好快就到萬聖節同聖誕節，面對打扮恐怖嘅鬼同浪漫醉人嘅燈飾，少不免會影好多相，但環境通常都唔夠光，如果用閃光燈又好容易爆晒光。最近市面就推出咗唔少自拍神燈，俾大家可以邊自拍邊打燈，而我依莉詩就搜羅咗其中幾款自拍燈同大家分享下效果同講下揀自拍燈有咩秘訣啦！
▲ 今次分享嘅除咗電筒同相機 LED 燈外，仲有 3款手機專用自拍燈，白色嘅冬甩、連埋濾鏡嘅 Loliflash 同 環形夾夾燈。
1) 單手自拍 + 打燈先方便
講到明自拍燈，主要用途梗喺自拍啦！所以最好就可以插喺 3.5mm 耳筒埠或者夾喺手機，咁就可以單手拎住手機同時幫塊面打燈。不過插喺耳筒埠嘅自拍燈未必部部手機都可以用得順手，好似 Sumsung S6 edge 個耳筒埠喺下面，自拍個陣就要倒轉部機用，唔喺 D 燈就會打得好怪。
▲ 影嘅時候要注意燈光，最好直射塊面就會更有光澤感，所以角度要就一就，唔一定 45度角先喺最 perfect 架！
2) 乾電比充電更適合長開
自拍燈用咩電都好重要，有時出去成晚，影影下無電會好掃興。我個人就覺得用乾電會比較方便，雖然亦會比較重，但一無電就換，總好過要等佢慢慢充電。此外，如果想拍片，最好揀隻可以長著嘅自拍燈，咁先可以維持到光度，好似冬甩咁每開一次只會著燈持續 6 秒就比較適合用嚟影相啦。
▲ 冬甩同 Loliflash 細細隻方使攜帶，不過喺充電設計，如果出去成晚或者要長開拍片就唔太適合啦。
3) 光源愈分散愈自然
自拍嘅距離一般都較近，所以光源唔可以太集中，唔喺就照唔晒成塊面，同樣光源愈分散就愈自然。如果用電筒近距離打燈就會好易爆光，所以唔太適合用於自拍。另外，好似 Loliflash、夾夾燈 同相機 LED 燈可以因應環境光暗同距離調校光度就更好，用嚟自拍或者幫人打燈都用得。
▲ 光源過度集中或者過強影出嚟都會唔自然，所以揀可以調校光度嘅自拍度會比較好。
4) 雙色溫還原物件顏色
唔同色溫嘅燈照向同一物件會發現物件嘅顏色會有所不同。冬甩同夾夾燈以白光為主，影出嚟會偏白，自拍就會有美白效果。但如果影物件或者想肌色自然 D，揀雙色溫嘅 Loliflash 就可以還原物件顏色，影出嚟更出色。
▲ 用 Loliflash 打燈，花同月球燈嘅顏色就更接近原色。
5) 拍出眼睛「水汪汪」效果
自拍燈除咗打燈外，其實仲有美肌同大眼功能，冬甩同夾夾燈嘅環形設計就可以令眼睛拍出嚟有「水汪汪」效果，睇落眼都大 D 。不過影嘅時候記得望住環形中間，咁先可以做到個圈圈圍住瞳孔架！
▲ 環形愈大眼睛就愈「水汪汪」。
6) 濾鏡營造節日氣氛
萬聖節影相好講氣氛，有時加下濾鏡，換下色水可能更特別。Loliflash 就有埋 3 塊濾鏡，只要套上燈仔度做可以打唔同顏色嘅光，想面青青又得，面紅紅都得，夠晒特別。
▲ 用濾鏡喺萬聖節營造下恐怖氣氛都唔錯架。
依莉詩：「夾夾燈陪我出生入死，我會揀佢！」
講咗咁耐，雖然每款燈都各有優點，電筒夠平、相機 LED 燈夠光、冬甩夠輕、Loliflash 夠自然。不過我最愛都喺夾夾燈，話晒佢都陪咗我入咁多間鬼屋，無功都有勞，又夠光用嚟打燈，又可以用嚟自拍，啱晒我平時出去影嘢粗用。
分享到 :
最新影片
