聽日就係 Apple 嘅 iPhone 6s / 6s Plus 正式開賣嘅大日子，為了讓大家係出機前諗清楚邊部啱自己用，Edward 今日拿到機之後，就即刻為大家通宵炮制 iPhone 6s / 6s Plus 嘅評測文章。首先，先為大家帶來呢兩部機嘅開箱文，以及機身設計及手感速測先啦！
▲筆者手上嘅係 iPhone 6s Plus，係 5.5 吋熒幕嘅大 iPhone。大家留意嘅係今代兩部新 iPhone 都採用見到入面係咩顏色機種嘅盒面設計，同上代 6 / 6 Plus 嘅全白立體盒面有分別。
▲打開就見到 iPhone 6s Plus 了。
▲筆者手上嘅係太空灰。
▲再落來就係篤出 SIM 卡槽嘅金屬針，以及說明書及 Apple 圖示貼紙。
▲再落去就係適用於香港充電嘅 3 腳火牛。
▲上面就係 EarPod 耳機同埋 Lightning 充電線。
▲至於 iPhone 6s，開箱後同 iPhone 6s Plus 係配件上係無分別嘅，所以筆者就唔再多講了。
▲筆者手上嘅 iPhone 6s Plus 是銀色。
至於手感方面，iPhone 6s Plus 就同上代基本上都無乜大分別，因為機身無乜明顯闊咗長咗，唯一係機身厚度比上代厚啲啲，但真係要兩部機拍埋先至睇得到，如果平時使用，基本上唔會感覺到個 0.2mm 嘅分別。不過係用料上，筆者就感受到 iPhone 6s Plus 同上代嘅唔同了，今代採用了 7000 鋁合金金屬作為機殼，相比上代硬淨度更高，唔會好似上代咁如果用力拗個機身，會好容易出現拗彎嘅情況。而用上新物料嘅 iPhone 6s Plus，機背感覺比上代「孩」手少少，但要好細心先 feel 到個分別，一般用起來筆者就覺得分別唔大啦。
▲睇番機身，iPhone 6s Plus（左）同上代 iPhone 6 Plus（右）係正、反面都係幾乎完全無分別！
▲唯一分別就係 iPhone 6s Plus 係機背度嘅 iPhone 字下面多印個 S 字而已。
▲機身方面，今代 iPhone 6s Plus（下）採用了 7000 鋁合金金屬作為機殼，手感就比上代 iPhone 6 Plus（上）「孩」少少，但其實一般用個時唔會太覺。
▲而且用 7000 鋁合金做機殼，機身硬淨好多，無咁易拗彎。
▲至於厚度方面，iPhone 6s Plus（右）確實比上代 iPhone 6 Plus（左）厚 0.2mm，但真係要咁樣比對先見到分別，實質用落係感受唔到嘅。
▲至於按鍵同插槽方面，大致上 iPhone 6s Plus（上）同 iPhone 6 Plus（下）完全一樣，只係從上圖見到，iPhone 6s Plus 嘅 Lightning 插槽位同埋 SIM 卡位好似都開得細咗。另外，之前有人話 iPhone 6s Plus 嘅按鍵按下去比上代實，但筆者試過其實分別極微，可以話一樣咁滯。
▲其實機背近機頂同機底位置都有條「白帶」，用係太空灰機上面其實都有少少礙眼……
▲SIM 卡依然係採用 Nano SIM。
▲至於機背鏡頭方面，就終於升至 1,200 萬像素。究竟效果係點，遲啲試俾大家睇！
iPhone 6s / 6s Plus 嘅開箱文同埋初步手感就同大家分享咗啦，但究竟入面各項新功能又點玩？熒幕、鏡頭等等功能效果又點？大家唔洗心急住，等 Edward 食個飯先，之後逐樣同大家試真佢！等我！！
新 iPad 發佈活動今晚舉行 預料時間僅 35 分鐘 首款 Apple 可摺疊屏幕產品 未來 2 年有望推出 Tim Cook：中國是全球競爭最激烈市場 但仍看好 AI 能回復消費者信心
