香港人工時長，就算上到車都唔會成日喺屋企，所以裝隻 IP-Cam 監察住屋企嘅老人家、小朋友或者寵物都好常見。不過如果要知道佢地幾時番屋企，幾時出街就唔會有通知，只有望實個 mon 先知啦！最近 Netatmo 推出嘅 Welcome 智能家居攝影機可以話喺 IP-Cam 嘅進化版，唔單止有人出入會自動打卡，而且有異動會錄影同通知你，好似好勁咁。於是我依莉詩就靜靜雞將佢放咗喺公司幾日，試下好唔好用。
簡易安裝，130度廣角鏡看門口
平時 set IP-Cam 可能要入 CD 或者掃描 QR Code，仲要設定 IP 地址等一大堆步驟，而呢隻家居攝影機考慮到我呢 D 對 set 嘢一知半解嘅人需要，只要用 iOS 8 或 Android 4.3 以上手機下載 Welcome 應用程式，然後跟住指引，將插咗電嘅家居攝影機倒置，再連接屋企 WiFi 就得，簡單到 5 分鐘就搞掂。而家居攝影機配有 130 度廣角鏡同紅外 LED 功能，可以拍攝 1080p 高清片，所以無論有無開燈，有咩人出入都可以拍得一清二楚。
▲ 盒內有一部 Welcome 家居攝影機、一條 USB線、一條 link 線同火牛。實際上只要將火牛接駁家居攝影機就裝好。
▲ 130度廣角鏡足以監察住門口嘅動靜。
▲ 除咗用 WiFi ，亦可以用 link 線接駁 Router，但 WiFi 當然方便好多啦。
▲ 只要按 App 指示將插咗電嘅家居攝影機倒置，再連接屋企 WiFi 就得，非常簡單。
偵測異動即拍片，SD卡儲存易翻睇
同一般 IP-Cam 唔同，家居攝影機主要放喺門口，監察出入情況，所以除咗睇 Live 之外，只會喺偵測到異動先會錄影同儲存，唔會長時間做錄影，咁就可以慳番唔少 SD卡嘅位。同時，只要一有異動，例如有人經過、光暗改變，都會即時透過應用程式通知你，等你即刻睇下係咪有陌生人走入屋。如果想睇番之前有咩人出入都可以喺應用程式揀番條片睇，唔洗好似閉路電視咁要諗番大約幾時發生，再喺條長長嘅片中搵番個動靜。
▲ 錄咗嘅片都會儲存喺 SD卡。
▲ 將家居攝影機對住門口，只要辨識到人樣就會立即通知你有陌生人出入，如果郁得太快或者戴咗口罩就會通知你偵察到有運動。不過因為房門口隔離喺玻璃，所有偶然反射到陰影都會當有運動呢！
▲ 另外，我嘗試對住電視睇下佢會唔會辨別錯，結果 check 到皇帝妹同張保仔都喺我屋企呀！嚇死人咩？
認人都幾準，出入都走唔甩
除咗會偵察到有人經過之外，你仲可以教佢識別你嘅屋企人。當然開頭你要教佢邊個打邊個，只要教得愈多次佢就愈唔會認錯。咁以後邊個番咗屋企，邊個出咗街你都會即時知啦！我放咗喺公司一日，每個人教咗佢 5 – 10次，基本上都認到幾個男同事啦！當然女同事有時除下眼鏡，轉下髮型就要教多幾次先識。而佢最多可以認到 16個人，唔好話屋企，細細地嘅公司都夠用。老細就話用嚟打卡幾好啦，邊個遲到、早走，成日去廁所都知實走唔甩，唔喺掛！？
▲ 每偵察到一個陌生人都可以幫佢建立一個個人資料。
▲ 亦可以就唔同人取消錄影同通知功能，唔洗成日影到自己走嚟走去。
依莉詩：「放喺屋企好似唔實際，反而細公司用仲好」
其實如果屋企有老人家、小朋友或者寵物我覺得用番 IP-Cam 監察佢地動靜會仲好，知道佢地喺唔喺屋企好似無乜用咁。香港地地方細細，喺唔喺屋企一眼都睇晒，唔通番咗屋企都唔知咩？反而依家 co-working space 愈嚟愈多，人多出入自然保安要加強，用呢部家居攝影機看門口，又唔洗長期睇住閉路電視，有異樣先通知你，而且員工出入又可以自動打埋卡，應該幾啱細公司用。(btw 身為職員仔嘅我，想快 D 還番部嘢！)
售價：$1,899
查詢：Hong Kong Lava Holdings Company Ltd. （2768 7009）
分享到 :
最新影片
