家係香港都可以食到同樣嘅味道，原材料會由台灣直送，再由係台灣接受過訓練嘅師傅係香港新鮮製作。
▲呢個包外貌雖然唔討好，不過由進口墨魚汁，搭配法國麵包製成，係基隆嘅特色麵包 。
▲ 用蔥花、奶油同麵粉造成嘅蔥花麵包，單純嘅味道令人勾起無限回憶。
▲ 外層掃滿蜂蜜嘅卡努內，外面苦中帶焦脆，裡面鬆軟甜美，係味蕾中徹底融合。
5) 集成花中精華 －「掌生穀粒」
「掌生穀粒」希望透過平凡平實平常嘅白米，呈現台灣人嘅生活風格，但係尖沙咀店主打嘅卻係喺更受香港人歡迎嘅純正蜂蜜。咁以後就唔洗由台灣一樽樽咁搬番嚟香港啦！
▲ 9種蜂蜜由兩種方法製成，包括以自然熟成方法，以蜜蜂體溫同翅膀搧去蜜中含水所製成的山茶蜜、百卉蜜、月桂蜜同苦禁蜜同以花開正盛方法，將蜜蜂帶到繁花盛盟最燦爛嘅地方，再以手工低溫炊熟製成的荔枝蜜、百草蜜、文旦蜜、厚皮香蜜同桂花蜜，前者天然，後者純正。
▲ 係不同花田生活嘅蜂蜜，採嘅花蜜都有唔同味道，買之前要試清楚啊！我就覺得月桂蜜最啱自己，清得嚟來少少甜，沖水或者就咁食都得。
▲ 除咗蜂蜜，名為當初 同 如今 嘅荔枝蜂蜜酒亦好受歡迎。店員話雖然當初同如今係同一款酒，但有人會飲到兩種不同嘅口味。
▲ 呢度嘅冷泡茶亦好特別，每種茶都用茶莊主人嘅名命名，好似「董的小情歌」、「許家的日出天光」等，就連包裝上嘅公仔都顯示咗茶莊主人嘅性格。
6) 老闆親自製造的天然果醬 － 「Nicole’s Kitchen」
除咗台灣嘅品牌，本地代表亦好吸引。「Nicole’s Kitchen」嘅果醬同 XO 醬都由老闆從原材料開始細心挑選，再親手製作，確保每樽嘅品質一致。用嚟塗麵包或者夾蘇打餅都好好味。
▲ 手工果醬一共有 9種口味，包括：金桔菠蘿果醬、玫瑰蘋果果醬、奇異果菠蘿果醬、芒果金桔果醬、藍莓草莓果醬、玫瑰草莓果醬、紅酒無花果果醬、芒果草莓果醬以及杏脯香橙果醬，各有特色。
▲ 我個人比較鍾意清新感覺，紅酒無花果果醬淡淡紅酒香，帶點點清甜， 玫瑰蘋果果醬花香當中有淡淡蘋果清新。
▲ 手工 XO 醬同樣用料十足，利用北海道一級干貝、日本櫻花蝦、本地蝦皮、本地優質蝦籽、鹹魚、金華火腿、指天椒、優質蝦米、蒜頭以及紅蔥頭泡製而成，鮮味濃郁而且唔太辣。
7) 「Farm Direct」 本地直送水耕菜
同樣係本地品牌嘅「Farm Direct」 將植物種係水中，吸引營養液生長，避免土地同水源污染。唔知又可唔可以解決香港嘅土地問題呢？
▲ 望見一棵棵綠油油嘅水耕菜，係咪好吸引呢？
▲ 睇落紫洋蔥都好新鮮啊！
▲ 曬乾咗嘅蔬果用嚟代替零食係唔錯嘅選擇。
女孩摯愛
女為悅己者容，扮靚係女仔每時每刻嘅責任。
8) 戴上馬卡龍戒指 －「ME & WE Soak-off Gel」
雖然美甲同文青好似無太大關連，呢間店存在係誠品亦有 D 格格不入。不過望到每支 Gel 甲油上都有粒馬卡龍即刻令我雙眼發光。
▲ 色油有好多顏色揀，我摯愛嘅薰衣草紫同 Tiffany blue 都有呢！
▲ 每支 gel 甲油都套上一隻相應顏色嘅馬卡龍戒指，好夢幻啊！
9) 活躍的舞者 －「Les Nereides」
除咗台灣同本地品牌外，法國浪漫飾品品牌「Les Nereides」都有進駐。佢嘅飾品最精細既地方都係人手製造精緻可愛。
▲ 芭蕾舞女伶系列係經典之作，年年舞者嘅裙都會推出新色。
▲ 呢個品牌亦經常用大自然做題材，兔仔同花花都好常見。
面向維港海景看書
雖然尖沙咀店嘅文創品牌比較多，但藏書量亦不少，同銅鑼灣店一樣高達20萬架！仲可以一面睇書，一面飽覽維港海景，係鬧市中享受片刻寧靜。
▲ 佢單層面積都比銅鑼灣分店大，行起上嚟比較舒服。
▲ 仲可以一面睇書，一面飽覽維港海景，係鬧市中享受片刻寧靜。
▲ 遊走係書同各個文創品牌之間可以感受都生活嘅樂趣。
依莉詩後感
尖沙咀店嘅單層面積比銅鑼灣分店大，行起上嚟比較舒服，仲有維港海景睇，可以靜靜地享受片刻寧願。不過亦因為大大少少嘅文創品牌佔嘅比重較多，每間都有自己特色同格局，又無特別分區，所以行起嚟都有少少迷茫，有時都唔知自己點先出得番去。總體上我都幾鐘意呢度嘅小店，係呢個充滿遊客同名店嘅尖沙咀，終於有一個可以歇息嘅地方，感受到少少人情味。
誠品生活
地址：尖沙咀梳士巴利道3號星光行2-3樓
營業時間：10am – 10pm
電話：+852-3419-1088
