咩話？iPhone 6s 先啱啱開賣，Apple 又好似 Apple Watch 咁，連 iPhone 都玩 Edition 版本，仲要推出極罕嘅黑金版 iPhone 6s？查實呢款尊貴款式，並非由 Apple 推出，而係一間專為 iPhone 做貴金屬機背嘅公司 Karalux 做嘅。除咗推出 24K 玫瑰金機背外，仲推出呢款極罕以銠（Rhodium）製造嘅黑金機背，售價比 24K 玫瑰金機背貴出 6 倍！簡直係身份象徵。
呢款黑金版 iPhone 6s，同太空灰版完全唔同，首先係機背真係完全黑色，而非太空灰嘅黑灰色；而機背頂及底兩條帶，就由灰色變為白色，係全黑色機背上面，真係幾型。據官方表示，要做到呢款黑金機背，廠方需要連續 8 小時，以超過 10 個不同階段嘅製作工序，先做到呢款世上極罕嘅 iPhone 6s 機背。而銠呢種金屬本身就係極罕有金屬，而且製作過程中要以最適當比例，混合銠及 24K 金兩種金屬，仲要調整製造此表面時嘅電流，全部都係好困難嘅工序，所以採用佢做嘅 iPhone 6s 機背自然價值連城。此外，所有機背均會加入一種特別塗層，令表面更加耐用。
咁呢款機背究竟幾錢？據官方表示黑金版售價為 4,200 萬越南盾（約 HK$14,478）至 5,500 萬越南盾（約 HK$18,959）不等，視乎買家需要嘅 iPhone 6s 容量。雖然未至於天價，但買部手機要成皮半到接近兩皮，唔知大家又會唔會考慮入手呢？
來源：Karalux
新 iPad 發佈活動今晚舉行 預料時間僅 35 分鐘 首款 Apple 可摺疊屏幕產品 未來 2 年有望推出 Tim Cook：中國是全球競爭最激烈市場 但仍看好 AI 能回復消費者信心
